ނިމިގެންދިޔަ އަށް ވަނަ ދިވެހި ފިލްމު އެވޯޑްސް ވެގެންދިޔައީ ދިވެހި ފިލްމީ ދާއިރާގައި، "ބިރުކުޑަ އަލީ"ގެ ނަމުން މަޝްހޫރުކަން ހޯދި އަހްމަދު ނިމާލަށް ވަރަށް ޚާއްޞަ އެވޯޑް ހަފްލާއަކަށެވެ. ސަބަބަކީ، އެދާއިރާއިން އޭނާ ދެކެން އެންމެ ބޭނުންވާ ދުވަސް ފެނުނީތީއެވެ.
ދަރިންނަކީ މައިންބަފައިންގެ ލޮލުގެ ނޫރޭ ބުނެ މިސާލު ޖަހަނީ ސަބަބެއް ނެތިއެއް ނޫނެވެ. ތިމާ އަމިއްލައަށް ހާސިލްކުރާން ބޭނުންވާ، އަދި ހާސިލް ނުކުރެވި ހުރި ކަންކަން ތިމާގެ ދަރީންނަށް ހާސިލް ކުރެވިއްޖެ ނަމަވެސް، މައިންބަފައިން ގަބޫލުކުރަނީ އެއީ އެމީހުންގެ އަމިއްލަ ނަފުސަށް ލިބޭ ކާމިޔާބެއް ކަމަށެވެ. ތިމާގެ ލޮލުގެ ފެނުމާ ދަރީންނާ އެއްފަދަ ކުރެވެނީ މިފަދަ އެތަށް ސަބަބުތަކާ ހުރެއެވެ.
ދިވެހި ފިލްމީ ދާއިރާއަށް ގިނަ ޚިދުމަތްތަކެއް ކޮށްދީފައިވާ، އަހްމަދު ނިމާލް، ނުވަތަ ގިނަބަޔަކު ދަންނަ "ބިރުކުޑަ އަލީ"ގެ ދަރިފުޅު މުހައްމަދު ޖުމައްޔިލް ނިމާލް ވަނީ މިފަހަރުގެ ފިލްމު އެވޯޑުގައި، އަލަށް މިދާއިރާއަށް ތައާރަފްވާ ތަރީންނަށް ދޭ "ނިއުކަމަރ" އެވޯޑް ހާސިލްކޮށްފައެވެ. އެ އެވޯޑް ލިބުނީ އޭނާ، މިދާއިރާއަށް ތައާރަފްވި ފިލްމު "އަނިޔާ"ގައި ދެއްކި މޮޅު އެކްޓްގެ ސަބަބުންނެވެ.
ނިމާލް ބުނީ، އޭނާގެ ދަރިފުޅު ޖުމައްޔިލް ހޯދި ކާމިޔާބީއަށް ފަޚްރުވެރިވާކަމަށް ބުނެފައި -- ފޭސްބުކް ފޮޓޯ: ނިމާލް
ޖުމައްޔިލް އަދި އެވަރުން ނިންމާލީކީ ނޫނެވެ. ދިވެހި ފިލްމީ ދާއިރާގެ މަޝްހޫރު ތަރީން ކަމަށްވާ އަލީ ސީޒަން، އިބްރާހީމް ޖިހާދު އަދި ފިލްމީ ދާއިރާގައި ގިނަ ދުވަސްތަކެއް ހޭދަކޮށްފައިވާ ހަސަން މަނިކާ ވާދަކޮށް، އަހަރުގެ އެންމެ މޮޅު ބަޠަލުގެ މަގާމުވެސް ޖުމައްޔިލް ހޯދިއެވެ. އޭނާއަށް އެ އެވޯޑް ލިބުނީ ޑާކް ރެއިން އެންޓަޓެއިންމަންޓުގެ "ވާށޭ މަށާއެކީ"ގައި ދެއްކި މޮޅު އެކްޓުގެ ސަބަބުންނެވެ.
ޓީވީއެމްގެ "ސަޅިބައިސާ"އިން ބެލުންތެރީންގެ މަގުބޫލުކަން ހޯދި ނިމާލް ނުވަތަ "ބިރުކުޑަ އަލީ" ވަނީ އޭނާގެ ދަރިފުޅު ޖުމައްޔިލްގެ ކާމިޔާބީ ވަރަށް އުފަލާއެކު ފާހަގަކޮށްފައެވެ. ނިމާލް ބުނީ، އޭނާ ހިނގި މަގުން ހިނގައި، އޭނާގެ ދަރިފުޅު ފިލްމީ ދާއިރާގައި މިފަދަ ކާމިޔާބެއް ހޯދުމަކީ ބުނެދޭންވެސް ނޭނގޭހާ ބޮޑު އުފަލެއް ލިބުނު ކަމެއް ކަމަށެވެ.
"ބައްޕައަކު އެންމެ އުފާވާނީ ބައްޕަ ކުރަމުން ދިޔަ މަސައްކަތް، ފިރިހެން ދަރިއަކު އެ މަސައްކަތް ފޮލޯކުރުމުން. އަދި އެކަމުން ރީތި ނަމެއް ހޯދުމުން،" ދިވެހި ފިލްމު "އޮއްސުނު އިރާއެކު"ގައި އަދާކުރި ނުބައިބައި ރޯލުން، 2008 ވަނަ އަހަރުގެ ގާނިއަރ މިއަދު ކްރިސްޓަލް އެވޯޑްގައި އެންމެ މޮޅު ވިލަންގެ އެވޯޑް ހާސިލްކުރި ނިމާލް ބުންޏެވެ.
"މިރޭ މިއީ އަހަރެން އެގޮތުން އެންމެ އުފާވިރޭ. މަރުހަބާ ޖުމައްޔިލް ތިހޯދި ކާމިޔާބަށް. އަށް ވަނަ ދިވެހި ފިލްމު އެވޯޑްގެ ބެސްޓް ނިއުކަމަރ އަދި ބެސްޓް އެކްޓަރ."
އަށްވަނަ ދިވެހި ފިލްމު އެވޯޑްސް ހަފްލާގެ ތެރޭން---ސަން ފޮޓޯ/ މުހައްމަދު އަފްރާހް
އެވޯޑް އުފުލާލުމަށް ފަހު ޝުކުރު އަދާކުރަން ލިބުނު، ފުރުސަތުގައި، އަސަރުން ފުރިފައި ހުރި ބައްޕައާ ދިމާއަށް ބަލަހައްޓައިގެން ހުރެ ޝުކުރު އަދާކުރަމުން ޖުމައްޔިލް ބުނީ، "އަޅުގަނޑު މިރޭ މިތާ ހުރީ އަޅުގަނޑަކީ އަހްމަދު ނިމާލްގެ ދަރިފުޅަށް ވީތީ،" ކަމަށެވެ.
ދިވެހި ފިލްމީ ދާއިރާއަށް ނިމާލް ނުކުތީ 1984 ވަނަ އަހަރުއެވެ. އޭނާގެ ފުރަތަމަ ފިލްމަކީ، "ނުފޫޒް" އެވެ. އެއަށްފަހު އޭނާ ވަނީ، ސިޓީ، ސަބަބު، އިރުއޮއްސުމުން، ވާލޯބި އެނގޭނަމަ، ޔޫސުފް، އަދި ލޯތްބަށްކައި ފަދަ ފިލްމުތަކުން ފެނިފައެވެ.
ދިވެހި ފިލްމު "ވާލޯބި އެނގޭނަމަ"އިން ފަސް ވަނަ ގައުމީ ފިލްމު އެވޯޑްގެ އެންމެ މޮޅު ޑައިރެކްޓަރުގެ އެވޯޑް ހޯދި ނިމާލްގެ އެންމެ ފާހަގަކޮށްލެވޭ މަސައްކަތަކީ އޭނާ ޑައިރެކްޓްކޮށް، ލީޑު ރޯލުކުޅުނު "ސިޓީ"އެވެ.