ރިސޯޓުތަކަށް އަމާޒުކޮށްގެން އެއްލައްކަ ރުފިޔާގެ ޓެލެޑްރާމާ މުބާރާތެއް ގޯ ޕްލަސް އިން ބޭއްވުމަށް ނިންމައިފި އެވެ.
މުބާރާތް އިންތިޒާމު ކުރާ ގޯ ޕްލަސް އިން ބުނީ، މުބާރާތުގައި ބައިވެރިވުމުގެ ފުރުސަތު ހުޅުވާލާފައިވާ ކަމަށާއި މުބާރާތުގެ އެއް ވަނަ، ދެ ވަނަ އަދި ތިން ވަނައަށް ހޮވޭ ރިސޯޓްތަކަށް 100،000 ރުފިޔާގެ އިނާމެއް ލިބޭނެ ކަމަށެވެ.
މި މުބާރާތުގައި ރާއްޖޭގައި ހިންގާ ކޮންމެ ރިސޯޓަކަށް ވެސް ބައިވެރިވެވޭނެ ކަމަށް ގޯ ޕަލްސް އިން ބުންޏެވެ. އަދި މުބާރާތުގެ މަގްސަދަކީ ރާއްޖޭގައި ހިންގާ ރިސޯޓްތަކާއި ޓުއަރިސްޓް ހޮޓާތަކުގެ މެދުގައި އެކުވެރިކަން އާލާކޮށް އެތަންތަނުގައި މަސައްކަތްކުރާ މުވައްޒަފުންގެ ހުނަރާއި ފަންނު ދައްކާލުމަށް މަގުފަހި ކޮށްދިނުން ކަމަށް ވެސް ބުންޏެވެ.
ޑްރާމާއެއްގެ ދިގު މިނަކީ، ކުރުވެގެން 20 މިނެޓް އަދި ދިގުވެގެން 45 މިނެޓް ކަމަށް ގޯ ޕަލަސް އިން ބުންޏެވެ. އަދި މުބާރާތުގައި ބައިވެރި ކުރާ ޑްރާމާއެއްގެ އެކްޓަރުންގެ ގޮތުގައި ފެންނަން ވާނީ އެ ރިސޯޓެއްގެ ނުވަތަ ޓުއަރިސްޓް ހޮޓަލެއްގައި މަސައްކަތްކުރާ މުވައްޒަފުން ކަމަށް މުބާރާތުގެ ގަވާއިދު ބުނެ އެވެ. ނަމަވެސް ކެމެރާމަނުންނާއި ޓެކްނީޝަނުން އަދި ވާހަކައާއި ބެކް މިއުޒިކްގެ މަސައްކަތުގައި އެހެން ފަރާތްތައް ބައިވެރި ކުރެވިދާނެ ކަމަށް ވެސް މުބާރާތުގެ ގަވާއިދު ބުނެ އެވެ.