ތިމާވެއްޓަށް ގެއްލުން ވާތީ ކަންބޮޑުވޭ ހެއްޔެވެ؟ ހަށިގަނޑު ބުރަހެލިވެ ސިއްހީ ގޮތުން ތަފާތު މައްސަލަތަކާ ކުރިމަތިލާން ޖެހޭތީ ހާސްވޭ ހެއްޔެވެ؟ އެކަމަކުވެސް ދުޅަހެޔޮ ސިއްހަތެއްގައި ހުރުމަށް ކަމެއް ކޮށްލަން ބޭނުންމެއް ހަމަ ނުވޭ ހެއްޔެވެ؟ ވާނެއެވެ. ކޮންމެ މީހަކުވެސް ދުޅަހެޔޮ ސިއްހަތެއްގައި ހުންނަން ބޭނުން ވާނެއެވެ. ދުމާއި، ހިރަފުހާއި އަދި އެނޫންވެސް އެފަދަ ބާވަތްތަކުން ތަޣައްޔަރުވެފައިވާ ވެއްޓެއްގައި އުޅޭކަށް އެކަކުވެސް ބޭނުމެއް ނުވާނެއެވެ. ތިމާގެ ވަށައިގެންވާ މާހައުލު އަމާން އޮމާން ތަނަކަށް ހަދަން ބޭނުންވާނެއެވެ. ސާފު ވައި ބޭނުންވާނެއެވެ.
މިކަންކަމަށް މަގުފަހިކުރަން ކޮންމެ މީހަކަށްވެސް ކޮންމެވެސް ކަމެއް ކޮށްލެވިދާނެއެވެ. އެގޮތުން، އޮފީހަށް ދާއިރު، ނުވަތަ ސްކޫލަށް ދާއިރު، ނުވަތަ އެނޫންގޮތަކަށްވެސް އިންޖީނުލީ އުޅަނދެއް ބޭނުންކުރާން ޖެހޭ ހާލަތުގައި ބައިސްކަލެއްގައި ނުވަތަ ހިނގާފައި ދިއުން އިހްތިޔާރު ކުރެވިދާނެއެވެ.
ބައިކް މޯލްޑިވްސްއިން ކުރިއަށްގެންދިޔަ ހަރަކާތެއްގެ ތެރެއިން --- ފޮޓޯ/ ބައިކް މޯލްޑިވްސް
ކޮންމެ އަހަރެއްގެ މޭ މަހަކީ، އިންޓަނޭޝަނަލް "ބައިކް ޓު ވޯރކް މަންތު"ގެ ގޮތުގައި، ޔައުނީ، ވަޒީފާ އަދާކުރާންދާއިރު، ސަވާރީއެއް ނުވަތަ އުޅަނދެއްގެ ގޮތުގައި ބައިސްކަލް ބޭނުންކުރުމަށް ބާރުއަޅައި ބައިނަލްއަގްވާމީ ފެންވަރުގައި ފާހަގަކުރާ މަހެވެ.
ރާއްޖޭގައިވެސް "ބައިކް ޓު ވޯރކް ޑޭ" މިހާރު ފާހަގަކުރެއެވެ. އެގޮތުން މިފަހަރު، ބައިސްކަލްގައި ވަޒީފާއަށް ދާ ދުވަހެއްގެ ގޮތުގައި ރާއްޖޭގައި ފާހަގަކުރާނީ، 8 މޭ 2018، އަންގާރަ ދުވަސް (މާދަމާ)އެވެ. މިދުވަސް ފާހަގަކުރުމަށް ބައިކް މޯލްޑިވްސްއާއި ދިރާގު ގުޅިގެން ޚާއްސަ ހަރަކާތެއް ބޭއްވުމަށް މިހާރު ވަނީ ތައްޔާރުވެފައެވެ.
"އަޅުގަނޑުމެން މިވަނީ، ބައިލް މޯލްޑިވްސްއާ ދިރާގު ގުޅިގެން، 'ބައިކް ޓު ވޯރކް ޑޭ' ފާހަގަކުރަން ނިންމާފައި. އެގޮތުން މާދަމާ، ހަވީރު 4.15އިން 5:15އަށް ދިރާގު ހެޑް އޮފީހުގައި ހާއްސަ ބައްދަލުވުމެއް އޮންނާނެ،" ބައިކް މޯލްޑިވްސްގެ ފައުންޑަރ އަދި ސީއީއޯ އަހްމަދު ޙަސަންދީދީ ވިދާޅުވިއެވެ.
ބައިކް މޯލްޑިވްސްގެ ފުރަތަމަ އިންޓަރ ސްކޫލް ބައިސްކަލް މުބާރާތުގެ މެއިން ސްޕޮންސަރަކަށް ދިރާގު ހަމަޖައްސައި އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގެ ތެރޭން-- ފޮޓޯ: ބައިކް މޯލްޑިވްސް
"ބައިކް ޓު ވޯރކް ޑޭ" މާދަމާ ފާހަގަކުރަން ތައްޔާރުވަމުން ދާއިރު، ދިރާގުން ވަނީ، މިހާރުވެސް އެކުންފުނީގެ މުވައްޒަފުން ބައިސްކަލް ދުއްވުމަށް ޚާއްސަ ނިންމުމެއް ނިންމައިފައެވެ. އެގޮތުން، ކޮންމެ ހަފްތާއެއްގެ ބުރާސްފަތި ދުވަހު ދިރާގު މުވައްޒަފުން އޮފީހަށް ދިއުމަށް ބައިސްކަލް ބޭނުންކުރަން އެ ކުންފުނިން ވަނީ ނިންމައިފައެވެ.
މުވާސަލާތީ ޚިދުމަތް ދިނުމުގެ އިތުރުން ދިރާގަކީ ތިމާވެއްޓާ ގުޅުންހުރި ވަރަށް ގިނަ ހަރަކާތްތަކެއްވެސް ކުރިއަށް ގެންދާ ކުންފުންޏެކެވެ.
"އަޅުގަނޑުމެން ނިންމާފައި ވަނީ، ކޮންމެ ބުރާސްފަތި ދުވަހެއްގައި ކޮންމެ މުވައްޒަފުންވެސް ބައިސްކަލްގައި އޮފީހަށް ދާން ބާރުއަޅާ ގޮތަށް. މިކަން ކުރިއަށް މިގެންދަނީ މުވައްޒަފުންނަށް ދަތި ނުވާގޮތަށް، މުވައްޒަފުންގެ އެއްބާރުލުމާއެކު،" ދިރާގުގެ ސީނިއަރ މެނޭޖަރ މާކެޓިންގ، މުޙައްމަދު މިރްޝާން ހަސަން ވިދާޅުވިއެވެ.
ބައިކް މޯލްޑިވްސްގެ އެނުއަލް ޖޫނިއަރ ބައިކް ޓުއަރގެ ތެރޭން-- ސަން ފޮޓޯ: އަހްމަދު މުޖްތަބާ
ކޮންމެ އޮފީހަކުންވެސް މިފަދައިން ބައިސްކަލްގައި އޮފީހަށް ދާ ދުވަހެއް ފާހަގަކުރުން ހަމަ ވަރަށް ފައްކާވާނެއެވެ. ތިމާވެއްޓަށްވެސް ފައިދާކުރާނެއެވެ. އަދި މުވައްޒަފުންގެ ސިއްހަތަށްވެސް ފައިދާކުރާނެއެވެ.
ބައިކް މޯލްޑިވްސްއާ ދިރާގު ގުޅިގެން މާދަމާ ކުރިއަށް ގެންދާ ހަރަކާތުގައި، ބައިކް މޯލްޑިވްސްގެ ސީއީއޯ އަހްމަދު ހަސަންދީދީއާއި ދިރާގުގެ ސީއީއޯ އިސްމާއީލް ރަޝީދުވެސް ބައިވެރިވެ، ވާހަކަފުޅުދައްކަވާނެއެވެ. އަދި ޕްރޮފެސަރު ޑރ. އަބްދުﷲ ނަސީރާއި، އައިޝަތު ޝާހީންވެސް އެބޭފުޅުންގެ ހަޔާތުގައި ބައިސްކަލްގެ ތަޖްރިބާއާ ބެހޭގޮތުން ވާހަކަފުޅުދައްކަވާނެއެވެ.
ބައިކް މޯލްޑިވްސްގެ އެނުއަލް ޖޫނިއަރ ބައިކް ޓުއަރގެ ތެރޭން-- ފޮޓޯ: ބައިކް މޯލްޑިވްސް
މާދަމާ ބާއްވާ މިހަރަކާތުގައި ބައިވެރިވުމަށް، ބައިކް މޯލްޑިވްސްގެ މެންބަރުންނާއި، މިކަމަށް ޝައުގުވެރިވާ ފަރާތްތަކަށް ބައިކް މޯލްޑިވްސްއިން ދައުވަތުދެއެވެ.
ބައިކް މޯލްޑިވްސްއިން ވަނީ، ހުސްވި އަހަރުވެސް "ބައިކް ޓު ވޯރކް ޑޭ" ފާހަގަކޮށްފައެވެ. މިދިޔަ އަހަރު އެކަން ކުރިއަށް ގެންދިޔައީ ރަސްފަންނުގައެވެ. މާދަމާގެ ހަރަކާތުގެ އިތުރުން، މި މަހުގެ ތެރޭގައި، ބައިސްކަލާ ގުޅޭ ތަފާތު ހަރަކާތްތައް ކުރިއަށް ގެންދިއުމަށް ހަމަޖެހިފައި ވާކަމަށް ބައިކް މޯލްޑިވްސްއިން މައުލޫމާތު ދެއެވެ.
ބައިކް މޯލްޑިވްސްގެ އެނުއަލް ޖޫނިއަރ ބައިކް ޓުއަރގެ ތެރޭން-- ފޮޓޯ: ބައިކް މޯލްޑިވްސް
ބައިކް މޯލްޑިވްސްއަކީ، ބައިސްކަލުގެ ވަސީލަތް ބޭނުންކޮށްގެން ތިމާވެށި ހިމާޔަށް ކުރުމުގެ ހޭލުންތެރިކަން އިތުރު ކުރުމާއެކު، ދުޅަހެޔޮ ސިއްހަތަކަށް ބައިސްކަލުގެ ބޭނުން ކޮށްގެން ކަސްރަތުކުރުމުގެ އާދަ އަށަގެންނެވުމަށް، 2015 ވަނަ އަހަރު ފެށި ހަރަކާތެކެވެ.
އެއްގަމުގައި ދުއްވާ އިންޖީނުލީ އުޅަނދުފަހަރުގެ ސަބަބުން، އަހަރެމެންގެ މި ނާޒުކު ތިމާވެއްޓަށް ނުހަނު ބޮޑެތި ގެއްލުންތައް ލިބެއެވެ. މީގެ އިތުރުން ކަސްރަތެއް ނުކޮށް، ސައިކަލާއި ކާރުފަދަ ތަކެތީގައި އުޅެން ޖެހުމުން ހަށިގަނޑަށް ބުރަހެލިކަންވެސް ލިބެއެވެ. މިކަންކަން އެންމެންވެސް ދަނެއެވެ. އެހެންކަމުން، ބައިސްކަލްފަދަ ތިމާވެއްޓާ ބީރައްޓެހިނޫން ސަވާރީތަކުގެ މުހިއްމުކަން މިވަނީ ވަރަށް ބޮޑަށް ބޭނުންވެފައެވެ. މިކަމަށް މީހުން ހޭލުންތެރިކުރުވާންވެސް އެބަ ޖެހެއެވެ. ހޭލުންތެރިވާންވެސް އެބަ ޖެހެއެވެ.