ތޮއްޖެހުން ހައްލު ކުރަން މާލެއިން ބިންކޮޅު ދޫކޮށްލާ ހުޅުމާލެއަށް ބަދަލުވާން ބޭނުންވާ މީހުންނަށް، "ވެށިފަހި"ގެ ނަމުގައި ބޮޑު ޕްރޮޖެކްޓެއް އިއުލާން ކުރައްވައި އެކަން ހިންގެވުމުގެ މޭސްތިރިއަކަށް ހުންނެވީ މާލޭގެ ފުރަތަމަ މޭޔަރު ސަރަނގު އާދަމް މަނިކެވެ. އޭނާ ކުރެއްސެވި، އެ މަޝްރޫއަކީ މާލެ ހިތްފަސޭހަކޮށްލަން އޮތް ވަށައިޖެހޭ ޕްލޭނެކެވެ. އެކަމަކު، އެ މަޝްރޫއުން ފޮނިކަމެއް ނުލިބި އުޅެނިކޮށް އޭނާ މޭޔަރު ކަމާ ދުރަށް ޖެހިވަޑައިގަންނަވަން ޖެހުނީ އެވެ. އޭގެ ފަހުން އައި އެއްވެސް މޭޔަރަކަށް މިވަރުގެ "ގަދަ" މަޝްރޫއެއް ހިންގާލަން ކެރިފައެއް ނެތެވެ. ހުރިހާ ބޭފުޅުން ވެސް ދެއްކެވީ ވާހަކަ އެވެ. އެކަމަކު އަމަލީ ގޮތުން އެ މަސައްކަތް ކުރެއްވި ބޭފުޅަކީ، ސަނރަގު އާދަމް މަނިކެވެ. މާލޭ މުނިސިޕަލްޓީގެ ވެރިއަކަށް ހުންނަވައިގެން ވެސް އޭނާ ކުރެއްވީ ހަމަ އެ ކަންތަކެވެ.
އެ ތަޖުރިބާތަކާ އެކު، އޭނާ އަނެއްކާ ވެސް މާލޭގެ މޭޔަރުގެ ރޭހަށް ނިކުންނަވައިގެން އެ ހުންނެވީ އެ ހައްލުތަކުގެ ވާހަކަ ދައްކަވަމުންނެވެ.
"މޭޔަރު ކަމަށް ކުރިމަތިލާން ނިންމީ މާލޭގެ ކަންތައްތައް މިހާރަށް ވުރެ ރަނގަޅު ކުރުމުގެ އުންމީދުގައި. ދެން އެ ކަމަކީ އަޅުގަނޑު މީގެ ކުރީގައި ވެސް ކޮށްފައި އޮތް ކަމަކަށް ވާތީ އަޅުގަނޑުގެ ތަޖުރިބާގެ އަލީގައި ތަންކޮޅެއް ރަނގަޅަށް އެކަން ކުރެވޭނެ ކަމަށް ޔަގީންވާތީ،" އާދަމް މަނިކު ވިދާޅުވި އެވެ.
ވެށިފަހި މަޝްރޫއު އިފްތިތާހު ކުރުމުގެ ހަފްލާގެ ތެރެއިން.
މިފަހަރު އޭނާގެ ސިޔާސަތަކީ، "މާލެ ފަސްޓް" ސިޔާސަތުތެވެ. އޭނާގެ ވައުދަކީ، މާލެ އަށް ކުރިމަތިވެފައި ހުރި ބޮޑެތި މައްސަލަތައް ކަމަށްވާ، ޓްރެފިކްގެ މައްސަލަ އާއި ބޯހިޔާވަހިކަމުގެ މައްސަލައަށް ހައްލު ހޯދުމެވެ.
އޭނާ ދެކެވަޑައިގަންނަވާ ގޮތުގައި މާލޭ ރައްޔިތުންނަށް މިއަދު ދިމާވެފައިވާ އެންމެ ބޮޑު މައްސަލައަކީ ބޯހިޔަވަހިކަމުގެ މައްސަލައެވެ. އައިޑީ ކާޑުގައި މާލެ ރައްޔިތެއްގެ ގޮތުގައި އޮންނަ އެތައް ބަޔަކަށް މާލޭގައި އަމިއްލަ ގެދޮރު ލިބެން ނެތުމަކީ މައްސަލައެއް ކަން އޭނާ ވިދާޅުވެ އެވެ.
"އަޅުގަނޑަކަށް ހިޔެއްނުވޭ މާލޭ މީހުން އެއްގޮތަކަށް ވެސް އަތޮޅުތަކުގެ މީހުން މާލެ އައުމަށް ހުރަސް އަޅާ ހެނެއް. އެކަމު ވާނެގޮތަކީ އެމީހުންގެ ވެސް ހައްގުތަކެއް ވާއިރުގައި، އެ ހައްގުތައް ވެސް ރައްކާތެރިވެގެން އެކަން ވާންޖެހޭނީ. އެހެންވީމާ އަޅުގަނޑުގެ ވިސްނުމަކީ މާލެ އޭ ފުރަތަމަ. އެ މައްސަލަ ހައްލުކޮށްފައި ނޫންތޯ މާލެއިން ބޭރުން މާލެއަށް އަރާތިބި މީހުންގެ މައްސަލަ ހައްލުކުރަން ވާނީ،" އާދަމް މަނިކު ވިދާޅުވި އެވެ.
ބޯހިޔާވަހިކަމާއެކު ކުއްލި ކޮންޓްރޯލް ކުރުމަށްވެސް އޭނާގެ ތަސައްވަރެއް އެބައޮތެވެ. ގާނޫނަކުން ކުލި ކޮންޓްރޯލް ނުވާނެ ކަން އޭނާ ގަބޫލު ކުރައްވަ އެވެ. އޭނާ ވިދާޅުވީ، އެކަމަށް އޮތް ހައްލަކީ، ޑިމާންޑަށް ވުރެ ސަޕްލައިން އިތުރު ކުރުމެވެ. ސަޕްލައި އިތުރު ކުރުމަށް ކަންތައްކެއް ކުރެވިދާނެ ކަމަށް އޭނާ ދެކެ އެވެ. އެގޮތުން ލޯނުގެ އިންޓްރެސްޓް ކުޑަ ކުރުމަށް ބާރު އަޅާނެ ކަމަށް އޭނާ ވިދާޅުވި އެވެ.
ސަރަނގު އާދަމް މަނިކު ނަޝީދުގެ ސަރުކާރުގައި އެމަނިކުފާނާ އެކު -- ފޮޓޯ/ ރައީސް އޮފީސް
މާލެއަށް ދެން ދިމާވެފައި އޮތް މައްސަލައަކީ ޕާކިންގެ މައްސަލައެވެ. ނުކަރާތަވަރަށް މިތަނަށް ދުއްވާ އެއްޗިސް ގިނަ ކުރުމަކީ، އެކަން ބޮއްސުންލާއިގެން ދާ ކަމެއް ކަަމަށް އޭނާ ވިދާޅުވިއެވެ. ކިތަންމެ ވަރަކަށް ޕާކިން ޒޯން އިތުރު ކުރިޔަސް ޕާކިން މައްސަލަ ހައްލު ނުވާނެ ކަމަށް އާދަމް މަނިކު ވިދާޅުވިއެވެ.
ވެހިކަލްތައް އެތެރެކުމުގެ މިންގަނޑު ކަނޑައެޅުން މުހިންމު ކަމަށް އާދަމް މަނިކު ދެކެވަޑައިގަންނަވަ އެވެ. ސިޓީ ކައުންސިލާ މަތިކޮށްފައިވާ ޒިންމާތައް އަދާކޮށް، މާލެއަށް އުޅަނދު އެތެރެކުރެވޭނެ މިންވަރު ކަނޑައަޅައި މަގުތަކުގެ ހަލަބޮލިކަމަށް ހައްލެއް ގެނެސްދެއްވުމަކީ އޭނާގެ ވައުދެކެވެ.
އެއާއެކު ޕަބްލިކް ޓްރާންސްޕޯޓު ހަރުދަނާ ކުރުމަކީ އޭނާ އިސްކަންދެއްވާ ކަމެކެވެ. އޭނާ ކުރިން މޭޔަރު ކަމުގައި ހުންނެވި އިރު މާލެ އަށް މިނީ ބަސް ތައާރަފް ކުރެއްވި އެވެ. އާދަމް މަނިކު ގަބޫލުކުރައްވަނީ އޭނާ އިސްތިއުފާ ދެއްވި ހިސާބުން އެ މަސައްކަތް އެކަށީގެންވާ ގޮތެއްގައި ނުބެލެހެއްޓުނީ ކަމަށެވެ. ނޫނީ ބަލަހައްޓަން ނޭނގުނީ އެވެ. އޭނާ އެނބުރި އައިސް އެކަން ކުރައްވާނެ ކަމަށް ވިދާޅުވި އެވެ.
މިހުރިހާ ކަމަކަށް ހައްލު ހޯދުމުގެ ވިސްނުމާއި ތަޖުރިބާ އާދަމް މަނިކުގެ އެބަހުއްޓެވެ. މައްސަލަތަކަށް ހައްލު ހޯދައިދޭނެ މީހަކީ އާދަމް މަނިކު ކަމަށް، އޭނާ ވިދާޅުވެ އެވެ. އޭނާ އެމްޑީޕީގެ އެންމެ މެންބަރުންގެ ކިބައިން، އެދެނީ މާދަމާ އޮންނަ އެމްޑީޕީ ޕްރައިމަރީގައި އޭނާ ހޮވައިދިނުމަށެވެ. މާލެ އަކީ މާލޭ ރައްޔިތުންގެ ތަނަކަށް ހެދުމަށް އޭނާއަށް އެ ޕްރައިމަރީ ކޮންމެހެން ވެސް ކާމިޔާބު ވާން ޖެހޭ ކަމަށް އާދަމް މަނިކު ވިދާޅުވެ އެވެ.