ޔޫރަޕުގައި ކުޅޭ 21 އަހަރުން ދަށުގެ ކުޅުންތެރިންގެ ތެރެއިން އެންމެ މޮޅު ކުޅުންތެރިޔާއަށް ދޭ ޝަރަފުވެރި “ގޯލްޑަން ބޯއީ އެވޯޑް" ފްރާންސް އަދި ޕީއެސްޖީގެ ޒުވާން ފޯވާޑް ކިލިއަން އެމްބާޕޭ ކާމިޔާބު ކޮށްފިއެވެ.
އެމްބާޕޭ މި އަހަރު މި އެވޯޑް ހާސިލް ކުރީ ބާސެލޯނާގެ އޮސްމާން ޑެމްބެލޭ، މެންޗެސްޓާ ސިޓީގެ ގެބްރިއަލް ޖީސަސް، ޔުނައިޓެޑްގެ މާކަސް ރެޝްފޯޑު ފަދަ ކުޅުންތެރިންނާ ވާދަކޮށެވެ.
ދުނިޔޭގެ އެކި ހިސާބުތަކުން ކުޅިވަރުގެ ޖާނަލިސްޓުން ވޯޓު ދޭ މި އެވޯޑްގެ ނަތީޖާ އިޓަލީގެ ޓުޓޯސްޕޯޓް ނޫހުން ހޯމަ ދުވަހު ހާމަކޮށްފައިވާއިރު، އެމްބާޕޭއަށް ލިބުނީ 291 ވޯޓެވެ. ޑެމްބެލޭއަށް 149 ވޯޓު ލިބުނުއިރު، ރަޝްފޯޑަށް ލިބުނީ 76 ވޯޓެވެ.
މިދިޔަ ސީޒަނުގައި މޮނާކޯއަށް މޮޅު ކުޅުމެއް ދެއްކުމަށް ފަހު މި ސީޒަނުގައި ޕީއެސްޖީއަށް ބަދަލުވި އުމުރުން 18 އަހަރުގެ އެމްބާޕޭ ވަނީ މިހާތަނަށް ޕީއެސްޖީއަށް ކުޅެދިން 11 މެޗުން ހަތަރު ލަނޑު ކާމިޔާބު ކޮށްދީފައެވެ.
ލޯނު އެއްބަސްވުމެއްގެ ދަށުން ޕީއެސްޖީއާ ގުޅުނު އެމްބާޕޭ މޮނާކޯއާ އެކު ވެފައިވާ އެ އެއްބަސްވުމުގައިވާ ގޮތުން، މި ސީޒަން ނިމުމުން 180 މިލިއަންގެ އަގަކަށް ދާއިމީ ކޮންޓްރެކްޓެއްގެ ދަށުން ޕީއެސްޖީއަށް އޭނާ ގެންދެވޭނެ އެވެ.