ޒިމްބާބުވޭގެ ކުރީގެ ރައީސް ރޮބާޓް މުގާބޭ ވެރިކަމުން އިސްތިއުފާ ދެއްވުމަށްފަހު ގައުމުން ބޭރަށް ކުރައްވާ ފުރަތަމަ ދަތުރުފުޅުފައި ސިންގަޕޫރަށް ފުރާ ވަޑައިގެންފިއެވެ.
ޒިމްބާބުވޭގައި 37 އަހަރުވަންދެން ވެރިކަން ކުރެއްވި މުގާބޭގެ ވެރިކަމުގެ ދުވަސްވަރު އޭނާ ވަނީ ސިންގަޕޫރަށާއި އެހެނިހެން ގައުމުތަކަށް ބޭސްފަރުވާގެ އަގުބޮޑު ދަތުރުތައް ކުރައްވައިފައެވެ. މިފަހަރުވެސް ސިންގަޕޫރަށް ވަޑައިގަންނަވަނީ ބޭސްފަރުވާ އަށެވެ.
ސިންގަޕޫރަށް ވަޑައިގަތުމުގެ ކުރިން މެލޭޝިއާގައި މަޑުކުރައްވާނެ ކަމަށާއި، އެއީ މެލޭޝިއާގައި ދިރިއުޅުއްވާ މުގާބޭގެ ދަރިކަނބަލުންނަށް ދެވަނަ ދަރިކަލަކު ލިބިވަޑަައިގަންނަވާތީ ދަރިކަނބަލުންގެ ހާލު ބެއްލެވުމަށްކަމަށް ހަބަރުތައް ބުނެއެވެ.
މުގާބޭގެ ސެކިއުރިޓީއާ ހަވާލުވެ ހުރި އޮފިޝަލަކު ވިދާޅުވީ، މުގާބޭ ސިންގަޕޫރަށް ވަޑައިގަންނަވަނީ ސިއްހީ ކަމެއްގައި ކަމަށެވެ.
"ޗެކްއަޕެއް ހަދަން ޖެހިފަ އޮތީ. ނަމަވެސް ކަންތައް ދިޔަގޮތުން ދަތުރު ލަސްކޮށްލަން ޖެހުނީ،"
ޒިމްބާބުވޭގެ ނޫހަކުން ރިޕޯޓްކޮށްފައިވާ ގޮތުގައި މުގާބޭ ދަތުރު ކުރައްވަނީ އެއާ ޒިމްބާބުވޭގެ ފްލައިޓެއްގައެވެ. މުގާބޭ ގައުމުން ބޭރަށް ވަޑައިގެންނެވުމާ ގުޅިގެން، ޒިމްބާބުވޭގެ ޒަނޫ ޕީއެފް އިން އެގައުމުގެ މިހާރުގެ ރައީސް އެމާސަން އަށް އަންނަ އަހަރުގެ ރިޔާސީ ކެނޑިޑޭޓުކަން ދިނުމަށް ބާއްވާ ކޮންގްރެސްގައި ބައިވެރިވެ ވަޑައިގަތުމުގެ ފުރުސަތު ގެއްލޭނެއެވެ.
ޒިމްބާބުވޭގެ ގާނޫނުތައް ބުނާގޮތުން އެގައުމުގައި ކުރިން ރައީސްކަން ކުރައްވާފައި ތިއްބަވާ ބޭފުޅުންނަށް ކޮންމެ އަހަރަކުވެސް ވަކި މިންވަރަކަށް ބޭސްފަރުވާ ކުރުމަށާއި ގައުމުން ބޭރަށް ކުރައްވާ ދަތުރުތަކަށް ސަރުކާރުން ހަރަދު ދޭނެއެވެ.