ތިން ގާނޫނަކަށް އިސްލާހު ގެނައުމަށް ސަރުކާރުގެ ފަރާތުން ވެރިކަން ކުރާ ޕީޕީއެމް ޕީޖީ ގްރޫޕްގެ މެންބަރުން ހުށަހެޅި އިސްލާހުތައް ފާސްނުވެ މަޖިލީހުން ބޭރުކޮށްލައިފި އެވެ.
އެ ތިން ގާނޫނަކީ ރައްޔިތުންގެ މަޖިލީހުގެ އިންތިހާބުގެ ގާނޫނާއި ޖިނާއި އިޖުރާއަތުގެ ގާނޫނުގެ އިތުރުން ދިވެހިރާއްޖޭގެ ޖަލުތަކާއި ޕެރޯލްގެ ގާނޫނު ހުށަހެޅި އިސްލާހުތަކެވެ.
އެގޮތުން ރައްޔިތުންގެ މަޖިލީހަށް ކުރިމަތިލާއިރު ދައްކަންޖެހޭ ފީ 15،000 ރުފިޔާއަށް ބޮޑު ކުރުމަށް ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް އިންތިހާބާ ބެހޭ ގާނޫނަށް ހުށަހެޅި އިސްލާހަށް ލިބުނީ 15 ވޯޓެވެ. އެ އިސްލާހާ ދެކޮޅަށް 50 މެންބަރުން ވޯޓު ދެއްވި އިރު ވަކި ކޮޅަކަށް ވޯޓު ނުދީ އެއް މެންބަރެއް އިންނެވި އެވެ.
ރިޝްވަތާއި ކޮރަޕްޝަން އަދި ދައުލަތަށް ހިޔާނާތްތެރިވުމުގެ ކުށް ތަފުސީލުކޮށް ގާނޫނުލްއުގޫބާތަށް ސަރުކާރުގެ ފަރާތުން ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ ހުށަހެޅި އިސްލާހާއި ދެކޮޅަށް 66 މެންބަރުން ވޯޓު ދެއްވި އިރު އެއްކޮޅަށް ވޯޓު ދެއްވީ އެންމެ މެންބަރެކެވެ. އަދި ވަކިކޮޅަކަށް ވޯޓު ނުދެއްވާ އެއް މެންބަރެއް އިންނެވި އެވެ.
މޯލްޑިވްސް ކަރެކްޝަނަލް ސާވިސްގެ ނަން ނޭޝަނަލް ޕްރިޒަން ސާވިސްގެ ނަމަށް ބަދަލު ކުރަން ޖަލުތަކާއި ޕެރޯލްގެ ގާނޫނަށް މާވަށު ދާއިރާގެ މެމްބަރު އަހުމަދު އަޒްހާން ފަހުމީ ހުށަހެޅި އިސްލާހާ ދެކޮޅަށް 61 މެންބަރުން ވޯޓު ދެއްވި އިރު އެއްކޮޅަށް ވޯޓު ދެއްވީ ދެ މެންބަރުންނެވެ. އަދި ވަކި ކޮޅަކަށް ވޯޓު ނުދީ ފަސް މެންބަރުން ތިއްބެވި އެވެ.