ހަރޭރޭ (26 ނޮވެމްބަރު) : ޒިމްބާބުވޭގެ ކުރީގެ ރައީސް ރޮބަޓް މުގާބޭ ވެރިކަން ދޫކޮށްލެއްވުމުން އެމަނިކުފާނަށް 10 މިލިއަން ޑޮލަރު ދޭ ގޮތަށް ހަމަޖައްސައިފި އެވެ.
އޭގެ އިތުރުން ފުރިހަމަ މުސާރައާއި ސިއްހީ ފަރުވާ އާއި ސެކިޔުރިޓީ ވެސް މުގާބޭ އަށްދޭ ގޮތަށް ޒިމްބާބުވޭގެ ސަރުކާރުން ވަނީ ހަމަޖައްސައިފަ އެވެ.
މުގާބޭ އިސްތިއުފާ ދެއްވީ އެ ގައުމުގެ އަސްކަރިއްޔާ އިން ގެނައި ބަޣާވާތަކަށް ފަހު އަސްކަރީ ޖެނެރެލުންނާ ދެމެދު ހަފްތާއެއް ވަންދެން ކުރިއަށް ގެންދިޔަ ވާހަކަތަކަކަށް ފަހު އެކަން ކާމިޔާބު ނުވުމުން ޒިމްބާބުވޭގެ ޕާލިމަންޓުން މުގާބޭ ވެރިކަމުން ދުރުކުރުމަށް މަސައްކަތް ކުރަމުން ދަނިކޮށެވެ.
މުގާބޭ ވެރިކަން ދޫކޮށްލުމުން ފައިސާގެ ބޮޑު އަދަދެއް ހުށަހެޅި އިރު އެމަނިކުފާނަށް ދައުވާ ނުކުރެވޭނެ ގޮތް ވެސް ވަނީ ޒިމްބާބުވޭގެ ސަރުކާރުން ހަދައިފަ އެވެ.
"ޒިމްބާބުވޭ ސަރުކާރުން މުގާބޭއަށް ފަސް މިލިއަން ޑޮލަރު ވަނީ ދިނުމަށް ހަމަޖެހިފައި. ބާކީ ބައި ދޭނީ އިންސްޓޯލްމަންޓަށް ބަހައިލައިގެން. މުގާބޭ ހުރިހާ ސިއްހީ ފަރުވާއެއް ވެސް ސަރުކާރުން ބަލަހައްޓާނެ. އެމަނުކުފާނަށް ލިބޭނެ މަހު މުސާރަ ވެސް. މަރުވުމަށް ފަހު އޭނާގެ މުސާރައިގެ ދެބައިކުޅަ އެއްބައި މުސާރަ އޭނާގެ އަންހެނުންނަށް ލިބޭނެ،" ޒިމްބާބުވޭގެ އޮފިޝަލު ބުންޏެވެ.
ބަޣާވާތުން ވެރިކަން ވައްޓާލި ނަމަވެސް ޒިމްބާބުވޭގެ ކޯޓުން މިހާރު ވަނީ އެއީ ބާޣާވާތެއް ނޫން ކަމަށް ކަނޑައަޅައިފަ އެވެ.