މި ފެށޭ 2019 ވަނަ އަހަރާ އެކު ވެލާނާ އިންޓަނޭޝަނަލް އެއާޕޯޓުން މަތިންދާ ބޯޓުތަކަށް ވިއްކާ ޖެޓްފިއުލްގެ އަގު ހެޔޮކުރަން ނިންމައިފި އެވެ.
މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން މިއަދު ބުނި ގޮތުގައި، 1 ޖެނުއަރީ 2019 އިން ފެށިގެން ވެލާނާ އިންޓަނޭޝަނަލް އެއާޕޯޓުން ބައިނަލްއަގުވާމީ އަދި ޑޮމެސްޓިކް ދަތުރުތައް ކުރާ އެއާލައިންތަކަށް ޖެޓްފިއުލް ވިއްކާ އަގު ހެޔޮކުރުމަށް ވަނީ ހަމަޖެހިފަ އެވެ.
އެމްއޭސީއެލް އިން ބުނީ 1 ޖެނުއަރީ 2019 އިން ފެށިގެން ބައިނަލްއަގުވާމީ ފްލައިޓުތަކަށް ޖެޓްފިއުލް ލީޓަރެއް ވިއްކާނީ 0.9113 ޑޮލަރު (14 ރުފިޔާ)އަށް ކަމަށާއި ޑޮމެސްޓިކް ފްލައިޓުތަކަށް ޖެޓްފިއުލް ވިއްކާނީ ލީޓަރެއް 0.92033 ޑޮލަރު (14.19 ރުފިޔާ)އަށް ކަމަށެވެ.
އެމްއޭސީއެލް އިން ބުނީ މި އަގުތަކަކީ ކުރިން ބައިނަލްއަގުވާމީ އަދި ޑޮމެސްޓިކް ފްލައިޓުތަކަށް ތެޔޮ ވިއްކި އަގުތަކަށް ވުރެ 6.91 އަދި 7.50 ޕަސަންޓު ހެޔޮ އަގުތަކެއް ކަމަށެވެ.
އަދި މިހާރު ހިނގަމުންދާ ފަތުރުވެރިކަމުގެ ހައި ސީޒަންގައި މި އަގުތައް ހެޔޮކުރުމަކީ އެއާލައިންތަކަށް އެކަމުގެ ފައިދާ ކުރާނެ ކަމެއްކަމަށް ވެސް އެމްއޭސީއެލް އިން ބުންޏެވެ.
ވެލާނާ އިންޓަނޭޝަނަލް އެއާޕޯޓު ތަރައްގީކުރުމުގެ މަޝްރޫއުގެ ދަށުން އެތަނުގައި އަޅާ އާ ފިއުލް ފާމުގެ މަސައްކަތް މިހާރު ބާރަށް ދަނީ ކުރިއަށެވެ.
އަލަށް ހަދާ ފިއުލް ފާމުގައި 45،000 މެޓްރިކް ޓަނުގެ ކެޕޭސިޓީ ހުންނާނެ އެވެ. އެމްއޭސީއެލުން ބުނި ގޮތުގައި މި ފެށޭ އަހަރުގެ ތެރޭގައި އާ ފިއުލް ފާމުގެ މަސައްކަތް ނިމޭނެ އެވެ.