ދުނިޔޭގެ އެންމެ ބޮޑު ބޮޑީބިލްޑިންގ މުބާރާތް ކަމަށްވާ ވޯލްޑް ބޮޑީބިލްޑިންގ އެންޑް ފިޒީކް ސްޕޯޓްސް ޗެމްޕިއަންޝިޕް މުބާރާތުގައި ވާދަކުރުމަށް 2016 ވަނަ އަހަރުގެ މިސްޓަރ މޯލްޑިވްސް މުހައްމަދު ރަޝީދު (ރަޗޭ) މޮންގޯލިއާއަށް ގޮސްފިއެވެ.
އެ މުބާރާތުގައި ވާދަކުރުމަށް ރަޗޭގެ އިތުރުން ދެ ބޮޑީބިލްޑަރުން ހިމެނޭ ރާއްޖޭގެ ޓީމު ފުރާފައިވަނީ މިދިޔަ ބުރާސްފަތި ދުވަހުއެވެ.
ރަޗޭއަކީ ރާއްޖޭގެ އެންމެ ޝަރަފްވެރި ބޮޑީ ބިލްޑިންގ މުބާރާތް ކަމަށްވާ ބޭޑް ލެބް މިސްޓަރ މޯލްޑިވްސް 2016، 2014 އަދި 2007ގެ ފަހުރުވެރި އެއްވަނައެވެ.
މޮންގޯލިއާގައި ހުރެ 'ސަން ސްޕޯޓްސް'އަށް ދިން އިންޓަވިއުއެއްގައި ރަޗޭ ބުނީ މިފަހަރުގެ މުބާރާތުގައި ވާދަކުރުމަށް އައީ ރާއްޖެއަށް ރީތި ނަން ހޯދައިދިނުމުގެ ފުރިހަމަ އުންމީދުގައި ކަމަށެވެ. އަދި ބުނީ މުޅި ޓީމު ވެސް ތައްޔާރުވެފައިވަނީ އެފަދަ ވަނައެއް ހޯދަން ކަމަށާއި ޒުވާނުންނަށް އެފަދަ ފުރުސަތުތައް ހޯދައިދޭ ކަމަށްޓަކައި ބޮޑީ ބިލްޑިންގ ފެޑެރޭޝަނަށް އަދި ރާއްޖޭގެ ކުޅިވަރާބެހޭ ވުޒާރާއަށް ޝުކުރު އަދާކުރާ ކަމަށެވެ.
ރާއްޖޭގެ ޒުވާނުން އަދި ބޮޑީ ބިލްޑަރުންގެ ތެރޭގައި މަޝްހޫރު ޖިމް ދަ ހެމާ އިން ޒުވާނުންނަށް ފަހިކޮށްދެމުންދާ ފުރުސަތުތަކަށް ވެސް ރަޗޭ ވަނީ ޝުކުރު އަދާކޮށްފައެވެ.
"މިއީ ވަރަށް އުނދަގުލުން ނޫނީ ނުލިބޭ ފުރުސަތެއް. ހެމާއަށް ވަރަށް ބޮޑަށް ޝުކުރު އަދާކުރަން. ހެމާގެ މެނޭޖްމަންޓުން، ހާއްސަކޮށް ޗެއާމަން އަހްމަދު މުއާޒްގެ ވަރަށް މުހިއްމު އިސްނެންގެވުމެއް މިއީ،" ވޭތުވެދިޔަ ދެ އަހަރު ވެސް މިސްޓަރ މޯލްޑިވްސް ހޯދި ޖިމްގެ އެހީ ފާހަގަކޮށް ރަޗޭ ބުންޏެވެ.
ރަޗޭ ބުނީ، ރައީސް އަބްދުﷲ ޔާމީންގެ ސަރުކާރުން ޒުވާނުންނަށް ހާއްސަކޮށް ބޮޑީ ބިލްޑިންގ ފަދަ ކުޅިވަރުތަކަށް ދެއްވަމުން ގެންދަވާ އެއްބާރުލުން ފާހަގަ ކުރާ ކަމަށެވެ. އެގޮތުން ދާދި ފަހުން ބޭއްވި ބައިނަލްއަގުވާމީ ބޮޑީ ބިލްޑިންގ މުބާރާތްތަކުގައި ރާއްޖޭގެ އެތުލީޓުންނަށް ލިބެމުންދާ ފުރުސަތުތައް ރަޗޭ ވަނީ ފާހަގަކޮށްފައެވެ.
މި މަހުގެ 9 އިން 3ގެ ނިޔަލަށް ކުރިއަށްގެންދާ އެ މުބާރާތުގައި 134 ގައުމަކުން 400 ބޮޑީ ބިލްޑަރުން ބައިވެރިވެއެވެ. އަދި އެ ބޮޑީ ބިލްޑަރުން މުބާރަތުގައި 42 ކެޓަގަރީއަކުން ވާދަކުރާނެއެވެ.