މީހަކު މަރުވުމުން ކަމާބެހޭ ފަރާތްތަކަށް ނާންގައި ވަޅުލުމަކީ ކުށެއް ކަމަށް ކަނޑައެޅުމަށް ގާނޫނުލް އުގޫބާތަށް އިސްލާހު ހުށަހަޅައިފިއެވެ.
މީގެ ކުރިން ގާނޫނުލް އުގޫބާތުގައި ބުނަނީ މީހަކު މަރުވެފައި އޮތީ އެހެން މީހަކު އޭނާ މަރާލައިގެންކަން މީހަކަށް އެނގިހުރެ، އެކަން ފޮރުވާ މީހާ އެކުރަނީ ކުށެއް ކަމަށެވެ. އަދި އެއީ ޖިނާއަތުގެ ފަސް ވަނަ ދަރަޖައިގެ ކުށެއް ކަމަށް ވެސް އޮވެއެވެ.
ސަރުކާރުގެ ފަރާތުން ފޭދޫ ދާއިރާގެ މެންބަރު އިބްރާހިމް ދީދީ، ޖިނާއީ އިޖުރާއަތުގެ ގާނޫނަށް ހުށަހެޅި އިސްލާހުތަކުގެ ތެރެއިން 114 ވަނަ މާއްދާއަށް ވަނީ އަކުރެއް އިތުރުކޮށްފައެވެ. އެގޮތުން އެބައިގައި ބުނަނީ މަރުވެފައިވާ މީހެއްގެ ހަށިގަނޑު ފޮރުވުން ނުވަތަ އަންގަންޖެހޭ ފަރާތަށް އެންގުމަކާ ނުލައި ވަޅުލުން ނުވަތަ ނައްތާލުމަކީ ކުށެއް ކަމަށެވެ.
މީހަކު ކުރާ ފަރުވާކުޑ އަމަލެއްގެ ސަބަބުން އެހެން މީހަކު މަރުވެއްޖެނަމަ އެ އަމަލުކުރާ މީހާ އެ ކުރަނީ ކުށެއް ކަމަށް ވެސް ގާނޫލްއުގޫބާތަށް ހުށަހެޅި އިސްލާހުތަކުގެ ތެރޭގައި ވަނީ ހިމަނާފަައެވެ. އަދި މީހަކުކުރާ އިހްމާލުގެ އަމަލަކުން އެހެން މީހަކު މަރުވެއްޖެނަމަ އެ އަމަލުކުރި މީހާ އެކުރަނީ ކުށެއް ކަމަށް ވެސް ވަނީ އިސްލާހު ހުށަހަޅާފައެވެ.
މީހަކު އަމިއްލައަށް މަރުވުމަށް އެދުމާއި އެކަމަށް އެހީތެރވެދިނުމުގެ އިތުރުން އަމިއްލައަށް މަރުވާން މަސައްކަތް ކުރުމަކީ ވެސް ކުށެއް ކަމަށް އިބްރާހިމް މުހައްމަދު ދީދީ ހުށަހެޅި އިސްލާތުކުގެ ތެރޭގައި ވަނީ ހިމަނާފައެވެ.