ޗެރިޓީ އިވެންޓެއްގައި ރެއާލް މެޑްރިޑްގެ ތަރި ކްރިސްޓިއާނޯ ރޮނާލްޑޯ އޭނާ އަށް ލިބިފައިވާ ހަތަރު ބެލަންޑިއޯގެ ތެރެއިން އަސްލާ އެއްގޮތް ބެލަންޑިއޯއެއް 600،000 ޕައުންޑަށް ވިއްކާލައިފި އެވެ.
ތަކެތި ނީލަން ކިއުމަށް ބޭއްވި އިންވެންޓުގައި ލިބުނު ހުރިހާ ފައިސާއެއް ވެސް ހަދިޔާ ކުރުމަށް ހަމަޖެހިފައި ވަނީ "މޭކް އަ ވިޝް" ޗެރިޓީ އަށެވެ. މި ޖަމިއްޔާ އަކީ ފުރާނައަށް ނުރައްކާވާ ފަދަ ބަލި ޖެހިފައި ތިބި ކުދިންގެ އެންމެ ފަހުގެ އެދުން ފުރިހަމަ ކޮށްދޭ ޖަމިއްޔާއެކެވެ.
ރޮނާލްޑޯ އޭނާގެ އެންމެ ފުރަތަމަ ބެލަންޑިއޯ ހޯދާފައި ވަނީ 2008 ވަނަ އަހަރު މެންޗެސްޓާ ޔުނައިޓެޑަށް ކުޅެމުންނެވެ. އޭގެ ފަހުން އޭނާ ވަނީ ރެއާލް އަށް ބަދަލުވެ 2013 ވަނަ އަހަރާއި 2014 ވަނަ އަހަރުގެ އިތުރުން 2016 ވަނަ އަހަރު މި އެވޯޑު ހާސިލްކޮށްފަ އެވެ.
މާކާ އިން ރިޕޯޓު ކޮށްފައިވާ ގޮތުގައި މި ބެލަންޑިއޯ އަކީ ރޮނާލްޑޯ އެދިގެން ހަދާފައިވާ އޭގެ އަސްލާ އެއްގޮތް އެވޯޑެކެވެ. ނަމަވެސް މި އިވެންޓުގައި ރޮނާލްޑޯ ފެނިގެން ގޮސްފައި ނުވާއިރު، މެންޗެސްޓާ ޔުނައިޓެޑްގެ ކޯޗު ހޯޒޭ މޮރީނިއޯ އާއި މެންޗެސްޓާ ސިޓީގެ ކޯޗު ޕެޕް ގާޑިއޯލާ ވަނީ އިވެންޓުން ފެނިގެން ގޮސްފަ އެވެ.
އުމުރުން 32 އަހަރުގެ ރޮނާލްޑޯ ވަނީ މީގެ ކުރިން ވެސް އެކިކަހަލަ ޗެރިޓީ އިވެންޓުތަކުގައި ފައިސާ ހަދިޔާކޮށްފަ އެވެ. މީގެ އިތުރުން 2015 ވަނަ އަހަރު ހޮވި އެންމެ ދީލަތި އެތްލީޓުގެ މަގާމު ވެސް ރޮނާލްޑޯ އަށް ވަނީ ލިބިފަ އެވެ.