ސަރުކާރުން ހުށައަޅާފައިވާ ސަޕްލިމެންޓްރީ ބަޖެޓުގައި ހުރީ މިހާރުން މިހާރަށް ވެސް ރައްޔިތުންނަށް މުހިއްމުވާނެ ކަންކަން ކަމަށާއި އެހެން ކަމުން ކޮންމެހެންވެސް ބަޖެޓް ފާސްކުރަން ޖެހޭ ކަމަށް މަޖިލީހުގައި ސަރުކާރު ކޯލިޝަން ތަންސީލުކޮށްދޭ މެމްބަރުން ވިދާޅުވެއްޖެ އެވެ.
މި އަހަރުގެ ތިން ވަނަ ދައުރުގެ ހަތަރު ވަނަ ޖަލްސާގައި ސަރުކާރުން ހުށައަޅާފައިވާ ސަޕްލިމެންޓްރީ ބަޖެޓުގައި ހުރި ކަންކަމަށް ބަހުސް ކުރުމަށް ހުޅުވާލި ފުރުސަތުގައި ވާހަކަފުޅު ދައްކަވަމުން ސަރުކާރު ކޯލިޝަންގެ މެމްބަރުން ވަނީ އެފަދަ ބަޖެޓެއް ސަރުކާރުން މިހާރަށް މިހާރަށް މުހިންމު ކަމަށް ވިދާޅުވެފަ އެވެ.
ޕީޕީއެމްގެ ޕީޖީ ގުރޫޕްގެ ލީޑަރު އަހްމަދު ނިހާން ހުސައިން މަނިކު ވަނީ އެފަދަ ބަޖެޓެއް މުހިއްމުވާ ސަބަބަށް ވަރަށް ތަފްޞީލުކޮށް ވާހަކަފުޅު ދައްކަވައިފަ އެވެ. އޭނާ ވިދާޅުވީ ސަޕްލިމެންޓްރީ ބަޖެޓެއް ނުދީފި ނަމަ ރައްޔިތުންނަށް ފޯރުކޮށްދެން ޖެހޭ ސިއްހީ ހިދުމަތާއި ތައުލީމީ ބައެއް ހިދުމަތްތަކަށް ބުރު އަރައިގެންދާނެ ކަމަށެވެ. އަދި އޭގެ އިތުރުން ޑިމޮކްރަސީ އާއި ހަރުދަނާ ގަވަނިން އަކަށް މުހިއްމުވާ ކަންކަން ކޮންމެހެން ކުރަން ޖެހޭ ކަމަށް ވިދާޅުވި އެވެ.
ބަހުސް މަރުހަލާގައި ވާހަކަފުޅު ދައްކަވަމުން ޕީޕީއެމްގެ ޑެޕިއުޓީ ޕީޖީ ލީޑަރު ރިޔާޒް ރަޝީދު ވިދާޅުވީ މާޒިވެ ދިޔަތަނަށް ބަލާއިރު އެންމެ ދަރަނި ކުޑަ ބަޖެޓެއް ފެނިގެންދާނީ މި އަހަރުގެ ބަޖެޓުގައި ކަމަށެވެ. އަދި އެކަމަކީ ރައްޔިތުންނަށް އުފާވެރި ހަބަރެއްކަމަށް ވެސް ވިދާޅުވި އެވެ.
ރިޔާޒް ވިދާޅުވީ ސަޕްލިމެންތްރީ ބަޖެޓެއް ހުށައެޅުމުން ދޭހަކޮށްދެނީ ރާއްޖޭގެ އިގްތިސާދުކުރިއަށްދާ މިންވަރު ކަމަށާއި އެކަމުން ފައިދާ ވާނީ ދިވެހިންނަށް ކަމަށެވެ. އަދި ސަޕްލިމެންޓްރީ ބަޖެޓުގައި ހުރި ކަންކަން ފާސްވެގެން ދިޔުމުން އެކަމުގެ ސަބަބުން ސަރުކާރުން ކުރަން ހުރި ކަންކަމަށް ފަސޭހަ ވެގެންދާނެ ކަމަށް ވިދާޅުވި އެވެ.
ހަތަރު ސަތޭކަ ނުވަދިހަ ތިން މިލިއަން ރުފިޔާގެ ސަޕްލިމެންޓްރީ ބަޖެޓުގެ ބަހުސް މަރުހަލާ އިދިކޮޅު އިއްތިހާދުގެ މެމްބަރުން ބޮއިކޮޓް ކުރި އިރު ބަހުސް މަރުހަލާގައި ސަރުކާރު ކޯލިޝަންގެ 14 މެމްބަރަކު ވަނީ ވަހަކަފުޅު ދައްކަވައިފަ އެވެ.