ކޮރަލް ބުލިވާޑް ޑިވެލޮޕްމަންޓް ޕްރައިވެޓް ލިމިޓެޑްއިން ރަސްފަންނު ސަރަހައްދުގައި 500 އަށް ވުރެ ގިނަ އެޕާޓްމަންޓްހިމެނޭ ގޮތަށް 3 ޓަވަރު އިމާރާތް ކުރުމުގެ މަސައްކަތް ފަށައިފި އެވެ.
އެ ކުންފުނިން ބުނީ، އެ ޓަވަރުތަކުގައި ހިމެނޭ އެޕާޓްމަންޓްތަކުގެ ތެރޭގައި 1 ކޮޓަރީގެ އެޕާޓްމަންޓްތަކުން ފެށިގެން 4 ކޮޓަރީގެ އެޕާޓްމަންޓް އަދި ފަސް ކޮޓަރީގެ 'ސްކައި ވިލާ' ވެސް ހިމެނޭ ކަމަށެވެ.
ކޮރަލް ބުލިވާޑް އިން ވަނީ މިދިޔަ ޑިސެމްބަރު މަހުގެ 23ގައި އެ ޕްރޮޖެކްޓްއާ ގުޅޭ މަޢުލޫމާތު ދިނުމަށް ހޮޓެލް ޖެންގައި މަޢުލޫމާތު ސެޝަންއެއް ބާއްވައިފަ އެވެ. އެ ސެޝަންގައި އެޕާޓްމަންޓްތަކުގެ އިތުރުން ޓަވާތަކުގައި ހިމެނޭ ގިނަގުނަ ވަސީލަތްތަކާ ގުޅޭ މަޢުލޫމާތު އެފަރާތުން ވަނީ ހިއްސާ ކޮށްފަ އެވެ.
ކޮރަލް ބުލިވާޑް އިން ބުނީ، އެ ފަދަ ދެވަނަ ސެޝަންއެއް މިމަހުގެ 13 ވަނަ ދުވަހު ބޭއްވުމަށް ތައްޔާރުވަމުން އަންނަ ކަމަށެވެ. އެ ސެޝަންގައި ބައިވެރިވާން ބޭނުންވާ ފަރާތްތަކުން 7378888, 7385555, 7961588 ގުޅައިގެން ނަން ނޯޓުކުރަން ޖެހޭނެ ކަމަށް ވެސް އެ ކުންފުނިން ބުންޏެވެ.
ކޮރަލް ބުލިވާޑް ޑިވެލޮޕްމަންޓް ޕްރައިވެޓް ލިމިޓެޑް އަކީ ސިންގަޕޫރުގެ ޗަންގް ހުއާ ކޮންސްޓްރަކްޝަންގެ ދަށުން ހިނގާ ކުންފުންޏެކެވެ. ޗަންގް ހުއާ ކޮންސްޓްރަކްޝަން އިން ރާއްޖޭގައި ކުރިއަށް ގެންދާ ޕްރޮޖެކްޓްތަކުގެ ތެރޭގައި އައިޖީއެމްއެޗް ނޭޝަނަލް ޑައިގްނޯސްޓިކް ސެންޓަރ އާއި އދ. އަތޮޅުގައި ތަރައްގީ ކުރަމުން އަންނަ ރެޑިސަން ބްލޫ ރިޒޯޓް މޯލްޑިވްސް ހިމެނެ އެވެ.
ކޮރަލް ބުލިވާޑް ޑިވެލޮޕްމަންޓްއިން އެޅުމަށް ހަމަޖެހިފައިވާ ޓަވަރުތަކަކީ ގިނަ އަދަދެއްގެ ފެސިލިޓީސްތަކާ އެކު މާލޭގައި ތަރައްގީ ކުރާ އެންމެ ބޮޑު ޕްރޮޖެކްޓެވެ.