ގޯލްޑަން ފުޓްސަލް އެސޯސިއޭޝަނުން އިންތިޒާމް ކޮށްގެން ކުރިއަށްގެންދާ ގޯލްޑަން ފުޓްސަލް ޗެލެންޖްގެ ޒޯން އަށެއްގެ ފުރަތަމަ މެޗުތައް ހެންވޭރާއި މައްޗަންގޮޅިން ކާމިޔާބު ކޮށްފި އެވެ.
މާފަންނު ސްޓޭޑިއަމް ވެލި ދަނޑުގައި ރޭ ކުޅުނު ޒޯން އަށެއްގެ އެއް މެޗުގައި ހެންވޭރާއި މާފަންނު ބައްދަލުކުރި އިރު، އަނެއް މެޗުގައި ބައްދަލުކުރީ މަންޗަންގޮޅި އާއި ގަލޮޅެވެ.
ޒޯން އަށެއްގައި ރޭ މާފަންނު އަތުން ހެންވޭރު މޮޅުވެފައި ވަނީ 2-1 ލަނޑުގެ ނަތީޖާ އަކުންނެވެ. އެ މެޗުގައި ހެންވޭރުގެ ލަނޑުތައް ކާމިޔާބު ކޮށްދިނީ މެޗުގެ މޮޅު ކުޅުންތެރިޔާގެ މަގާމަށް ހޮވުނު މުހައްމަދު ރިއްފަތާއި އަހްމަދު ޝިމްހާނެވެ. މާފަންނުގެ ހަމައެކަނި ލަނޑު އެ ޓީމަށް ކާމިޔާބު ކޮށްދިނީ މުހައްމަދު ޔަފީއު އެވެ.
ޒޯން އަށެއްގައި ރޭ ގަލޮޅު އަތުން މައްޗަންގޮޅި މޮޅުވީ 3-4 ލަނޑުގެ ނަތީޖާ އަކުންނެވެ. އެ މެޗުގައި މައްޗަންގޮޅިން ކާމިޔާބުކުރި ހަތަރު ލަނޑުގެ ތެރެއިން ދެ ލަނޑު ޝާހު ކާމިޔާބު ކޮށްދިން އިރު، ސުފިޔާން އާއި ހަސަން ރަޝީދު ވެސް ލަނޑެއް ކާމިޔާބު ކޮށްދިނެވެ. މެޗުގައި ގަލޮޅުން ކާމިޔާބުކުރި ދެ ލަނޑު ވެސް އެ ޓީމަށް ޖަހައިދިނީ އައްމަޑޭ އެވެ.
އެ މުބާރާތުގެ ޒޯން ބުރުގެ މެޗުތައް މިރޭ ވެސް ކުޅުމަށް ހަމަޖެހިފައިވާ އިރު، އެ ބުރުގައި ވާދަކުރަނީ އަތޮޅު ބުރުގެ ޗެމްޕިއަން ޓީމުތަކެވެ. ޒޯން ބުރުގެ ޗެމްޕިއަންކަން ހޯދާ ޓީމުތަކަށް ފައިނަލް ބުރުން ޖާގަ ލިބޭނެ އެވެ.
ޒޯން ބުރުގައި ވާދަކުރާ ޓީމުތައް:
- ޒޯން އެކެއް - ހއ. ވަށަވަރު، ހދ. ކުމުންދޫ، ށ. ބިލެއްފަހި.
- ޒޯން ދޭއް - ނ. ކެނދިކުޅުދޫ، ރ. އިނގުރައިދޫ، ބ. ތުޅާދޫ.
- ޒޯން ތިނެއް - ކ. ގާފަރު، އއ. ފެރިދޫ.
- ޒޯން ހަތަރެއް – އދ. ކުނބުރުދޫ، މ. މަޑުއްވަރީ.
- ޒޯން ފަހެއް – ފ. ނިލަންދޫ، ދ. މާއެނބޫދޫ، ތ. ތިމަރަފުށި.
- ޒޯން ހައެއް – ލ. ގަން، ގއ. ނިލަންދޫ، ގދ. ތިނަދޫ.
- ޒޯން އަށެއް – ހެންވޭރު، މާފަންނު، ގަލޮޅު، މައްޗަންގޮޅި.
މިއަހަރު އެ މުބާރާތުގެ ޗެމްޕިއަން އަދި ރަނަރަޕް ޓީމަށް ދޭ ފައިސާގެ އިނާމަށް ވަނީ ބޮޑެތި ބަދަލުތަކެއް ގެނެސްފައެވެ. މިދިޔަ އަހަރު ޗެމްޕިއަން ޓީމަށް 50،000 ރުފިޔާގެ ފައިސާގެ އިނާމެއް ދިން ނަމަވެސް، މިއަހަރު ޗެމްޕިއަން ޓީމަށް ހުށަހަޅާފައި ވަނީ 65،000 ރުފިޔާގެ ފައިސާގެ އިނާމެކެވެ. މިދިޔަ އަހަރު ރަނަރަޕް ޓީމަށް 15،000 ރުފިޔާގެ ފައިސާގެ އިނާމެއް ދިން ނަމަވެސް، މިއަހަރު ރަނަރަޕް ޓީމަށް ހުށަހަޅާފައި ވަނީ 25،000 ރުފިޔާގެ ފައިސާގެ އިނާމެކެވެ.
މިއަހަރުގެ ގޯލްޑަން ފުޓްސަލް ޗެލެންޖްގެ ޓައިޓަލް ސްޕޮންސަރަކީ ސޮނީ ސްޕޯޓްސް އެވެ. އަދި އޮންލައިން މީޑިއާ ޕާޓްނަރަކީ ސަން އޮންލައިނެވެ. މިދިޔަ އަހަރެކޭ އެއްގޮތަށް މިއަހަރު ވެސް އެ މުބާރާތުގައި 50 ޓީމެއް ވާދަކުރެ އެވެ.