މިދިޔަ ހަފްތާގެ ހޮނިހިރު ދުވަހު މޫދަށް އެރި އުޅެނިކޮށް އައްޑޫ ސިޓީން ގެއްލުނު ދެކުންދިން ހޯދުމުގެ މަސައްކަތް، މޫސުން ގޯސްވިނަމަވެސް ކުރިއަށް އެބަދާކަމަށް އެމްއެންޑީއެފް އިން ބުނެފިއެވެ.
ތިން ކުއްޖަކު ހިތަދޫ ރީޖަނަލް ހޮސްޕިޓަލާ ދިމާލުން ފުއްޓަރު ފަރާތު މޫދަށް އެރި އުޅެނިކޮށް ނެގި ބިޔަރާޅުތަކާ އެކު ދަމައިގަތް ހާދިސާއަށްފަހު، ވީނުވީއެއް ނޭނގި ގެއްލިގެން ހޯދަމުންދަނީ، ހިތަދޫ ޗަނބޭލީގެ އަލީ ފަހުމީ،17 އާއި އެ ރަށު ޓޮޕާޒް، މަޔާމިން އަލީ،14 އެވެ. އެ ހާދިސާގައި ސަލާމަތް ވެފައިވަނީ، އަލީ ރާއިފު،17 އަހަރު އެކަންޏެވެ.
އެކުދިން ހޯދުމުގެ މަސައްކަތް ފުލުހުންނާއި ސިފައިން އަދި އާންމުން ގުޅިގެން ކުރިއަށްގެންދާތާ ހަފްތާއެއް ވެފައިވާއިރު ސަން އާ ވާހަކަ ދައްކަވަމުން އެމްއެންޑީއެފްގެ އިންފޮމޭޝަން އޮފިސަރު ކެޕްޓަން އިބްރާހިމް އާޒިމް ވިދާޅުވީ، ވިއްސާރަވި ނަމަވެސް ކުދިން ހޯދުމުގެ މަސައްކަތް ކުރިއަށް ގެންދާކަމަށެވެ.
"ވިއްސާރައިގެ ސަބަބުން ވަކި ދައްޗެއް ކުރިމައްޗެއް ނުވޭ. ހަމަ ހުއްޓުމެއް ނެތި މަސައްކަތް ކުރިއަށް މިގެންދަނީ،" އޭނާ ވިދާޅުވިއެވެ.
ގެއްލުނު ދެ ކުދިން ހޯދުމަށް ހެލިކޮޕްޓަރާއި ޑްރޯން ބޭނުން ކޮށްގެންނާއި ޑައިވަރުންނާއި އެކު ކަނޑުގެ އަޑީގެ ބޮޑު ސަރަހައްދެއް ވަނީ ބަލައިފައެވެ. އަދި ޑައިވިން ރޮބޯޓް ބޭނުންކޮށްގެން ވެސް ދަނީ ބަލަމުންނެވެ.
އިއްޔެވެސް ކަނޑުގެ ސާފޭސްގެ 29.7 މީޓަރުގެ ސަރަހައްދެއް ބަލާފައިވާ ކަމަށް އެމްއެންޑީއެފް އިން ބުންޏެވެ.