ތ. މަޑިފުށީ ބަނދަރުގައި އޮތް ތެޔޮ ބާޖެއްގައި މަސައްކަތް ކުރަމުން ދިޔަ ފަޅުވެރިއެއްގެ ގައިގައ އަލިފާން ރޯވެ ފިހިއްޖެ އެވެ.
މަޑުފިށީ ކައުންސިލުގެ ރައީސް އިސްމާއިލް ހިލްމީ "ސަން" އަށް ވިދާޅުވީ އެ ހާދިސާ ހިނގައި ދިޔައީ މިއަދު މެންދުރު 12 އެހާކަށްހާއިރު ކަމަށެވެ.
އޭނާ ވިދާޅުވީ އެ ހާދިސާ ހިނގައި ދިޔައީ ރޯވި މީހާގެ ގަޔަށް ޕެޓްރޯލު އެޅިފައި ވަނިކޮށް، އެހެން މީހަކު ގްރައިންޑަރު ބޭނުން ކުރުމުން، އޭނާގެ ގަޔަށް އަލިފާން ކަނި ބުރައިގެން ކަމަށެވެ.
އެމީހާގެ ބަނޑުން ފެށިގެން ފަޔާ ހަމައަށް ވަރަށް ބޮޑަށް ފިހިފައިވާ ކަމަށް މައުލޫމާތު ލިބިފައިވާ ކަމަށް ހިލްމީ ވިދާޅުވި އެވެ.
އެ ހާދިސާއަށް ފަހު، އޭނާއަށް ފަރުވާ ދިނުމަށް ސީއެމްބިއުލާންސުގައި މާލެއަށް ވަނީ ފުރުވާލާފަ އެވެ.
އެ ހާދިސާ ހިނގައި ދިޔައީ، ވިލުފުށީ ދާއިރާގެ މެމްބަރު ރިޔާޒު ރަޝީދުގެ މަސްލަހަތު އޮންނަ މެރީޑިއަމް ކުންފުނީގެ ބާޖެއްގަ އެވެ.