މިމަހުގެ އެއް ވަނަ ދުވަހު ސުޕްރިމް ކޯޓުން ނެރުނު އަމުރު ފުލުހުން ތަންފީޒު ކުރަން ނުޖެހޭ ކަމަށް ކުރީގެ ކަމިޝަނަރު އޮފް ޕޮލިސް ހުސައިން ވަހީދު ވިދާޅުވެއްޖެ އެވެ.
ހުސައިން ވަހީދު "ސަން"އަށް ދެއްވި އިންޓަވިއުއެއްގައި ވިދާޅުވީ ކޯޓްތަކުގެ އަމުރުތަކަށް އިހްތިރާމް ކުރަން ޖެހޭ ކަމަށެވެ. ނަމަވެސް ބައެއް ކަހަލަ ހުކުމްތަކަކީ އެ ހުކުމަކަށް އަމަލު ކުރުމުން އާންމު މަސްލަހަތަށް ގެއްލުންވާ ފަދަ ހުކުމެއް ނަަމަ އެ ހުކުމެއް އިސްތިއުނާފް ނުވަތަ އިލްތިމާސް ކުރުމަކީ އަބަދު ވެސް އަމަލު ކުރަމުން އަންނަ "ބެސްޓް ޕްރެކްޓިސް" ކަމަށް ވިދާޅުވި އެވެ.
"ގާނޫނުތަކުގެ ޖުމުލަ މަސްދަރަކީ އާންމު މަސްލަހަތު. އާންމު މަސްލަހަތަށް އަސަރެއްކޮށްފާނެ ފަދަ އަމަލެއް އެއްވެސް ތާކުން ކުރި ނަމަވެސް އެ އަމުރެއްގެ ނަތީޖާ އަކީ ކޮބައިކަން ދެނެގަނެ ފިޔަވަޅު އެޅުމުގެ ކުރިން ސާފުކުރަން ޖެހޭ ކަންކަން ސާފު ކުރަން ޖެހޭނެ." ފުލުހުންގެ ތެރޭގައި 20 އަހަރަށް ވުރެ ގިނަ ދުވަހު ހިދުމަތް ކުރައްވާފައިވާ ހުސައިން ވަހީދު ވިދާޅުވި އެވެ.
ކަމިޝަނަަރު އޮފް ޕޮލިސްގެ މަގާމުގައި ހުސައިން ވަހީދު ހުންނަވައިގެން އެކެއް ފެބްރުއަރީގައި ނެރުނު ފަދަ އަމުރެއް ތަންފީޒުކުރަން ޖެހުނު ނަމަ އެ މަސައްކަތް އެގޮތަށް ކުރައްވާނަންތޯ ސުވާލު ދެންނެވުމުން އޭނާ ވިދާޅުވީ އެ އަމުރުގައި ބަލަން ޖެހޭ ބައިވަރު ކަންކަން ހުރި ކަމަށާއި އޮޅުންފިލުވަން ހުރި ކަންކަން އޮޅުން ނުފިލުވާ އަވަސް އަރުވާލައިގެން އެ އަމުރު ތަންފީޒު ކުރައްވަން މަސައްކަތް ނުކުރައްވާނެ ކަމަށެވެ.
"އެ އަމުރުގެ ސަބަބުން ދިވެހިން ވެއްޓަށް އައިސްދާނެ ނުތަނަވަސްކަމާއި ނުރައްކާތެރިކަމަށް ބަލައި އެ އަމުރު ތަންފީޒު ކުރުމުގެ ކުރިން މަޝްވަރާ ކުރަން ޖެހޭ ފަރާތްތަކާއި މަޝްވަރާ ކުރަންޖެހޭ." ހުސައިން ވިދާޅުވި އެވެ.
މިހާރު ހައުސިން މިނިސްޓްރީގެ ސްޓޭޓް މިނިސްޓަރުކަން ކުރައްވަމުން ގެންދަވާ ހުސައިން ވިދާޅުވީ "އެ އަމުރު އޭރު އޮތްގޮތަށް އޮތް ނަމަ އެ އަމުރު ތަންފީޒު ކުރަން ފަސޭހަ ނުވާނެ" ކަމަށާއި "އެފަދަ އަމުރަކަށް އަމަލު ނުކުރެވޭނެ" ކަމަށެވެ.
އޭނާ ވިދާޅުވީ ފުލުހުންގެ އަސާސީ ބޭނުމަކީ އަމާންކަން ދެމެހެއްޓުމާއި ސުލްހަ މަސަލަސްކަން ގާއިމު ކުރުން ކަމަށެވެ. އަދި އެ އަމުރުގެ ސަބަބުން "އަމަން އަމާންކަމާއި ސުލްހަ މަސަލަސްކަން ގެއްލޭ" ކަމަށް ވިދާޅުވި އެވެ.
"އެފަދަ ހާލަތްތަކުގައި ސުޕްރީމްކޯޓާއި އެބަޖެހޭ އިތުރަށް ވާހަކަ ދައްކަން. އެޓާނީ ޖެނެރަލްގެ މަޝްވަރާ ވެސް ހޯދަން ޖެހޭ. ޕީޖީއާ ޕޮލިސްގެ އެގްޒެކްޓްިވް ލެވެލްގައި އެބަޖެހޭ މަޝްވަރާކުރަން. އަދި ހަމަ އެހެންމެ ރައީސުލްޖުމުހުރިއްޔާގެ ސަމާލުކަމަށް އެކަންކަން ގެނެސް ކަންކަން ކުރިއަށް ގެންދާނެ ގޮތުގެ މަޝްވަރާ ވެސް ހޯދަން ޖެހޭ." ހުސައިން ވިދާޅުވި އެވެ.