ލ. ކަލައިދޫގައި ކުޑަ އަންހެން ކުއްޖަކު ރޭޕްކުރުމަށްފަހު އެ ކުއްޖާ ބްލެކް މެއިލް ކުރި މައްސަލައެއް ފެންމަތި ވެއްޖެއެވެ.
އެ ހާދިސާގެ މައުލޫމާތު އެނގޭ މީހަކު 'ސަން' އަށް ކިޔައިދިން ގޮތުގައި ރޭޕްކޮށްފައިވަނީ 18 އަހަރުން ދަށުގެ ކުއްޖެކެވެ.
"ހާދިސާ ހިނގާފައިވަނީ ދެ މީހުން އެކުގައި ސައިކަލް ދުއްވާލަން އިސްދޫ އަށް ދިއުމަށްފަހު އެނބުރި އައިމަގުމަތީ ދެ ރަށް ދޭތެރޭގައި އޮންނަ ބޮޑު ވަލުތެރޭގައި މަޑުކުރުމަށްފަހު،" އޭނާ ކިޔައިދިނެވެ.
ރޭޕް ކުރުމަށްފަހު އަންހެން ކުއްޖާގެ 'ބަރަހަނާ' ފޮޓޯ ނަގައި މީހަކު ކައިރީ އެ އަމަލުގެ ވާހަކަ ބެނެފި ނަމަ ފޮޓޯ ލީކް ކޮށްލާނެ ކަމަށް ބުނެ ފިރިހެން މިހާ އެ ކުއްޖާ ބްލެކް މެއިލް ކުރި ކަމަށް އެ މައުލޫމާތު އެނގޭ މީހަކު "ސަން" އަށް ކިޔައިދިނެވެ.
ނަމަވެސް އަންހެން ކުއްޖާ ވަނީ އެ ވާހަކަ އާއިލާ މީހުން ކައިރީ ބުނެ ފުލުހުންނަށް ރިޕޯޓްކޮށްފައެވެ.
ފުލުހުންގެ މީޑިއާ އޮފިޝަލަކު ވިދާޅުވީ އަންހެން ކުއްޖަކު ބްލެކް މެއިލް ކުރި ކަމުގެ ތުހުމަތުގައި ފިރިހެނަކު ހައްޔަރުކޮށްފައިވާ ކަމަށާއި އެމީހާގެ ބަންދަށް ކަލައިދޫ ކޯޓުން 15 ދުވަސް ޖަހައިދީފައިވާ ކަމަށެވެ.
ދާދި ފަހުން މާލޭގައި ވެސް ވަނީ އުމުރުން 19 އަހަރުގެ އަންހެނަކު ރޭޕް ކުރި ކަމުގެ ތުހުމަތުގައި މީހަކު ހައްޔަރުކޮށްފައެވެ. އަދި އޭނާގެ ބަންދަށް ވެސް 15 ދުވަސް ކޯޓުން ވަނީ ޖަހައިފައެވެ.