ގޯލްޑަން ފުޓްސަލް އެސޯސިއޭޝަނުން އިންތިޒާމްކޮށްގެން ބާއްވާ ގޯލްޑަން ފުޓްސަލް ޗެލެންޖްގެ އެންމެ ފަހުގެ ޗެމްޕިއަން އަދި މިއަހަރުގެ ގޯލްޑަން ފުޓްސަލް ޝީލްޑް ކާމިޔާބުކުރި ތ. ތިމަރަފުށި ބަލިކޮށް، ހެންވޭރުން ފައިނަލުގެ ޖާގައެއް ހޯދައިފި އެވެ.
މާފަންނު ސްޓޭޑިއަމް ވެލިދަނޑުގައި ރޭ ކުޅުނު ސެމީގެ މެޗުގައި ތިމަރަފުށީގެ މައްޗަށް ހެންވޭރުން ކުރި ހޯދާފައި ވަނީ 1-0 ލަނޑުގެ ނަތީޖާއަކުންނެވެ.
ރޭ ކުޅުނު އެ މެޗުގައި ދެ ޓީމުގެ ފަރާތުން ވެސް ވަރަށް ވާދަވެރި ކުޅުމެއް ފެނިގެންދިޔައެވެ. އެ މެޗުގައި ފެނިގެންދިޔަ ހަމައެކަނި ލަނޑު ކާމިޔާބުކޮށްފައި ވަނީ ހެންވޭރުގެ މުހައްމަދު ރިއްފަތެވެ. މެޗުގެ މޮޅު ކުޅުންތެރިޔާގެ މަގާމަށް ވެސް ހޮވުނީ އޭނާ އެވެ.
އެ މުބާރާތުގެ ފައިނަލުގައި ހެންވޭރު ނުކުންނަން ޖެހޭނީ ސ. ފޭދޫއާ ދެކޮޅަށެވެ. މިދިޔަ އަހަރުގެ ފައިނަލުގައި ވެސް ވާދަކުރި ފޭދޫން މިއަހަރުގެ މުބާރާތުގެ ފައިނަލުގެ ޖާގައެއް ހޯދީ ރޭ ކުޅުނު ސެމީގެ މެޗުގައި މ. މަޑުއްވަރީގެ މައްޗަށް ކުރި ހޯދައިގެންނެވެ. މިއަހަރުގެ ފައިނަލުގައި ފޭދޫ އާއި ހެންވޭރު ނުކުންނާނީ މާދަމާ ހަވީރު 4:00ގައެވެ.
މިއަހަރު އެ މުބާރާތުގެ ޗެމްޕިއަން އަދި ރަނަރަޕް ޓީމަށް ދޭ ފައިސާގެ އިނާމަށް ވަނީ ބޮޑެތި ބަދަލުތަކެއް ގެނެސްފައެވެ. މިދިޔަ އަހަރު ޗެމްޕިއަން ޓީމަށް 50،000 ރުފިޔާގެ ފައިސާގެ އިނާމެއް ދިން ނަމަވެސް، މިއަހަރު ޗެމްޕިއަން ޓީމަށް ހުށަހަޅާފައި ވަނީ 65،000 ރުފިޔާގެ ފައިސާގެ އިނާމެކެވެ. މިދިޔަ އަހަރު ރަނަރަޕް ޓީމަށް 15،000 ރުފިޔާގެ ފައިސާގެ އިނާމެއް ދިން ނަމަވެސް، މިއަހަރު ރަނަރަޕް ޓީމަށް ހުށަހަޅާފައި ވަނީ 25،000 ރުފިޔާގެ ފައިސާގެ އިނާމެކެވެ.
މި އަހަރުގެ ގޯލްޑަން ފުޓްސަލް ޗެލެންޖްގެ ޓައިޓަލް ސްޕޮންސަރަކީ ސޮނީ ސްޕޯޓްސް އެވެ. އަދި އޮންލައިން މީޑިއާ ޕާޓްނަރަކީ ސަން އޮންލައިނެވެ. މިދިޔަ އަހަރެކޭ އެއްގޮތަށް މިއަހަރު ވެސް އެ މުބާރާތުގައި 50 ޓީމެއް ވާދަކުރެ އެވެ.