ކުޑަކުދިންގެ ފިލްމު ކަނޑު އިބިލީސްގެ ކޭޓަރިން ޕާޓްނަރަކަށް ބްލޫބޭ ރެސްޓޯރެންޓު ހަމަޖައްސައިފިއެވެ. މިއާއެކު އެ ފިލްމުގެ ޕްރޮމޯޝަން އިވެންޓުތައް ދެން ބާއްވާނީ އެ ރެސްޓޯރެންޓުގައެވެ. އަދި އިވެންތުތަކުގެ ކޭޓަރިންގެ ކަންތައް ބަލަހައްޓާނީވެސް ބްލޫބޭ އިންނެވެ.
ކަނޑު އިބިލީސް އަކީ އިސްމާއިލް ރަޝީދު (ކޮޕީ އިއްސެ)، އަހުމަދު ޒިޔާ އަދި މުހައްމަދު ރިފްއަތު ޕްރޮޑިއުސްކުރާ ފިލްމެކެވެ.
ކަނޑު އިބިލީސްގެ މުޅި ފިލްމުގެ 80 ޕަސެންޓު މިހާރުު ނިމިފައިވާ ކަމަށާއި ކުރިއަށް އޮތް ހަފްތާއެއްހައި ދުވަހުގެ ތެރޭގައި ފިލްމުގެ ޓްރެއިލާ އާއި ރިލީޒްކުރާނެ ތާރީޚު އިއުލާނުކުރާނެކަމަށް ފިލްމުގެ އެއް ޕްރޮޑިއުސަރު ކޮޕީއިއްސެ ބުންޏެވެ. ކޮޕީ އިއްސެ ބުނީ މިހާރު ކުރިއަށްދަނީ ފިލްމު މާކެޓުކުރުމުގެ ކަންތައް ކަމަށެވެ.
ފިލްމުގެ ކޭޓަރިން ޕާޓްނަރަކަށް ބްލޫބޭ ހަމަޖެއްސިއިރު، އެ ރެސްޓޯރެންޓުގެ ފަރާތުން ދިވެހި ފިލްމީ ދާއިރާއަށްދޭ އެހީތެރިކަން ކަނޑު އިބިލީސްގެ ޓީމުން ވަނީ ފާހަގަކޮށްފައެވެ.
ބްލޫބޭ އިން ބުނީ ކަނޑު އިބިލީސްގެ ކޭޓަރިން ޕާޓުނަރަކަށްވީ، ފިލްމަކީ ކުޑަކުދިންގެ ފިލްމަކަށްވެފައި، ފިލްމީ ދާއިރާއަށް ހާއްސަކަމެއް އަބަދުވެސް ދެވޭތީ ކަމަށެވެ.
މި ފިލްމުގެ ހުރިހާ މަންޒަރެއް ނަގާފައިވަނީ ހދ. ކުޅުދުއްފުށީގައެވެ. އެރަށުގެ ގިނަ ކުދިންތަކެއް ބައިވެރިކޮށްގެން އުފެއްދި މި ފިލްމުން ޒިޔާ އާއި ކޮޕީ އިއްސެ ފެންނާނެއެވެ. ފިލްމު އެންމެ ފުރަތަމަ ޕްރެމިއާ ކުރާނީވެސް ކުޅުދުއްފުށީގައެވެ.
ކަނޑު އިބިލީސްގެ ޕްރޮމޯޝަނަލް އިވެންޓުތަކުގައި ޕާފޯމު ކުރުމަށް ފިލްމުގެ ކަނޑު އިބިލީސްގެ ޕާޕޯމިން ޕާޓްނަރަކަށް ބިދަބިން ބޮޑުބެރު ގުރޫޕު ވަނީ ހަމަޖައްސައިފައެވެ.