އިންޑިއާގައި ކުރިއަށްދާ 17 އަހަރުން ދަށުގެ ވޯލްޑް ކަޕްގެ ފައިނަލަށް އިނގިރޭސި ވިލާތާއި ސްޕެއިން ދަތުރު ކޮށްފި އެވެ.
މިއަދު ކުޅުނު ސެމީ ފައިނަލުގެ ފުރަތަމަ މެޗުގައި ބްރެޒިލް ބަލިކޮށް އިނގިރޭސިން ފައިނަލުގެ ޖާގައެއް ހޯދި އިރު، ސްޕެއިން އިން ފައިނަލުގެ ޖާގައެއް ހޯދީ ސެމީގެ ދެ ވަނަ މެޗުގައި އެންމެ ފަހުގެ ރަނަރަޕް މާލީ ބަލިކޮށްގެންނެވެ.
ކަލްކަތާގެ ސޯލްޓް ލޭކް ސްޓޭޑިއަމްގައި މިއަދު ކުޅުނު ސެމީގެ ފުރަތަމަ މެޗުގައި ބްރެޒިލް އަތުން އިނގިރޭސީން މޮޅުވީ 3-1 ލަނޑުގެ ނަތީޖާ އަކުންނެވެ. މެޗުގައި އިނގިރޭސި ޓީމުން ކާމިޔާބުކުރި ތިން ލަނޑު ވެސް އެ ޓީމަށް ޖަހައިދިނީ ރިއާން ބްރޫސްޓާ އެވެ. ބްރެޒިލްގެ ހަމައެކަނި ލަނޑު ކާމިޔާބު ކޮށްދިނީ ވެސްލީ އެވެ.
ނިއު މުމްބާއީގެ ޑީވައި ޕަޓިލް ސްޓޭޑިއަމްގައި ކުޅުނު ސެމީގެ ދެ ވަނަ މެޗުގައި މާލީގެ މައްޗަށް ސްޕެއިން އިން ކުރި ހޯދީ 3-1 ލަނޑުގެ ނަތީޖާ އަކުންނެވެ. އެ މެޗުގައި ސްޕެއިން އިން ކާމިޔާބުކުރި ތިން ލަނޑުގެ ތެރެއިން ފުރަތަމަ ދެ ލަނޑު އަބެލް ރުއިޒް ޖަހައިދިން އިރު، އެ ޓީމުގެ ފަހު ލަނޑު ކާމިޔާބު ކޮށްދިނީ ފެރާން ޓޮރޭސް އެވެ. މާލީގެ ހަމައެކަނި ލަނޑު ކާމިޔާބު ކޮށްދިނީ ލަސާނާ އެންޑިއާޔޭ އެވެ.
އެ މުބާރާތުގެ ފައިނަލްގައި އިނގިރޭސީންނާއި ސްޕެއިން ބައްދަލުކުރާ މެޗު ކުޅުމަށް ހަމަޖެހިފައި ވަނީ އަންނަ ހޮނިހިރު ދުވަހު އެވެ. ފައިނަލް މެޗުގެ ކުރިން ހަމަ އެ ދުވަހު ބްރެޒިލް އާއި މާލީ، ތިން ވަނަ ހޮވާ މެޗަށް ނުކުންނާނެ އެވެ. އެ ދެ މެޗު ވެސް ކުޅުމަށް ހަމަޖެހިފައި ވަނީ ކަލްކަތާގެ ސޯލްޓް ލޭކް ސްޓޭޑިއަމްގައެވެ.