ތާޖުއްދީން ސްކޫލު ތެރެއަށް ބަޔަކު ވަދެ މާރާމާރީ ހިންގައިފި އެވެ.
ފުލުހުން ބުނީ ތަޖުއްދީން ސްކޫލު ތެރެއަށް ބަޔަކު ވަދެ މާރާމާރީ ހިންގި މައްސަލަ ފުުލުހުންނަށް ހުށަހެޅީ މިއަދު މެންދުރު 12:36 އެހާކަންހާއިރު ކަމަށެވެ.
މާރާމާރި ހިންގި މީހުން މިހާރު ހައްޔަރުކޮށްފައިވާ ކަމަށް ފުލުހުން ބުންޏެވެ. ނަމަވެސް އެ މާރާމާރީގައި ބައިވެރިވީ ކިތައް މީހުން ކަމެއް ފުލުހުން ނުބުނެ އެވެ.
މާރާމާރީގައި ދަރިވަރަކަށް އަނިޔާވި ކަމަށާއި އެ ކުއްޖާއަށް އައިޖީއެމްއެޗްގައި ފަރުވާދެމުން އަންނަ ކަމަށް ވެސް ފުލުހުން ބުނެ އެވެ.
އެނގިފައިވާ ގޮތުގައި މާރާމާރީގައި ޒަހަމްވެފައި ވަނީ ގްރޭޑް 10ގައި ކިޔަވަމުން އަންނަ ކުއްޖަކަށެވެ. އެ ކުއްޖާގެ ބޮލަށް ތޫނު އެއްޗަކުން ހަމަލާދީފައިވާ ކަމަށް އެނގިފައިވެ އެވެ.
އައިޖީއެމްއެޗްގެ ޑިރެކްޓަރު ޕަބްލިކް ރިލޭޝަންސް އަހުމަދު މައުސޫމް ވިދާޅުވީ މާރާމާރީގައި ޒަހަމްވި ކުއްޖާ އަށް އެމަޖެންސީގައި ފަރުވާދިނުމަށް ފަހު ދޫކޮށްލާފައިވާ ކަމަށެވެ. އެކުއްޖާގެ ބޯ ފަޅައިގެން ގޮސްފައިވާތަން ފެހުމަށް ފަހު މިހާރު ގެއަށް ދޫކޮށްލާފައިވާ ކަމަށާއި ސީރިއަސް އެއްވެސް ޒަހަމެއް ނުލިބޭ ކަމަށް މައުސޫމް ވިދާޅުވި އެވެ.
މިދިޔަ އަހަރުގެ ތެރޭ ވެސް ތަޖުއްދީން ސްކޫލުގައި ވަނީ މާރާމާރީއެއް ހިންގައިފަ އެވެ. އެ މާރާމާރީ ހިނގީ އެ ސްކޫލްގެ ގްރޭޑް އަށެއް އަދި ނުވައެއްގައި ކިޔަވަމުން ދިޔަ ކުދިންތަކެއްގެ މެދުގަ އެވެ. އެ މާރާމާރީގައި އެއްވެސް ކުއްޖަކަށް ސީރިއަސް އަނިޔާތަކެއް ނުވެ އެވެ.