ބޮގޮޓާ (އޮގަސްޓް 9): ފަލަސްތީނުން އިއުލާންކޮށްފައިވާ މިނިވަން ދައުލަތަށް ލެޓިން އެމެރިކާގެ ގައުމެއް ކަމަށްވާ ކޮލަންބިޔާއިން އިޢުތިރާފް ވެއްޖެއެވެ.
ކޮލަންބިޔާގެ ޚާރިޖީ ވުޒާރާއިން ނެރުނު ބަޔާނެއްގައި ބުނެފައިވަނީ ފަލަސްތީނުން އިއްލާންކޮށްފައިވާ މިނިވަން ދައުލަތަށް ކޮލަންބިޔާ ސަރުކާރުން އިޢުތިރާފްވެ އެދައުލަތާ ޑިޕްލޮމެޓިކް ގުޅުންތައް ގާއިމް ކުރުމަށް ރައީސް ޚުވާން މެނުއެލް ސެންޓޯސް ނިންމަވައިފި ކަމުގައެވެ.
މި ބަޔާނުގައި ފަލަސްތީނުގެ ބިމުގައި ފަލަސްތީނުގެ ރައްޔިތުންނަށް މިނިވަން ދައުލަތެއް އުފެއްދުމުގެ ހައްގު އޮންނާނެކަން ކޮލަންބިޔާގެ ސަރުކާރުން ގަބޫލުކުރާ ކަމުގައެވެ.
ކުރިން ކޮލަންބިޔާއަކީ ފަލަސްތީނުގެ މައްސަލައާ އަޅާނުލައި ހަމައެކަނި އިސްރާއީލާ ގުޅުން ގާއިމްކޮށްފައިވާ ގައުމެކެވެ. ނަމަވެސް އެގައުމުގެ މިހާރުގެ ރައީސް ޚުވާން މެނުއެލް ސެންޓޯސްގެ ވެރިކަމުގައި ކޮލަންބިޔާ ގެންދަނީ ފަލަސްތީނުގެ ހައްގުތަކަށް ތާއީދުކުރާކަން ބައިނަލްއަގްވާމީ އެކި މަހްފަލްތަކުގައި ހާމަކުރަމުންނެވެ.
ފަލަސްތީނުގެ ޚާރިޖީ ވުޒާރާއިން ބުނެފައިވަނީ ފަލަސްތީނުގެ މިނިވަން ދައުލަތަށް ކޮލަންބިޔާ ސަރުކާރުން އިޢުތިރާފްވެ ފަލަސްތީނާ ޑިޕްލޮމެޓިކް ގުޅުންތައް ގާއިމް ކުރުމަށް އެދި ކޮލަންބިޔާ ސަރުކާރުން ފޮނުވާފައިވާ ސިޓީއެއް ލިބިފައިވާ ކަމަށާއި އެކަމާމެދު އުފާކުރާ ކަމުގައެވެ.
ކޮލަންބިޔާގެ ރައީސް ޚުވާން މެނުއެލް ސެންޓޯސް ފަލަސްތީނުގެ ރައީސް މަހްމޫދު އައްބާސަށް ފޯނުން ގުޅުއްވައި ފަލަސްތީނުގެ ދައުލަތަށް އިއުތިރަފްވުމަކީ ކޮލަންބިޔާއިން ކުރަން ލަސްވެފައިވާ ކަމެއްކަމަށާއި ފަލަސްތީނުގެ ހައްގުތަކަށް ރަސްމީ ސިފައެއްގައި އިޢުތިރާފް ވުމަކީ ކޮލަންބިޔާ ސަރުކާރަށާއި ރައްޔިތުންނަށް ލިބޭ އުފަލެއްކަން ހާމަކުރެއްވި ކަމަށްވެސް ފަލަސްތީނުގެ ޚާރިޖީ ވުޒާރާއިން ބުނެއެވެ.
ފަލަސްތީނުން އިއުލާންކޮށްފައިވާ މިނިވަން ދައުލަތަށް މިހާތަނަށް 140 ގައުމަކުން އިއުތިރާފްވެފައި ވެއެވެ. ފަލަސްތީނަށް އިއުތިރާފް ނުވަނީ ޔޫރަޕްގެ ބައެއް ގައުމުތަކާއި އެމެރިކާއާއި އެމެރިކާގެ ކޮންޓްރޯލް އޮންނަ ވަރަށްކުދި ގައުމުތަކުންނެވެ. (އަލްޖަޒީރާ)