ހަރާރޭ (ސެޕްޓެމްބަރު 29): ޒިމްބާބުވޭގެ ކުރީގެ ރައީސް ރޮބަޓް މުގާބޭގެ އުފަންއަވަށުގައި އޭނާގެ ހަށިކޮޅު އިއްޔެ ފަސްދާނުލައިފި އެވެ.
ޒިމްބާބުވޭގެ ޒުވިމްބާ ޑިސްޓުރިކްޓުގައި އޮންނަ ކުޓަމާގައި މުގާބޭގެ ހަށިކޮޅު ފަސްދާނުލީ މުގާބޭގެ ޖަނާޒާއާ ބެހޭ ގޮތުން އޭނާގެ އާއިލާ އާއި ސަރުކާރާ ދެމެދު ދެބަސްވުންތައް އުފެދިފައިވާތާ ތިން ހަފްތާ ފަހުންނެވެ.
މުގާބޭގެ އާއިލާގެ މެމްބަރުން ބުނި ގޮތުގައި މިމަހުގެ ހަޔެއްގައި މުގާބޭ އަވަހާރަވުމުގެ ކުރިން އޭނާ ވަނީ އޭނާގެ ޖަނާޒާ ކުރިއަށްގެންދާނެ ގޮތާ ބެހޭ އިރުޝާދުތައް ދެއްވައިފަ އެވެ. އެގޮތުން އޭނާގެ ވެރިކަން ވައްޓާލި މީހުން ޖަނާޒާގައި ބައިވެރިވެގެން ނުވާނެ ކަމަށާއި އޭނާ ފަސްދާނުލާން ޖެހޭނީ އުފަން އަވަށުގައި ކަމަށް ވިދާޅުވެފަ އެވެ.
ނަމަވެސް ޒިމްބާބުވޭގެ ރައީސް އެމާސަން މަނަންގާގުވާ ވަނީ މުގާބޭއަކީ "ގައުމީ ބަތަލެއް"ގެ ގޮތުގައި ސިފަ ކުރައްވައިފަ އެވެ. އަދި އޭނާ ފަސްދާނުލާނީ ގައުމުގެ ވެރިރަށުގައި އޮންނަ "ނެޝަނަލް ހީރޯސް އޭކާ"ގައި ކަމަށް ވިދާޅުވެފަ އެވެ.
މުގާބޭގެ އަނބިކަނބަލުން ގްރޭސް އިއްޔެ ބޭއްވި ޖަނާޒާގައި -- ފޮޓޯ: ރޮއިޓާސް
އޭގެ ސަބަބުން ސަރުކާރާއި މުގާބޭގެ އާއިލާއާ ދެމެދު ދެބަސްވުންތަކާ ބެހޭ ގޮތުން ދެފަރާތުން ވާހަކަ ދައްކައި، މިދިޔަ ބުރާސްފަތި ދުވަހު މަނަންގާގުވާ ވަނީ އާއިލާގެ ނިންމުމަށް އިހުތިރާމު ކުރާނެ ކަމަށް ވިދާޅުވެފަ އެވެ.
އިއްޔެގެ ޖަނާޒާ ކުރިއަށްދިޔަ ވަގުތު ގިނަ އަދަދެއްގެ މީހުން ހިތާމަ ފާޅު ކުރުމަށް އެސަރަހައްދަށް އެއްވި އެވެ. ނަމަވެސް މުގާބޭގެ އާއިލާގެ މެމްބަރުންގެ ހާޒިރުގައި އޭނާގެ ހަށިކޮޅު ފަސްދާނުލި ވަގުތު އިތުރު ބަޔަކަށް އެސަރަހައްދަށް ވަނުމަށް ހުއްދަ ދީފައި ނުވެ އެވެ.
އަދި ރައީސް މަނަންގާގުވާ އާއި މިނިސްޓަރުން ވެސް ޖަނާޒާއަށް ވަޑައިނުގަންނަވަ އެވެ. މީގެ ކުރިން މި މަހުގެ 17ގައި މުގާބޭއަށް ގައުމީ ފެންވަރުގައި ޖަނާޒާއެއް ބާއްވާފައިވެ އެވެ.
ނަވާރަސަތޭކަ އަށްޑިހައިގައި ޒިމްބާބުވޭއަށް މިނިވަންކަން ލިބުނު ފަހުން ހަތް އަހަރުވަންދެން މުގާބޭ އެގައުމުގެ ބޮޑުވަޒީރުކަން ކުރެއްވި އެވެ. އަދި އޭގެ ފަހުން 30 އަހަރުވަންދެން ރައީސްކަން ކުރެއްވި އެވެ.
މީގެ ދެ އަހަރު ކުރިން މުގާބޭ ވެރިކަމުން އިސްތިއުފާ ދެއްވީ އެގައުމުގެ އަސްކަރިއްޔާއިން ބަޣާވާތެއްކޮށް، މުގާބޭއާއި އޭނާގެ އަނބިކަނބަލުން ގޭ ބަންދުގައި ބައިތިއްބައިގެން ތިބޭތާ ހަފްތާއެއް ފަހުން، 21 ނޮވެމްބަރު 2017 ގަ އެވެ. އެ ބަޣާވާތް ކުރީ އޭރު ނައިބު ރައީސްކަމުގައި ހުންނެވި މަނަންގާގުވާ އެ މަގާމުން ދުރުކުރުމުންނެވެ. އަދި އެމަގާމަށް ދެން އައްޔަން ކުރާނީ އަނބިކަނބަލުން ގްރޭސްކަމަށް ހަބަރު ފެތުރުމުންނެވެ.
އޭގެ ފަހުން މުގާބޭގެ ޒަނޫ ޕީއެފް ޕާޓީން އެޕާޓީގެ ލީޑަރު ކަމުން މުގާބޭ ދުރުކޮށް އެމަގާމަށް މަނަންގާގުވާ ގެނަ އެވެ. އަދި ބަޣާވާތަށް ފަހު މަނަންގާގުވާ ވެރިކަމާ ހަވާލުވީ އެވެ.
މުގާބޭގެ އާއިލާގެ މެމްބަރުން ބުނި ގޮތުގައި ބަޣާވާތަށް ފަހު މުގާބޭ އާއި މަނަންގާގުވާގެ ގުޅުން ގޯސްވި އެވެ.
މުގާބޭ އަވަހާރަވީ ސިންގަޕޫރުގެ ހޮސްޕިޓަލެއްގައި ފަރުވާ ހޯއްދަވަމުން ގެންދަވާތާ މަސްތަކެއްވީ ފަހުންނެވެ. އޭނާ އަވަހާރަވީ ކޮން އާލާސްކަންފުޅެއްގެ ސަބަބުން ކަމެއް އާއިލާއިން ހާމަނުކުރެ އެވެ.