ޗެލްސީއަށް ކުޅެމުންދާ ފްރާންސްގެ މިޑްފީލްޑަރު އެންގޯލޯ ކަންޓޭ ހޯދުމަށް ފްރާންސްގެ ކްލަބު ޕީއެސްޖީން މަސައްކަތް ކުރަމުންދާކަމަށް އެގައުމުގެ މީޑިއާތައް ބުނެފިއެވެ.
ފްރާންސްގެ ރިޕޯޓުތައް ބުނާގޮތުން ޕީއެސްޖީން ކަންޓޭގެ ސޮއި ހޯދަން ބޭނުންވަނީ އަންނަ ހޫނު މޫސުމުގެ ޓްރާންސްފާގައެވެ.
ޕީއެސްޖީގެ މެދުތެރެއިން މިހާރު އާއްމުކޮށް ފެންނަ ކުޅުންތެރިންނަކީ ރެބިއޮޓްގެ އިތުރުން މާކޯ ވެރާޓީ އަދި ތިއެގޯ މޯޓާއެވެ. ތިއޭގޯ މޯޓާގެ އުމުރުން މިހާރު 35 އަހަރު ވެފައިވާއިރު، ފްރާންސްގެ މީޑިއާ ރިޕޯޓްތައް ބުނެފައިވަނީ ޕީއެސްޖީން ކަންޓޭ ބޭނުންވަނީ ތިއޭގޯ މޯޓާގެ ބަދަލުގައެވެ.
ޕީއެސްޖީން ކަންޓޭ ހޯދުމަށް މަސައްކަތް ކުރާކަމުގެ ވާހަކަތައް ފެތުރިފައިވަނީ އެ ކްލަބުގެ ސްޕޯޓިންގް ޑިރެކްޓަރު އެންޓޭރޯ ހެންރިކޭ ކަންޓޭގެ އެޖެންޓާއެކު ސިއްރު ބައްދަލުވުމެއް ބޭއްވުމުން ކަމަށް ބެލެވެއެވެ.
ޗެލްސީއާއެކު ކަންޓޭ ވެފައިވާ ކޮންޓްރެކްޓް ހަމަވާނީ 2021 ވަނަ އަހަރުގެ ނިޔަލަށެވެ. އޭގެ ކުރިން ޗެލްސީން ކަންޓޭ ދޫކޮށްލާނެ ކަމަށް ނުބެލެވޭއިރު، އޭނާ ގެންދަން ބޭނުންވާނަމަ ޕީއެސްޖީން ބޮޑު ހުށަހެޅުމެއް ހުށައަޅަން މަޖުބޫރުވާނެއެވެ. ނަމަވެސް ދުނިޔޭގެ އެންމެ އަގުބޮޑު ކުޅުންތެރިޔާގެ ގޮތުގައި ޕީއެސްޖީއަށް ދިޔަ ނޭމާގެ ޓްރާންސްފާއާއެކު އެ ކްލަބުން އިތުރު ހަރަދެއް ކޮށްފިނަމަ ފީފާގެ ފައިނޭންޝިއަލް އުސޫލުތަކުގެ ބޭރުން ހަރަދުކުރެވުން ގާތެވެ.
ކަންޓޭއަކީ 2016 ވަަނައަހަރު ލެސްޓާއިން އިނގިރޭސި ލީގު އުފުލާލި ސީޒަންގައިވެސް މުހިއްމު ރޯލެއް އަދާކުރި ކުޅުންތެރިއެކެވެ. ނިމިދޔަ ސީޒަންގައި ޗެލްސީން ލީގު އުފުލާލިއިރު، ކަންޓޭވަނީ އެ ސީޒަންގެ އެންމެ މޮޅު ކުޅުންތެރިޔާގެ މަގާމުވެސް ހޯދާފައެވެ. މީގެ އިތުރުންވެސް ކަންޓޭވަނީ ފީފާއިން ހޮވި 2017 ވަނަ އަހަރުގެ އެންމެ މޮޅު ކުޅުންތެރިންގެ ލިސްޓްގެ ނުވަވަނައިގައި ހިމެނި، ބެލޮންޑިއޯ 2017 ގެ އަށްވަނަ މަގާމުވެސް ހޯދާފައެވެ.