އަންނަ އަހަރު ބާއްވާ ރައްޔިތުންގެ މަޖިލީހުގެ އިންތިހާބުގައި އެމްޑީޕީއަށް އަޣުލަބިއްޔަތު ނުލިބިއްޖެ ނަމަ ސަރުކާރުން ވެފައިވާ ވައުދުތައް ފުއްދުމަށް ދަތިވާނެ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
މައްޗަންގޮޅި މެދު ދާއިރާއަށް ވާދަކުރައްވާ ރައީސް ނަޝީދުގެ ކެމްޕެއިން ޖަގަހަ ހުޅުވުމަށް މިއަދު ހަވީރު ބޭއްވި ރަސްމިއްޔާތުގައި ނަޝީދު ވިދާޅުވީ، 19 ވަނަ ރައްޔިތުންގެ މަޖުލީހުގެ އަޣުލަބިއްޔަތު އެމްޑީޕީ އަށް ހޯދުމަށް އެޕާޓީން ކުރެވުނު ހުރިހާ މަސައްކަތެއް ކުރާނެ ކަމަށެވެ.
"19 ވަނަ މަޖިލީހުގައި ސާދާ އަޣުލަބިއްޔަތެއް ހޯދުމަށް މި ޕާޓީން، އެމްޑީޕީން ކުރެވެން އޮތް ހުރިހާ މަސައްކަތެއް އެމްޑީޕީން ކުރާނެ. އެ އަޣުލަބިއްޔަތު އެމްޑީޕީ އަށް ނުލިބިއްޖެ ނަމަ ސަރުކާރުން ރައްޔިތުންނަށް ވެފައިވާ ވައުދުތައް ފުއްދުމަށް ދަތިވާނެ،" ނަޝީދު ވިދާޅުވިއެވެ.
އިތުރަށް ވާހަކަފުޅު ދައްކަވަމުން ރައީސް ނަޝީދު ވިދާޅުވީ، މަރުތައް ތަހުގީގްކޮށް ނާޖާއިޒް ފައިދާގެ އިތުރުން ވައްކަމާއި ހިޔާނާތް ބަލައި ހޯދުމަށް ރައީސް އިބްރާހިމް މުހައްމަދު ސޯލިހު އުފެއްދެވި ދެ ކޮމިޝަނަށް ގާނޫނީ ގޮތުން ބާރުވެރިކަން ދިނުމަށް ހުށަހަޅާފައި އޮތް ދެ ބިލް ފާސްކުރަން މަޖިލީހުން ވޯޓު ނުލިބުނުު ކަމަށެވެ. އަދި ފާއިތުވި ތަނުގައި ވެސް ފެނުނީ ވައުދު ފުއްދުމަށް ވާދަވެރި ސިޔާސީ ޕާޓީތަކުގެ އެހީތެރިކަން ނުލިބުނު މަންޒަރު ކަމަށް އެމަނިކުފާނު ވިދާޅުވިއެވެ.
"ދިވެހި ރައްޔިތުންގެ ޑިމޮކްރެޓިކް ޕާޓީގެ ފުރަތަމަ ވެރިކަމުގައި 2009 ވަނަ އަހަރު ދޮށީ އުމުރުގެ މީހުންނަށް ޕެންޝަނެއް ދިނުމަށް ސަރުކާރުން ނިންމީމަ އެކަމާ ގުޅޭ ގޮތުން ވާދަވެރި ޕާޓީތަކުން ދިޔައީ ކޯޓަށް. ރައްޔިތުންގެ މަޖިލީހުގައި އެއަށް ވޯޓު ދެއްވީކީ އެއް ނޫން. އަޅުގަނޑުމެންގެ ކޮންމެ ވައުދެއް ފުއްދުމަށް ވެސް މަޖިލިހުގެ އަޣުލަބިއްޔަތު ބޭނުންވޭ،" ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ، ކުރިއަށް އޮތް 19 ވަނަ މަޖިލީހުން ރައްޔިތުންނަށް ކޮށްދޭން ޖެހޭނެ އެންމެ ބޮޑު ކަމަކީ ކޮންމެ ރައްޔިތަކަށް ބޯހިޔާވަހިކަން ފޯރުކޮށްދިނުން ކަމަށެވެ. އަދި އަންނަން އޮތް ޖީލަށް ބޯހިޔާވަހިކަމެއް ހޯދައިދިނުމަކީ ދިވެހިރާއްޖޭގެ ހުރިހާ ސިޔާސީ ވެރިންގެ ވެސް ވާޖިބެއް ކަމަށާއި 19 ވަނަ މަޖިލިސް ވެގެންދާނީ ރާއްޖޭގެ ރައްޔިތުންނަށް ބޯހިޔާވަހިކަމެއް ހޯދައިދިނުމުގެ އެންމެ ބޮޑު ވަސީލަތައް ކަމަށް އެމިނިކުފާނު ދެކެވަޑައިގަންނަވާ ކަމަށެވެ.
ފޮރިން މިނިސްޓާ އަބްދުﷲ ޝާހިދު ވާހަކަފުޅު ދައްކަވަނީ ---- ސަން ފޮޓޯ/ އަހުމަދު އަވްޝަން އިލްޔާސް
އެ ރަސްމިއްޔާތުގައި ވާހަކަފުޅު ދައްކަވަމުން ފޮރިން މިނިސްޓަރު އަބުދުﷲ ޝާހިދު ވިދާޅުވީ، 19 ވަނަ މަޖިލީހަށް ލިބޭ އެންމެ ބޮޑު އުންމީދަކީ ރައީސް ނަޝީދު ވާދަ ކުރެއްވުން ކަމަށެވެ. ނަމަވެސް ކުރިއަށް އޮތް މަޖިލީހުގެ ދައުރުގަައި އޭނާއަށް ރައީސް ނަޝީދާއެކު ބައިވެރި ނުވެވުން އެއީ ލިބޭނެ އެންމެ ބޮޑު ހިތާމަ ކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ، ރައީސް ނަޝީދު މަޖިލީސް އިންތިހާބަށް ވާދަކުރައްވަން ނުކުމެ ވަޑައިގެން ހުންނެވީ މަޖިލީހުގައި އިންނަވައިގެން މަޖިލީހުގެ އެއްވެސް ކަމެއް ގޯހުން ދިޔަ ނުދޭނެ ކަމުގެ އަޒުމާއި ހިތްވަރާއެކުގައި ކަމަށެވެ.