އިދިކޮޅު ކޯލިޝަނުން ރިޔާސީ އިންތިހާބުގައި ވާދަކުރާނެ ކެންޑިޑޭޓަކު ހޯދާ ހޯދައިވެސް ނުފެނުނު ކަމަށް ޕީޕީއެމްގެ ނައިބު ރައީސް އަދި ލ. ފޮނަދޫ ދާއިރާގެ މަޖިލިސް މެމްބަރު އަބްދުއްރަހީމް އަބްދުﷲ (އަދުރޭ) ވިދާޅުވެއްޖެ އެވެ.
ރޭ ޕީޕީއެމްގެ ރުމާލު 2 ޖަގަހައިގައި ބޭއްވި ޖަލްސާގައި ވާހަކަފުޅު ދައްކަވަމުން އަދުރޭ ވިދާޅުވީ، އިދިކޮޅުގައި ތިބެގެން ވެރިކަމަށް އަންނަން މަސައްކަތް ކުރާ އެންމެންގެ ހަގީގަތް ރައްޔިތުންނަށް އެނގޭ ކަމަށެވެ.
"މިރާއްޖޭގެ ވެރިކަމަށް އަންނަން އިދިކޮޅުގައި ތިބެގެން މަސައްކަތް ކުރަމުންދާ ހުރިހާ ބޭފުޅުންގެ ހަގީގަތް ދިވެހި ރައްޔިތުންނަށް ވަރަށް ރަނގަޅަށް އެނގިވަޑައިގަންނަވާ. ތަޖުރިބާ ނުކުރާ އެއް ބޭފުޅަކުވެސް އެތާކު ނެތް،" އަދުރޭ ވިދާޅުވި އެވެ.
ކުރީގެ ރައީސް މައުމޫން އަބްދުލް ގައްޔޫމަށް ނިސްބަތްވާ ގޮތަށް އަދުރޭ ވިދާޅުވީ، ވެރިކަމަށް އަންނަން މަސައްކަތް ކުރާ އެއްބޭފުޅަކު އުމުރުން ދުވަސްވުމުގެ ސަބަބުން ވެރިކަން ކުރަން އުޒުރުވެރިވެ ވަޑައިގަންނަވާ ކަމަށެވެ.
އޭނާގެ ވާހަކަފުޅުގައި، ކުރީގެ ރައީސް މައުމޫނުގެ ވެރިކަމުގައި އޭނާއަށް ނުހައްގުން އަދަބު ދީފައިވާ ކަމަށް ވިދާޅުވި އެވެ.
"ތިން މަހާ އަށާރަ ދުވަހު ޖަލުގަ ބޭއްވީ. އެއް އަހަރާ ދެ މަސްދުވަހު ގޭ ބަންދުގަ ބެހެއްޓީ. 12 އަހަރާއި ފަސް މަސް ދުވަހަށް އަރުވާލީ. ކޮބާތޯ އަނިޔާއަކީ؟ ކޮބާތޯ އިންސާފަކީ؟،" އަދުރޭ ވިދާޅުވި އެވެ.
އަދުރޭ ވިދާޅުވީ، "ފުލުސް ކޯޓު" ކިޔާ ތަނަކަށް ގެންގޮސް 12 އަހަރާއި ފަސް މަސް ދުވަހަށް އަރުވާލުމަށް ހުކުމްކުރި ކަމަށެވެ.
"އޭރުގަ ހުރި ފުލުސް ކޯޓު ކިޔާ ތަނަކަށް ގެންގޮސް ބުނީ މީނާގެ މައްޗަށް ދައުލަތުން ދައުވާ ކުރަނީ މިހެން މިހެން ވެގެންނޭ. އިއްވި ބަޔާނެއް ނެތް، ގަޒިއްޔާ ނަމްބަރެއް ނެތް. ބުނީ 12 އަހަރާ ފަސް މަސް ދުވަހަށް އަރުވާލުމަށް ހުކުމްކޮށްފީމޭ،" އަދުރޭ ވިދާޅުވި އެވެ.
އޭނާ ވިދާޅުވީ، މިއަދު ނުކުމެ ކިޔޭނެ އިންސާފެއް ނޯންނާނެ ކަމަށާއި، މައުމޫންގެ ސަރުކާރުގެ އަނިޔާވެރިކަން އެނގޭ ކަމަށެވެ.
"އަޅުގަނޑުމެންގެ ކައިރީގަ ކިޔޭނެ އިންސާފެއް ނޯންނާނެ. އަޅުގަނޑުމެންނަށް ދެ ފުށް އެނގޭ. އެ ސަރުކާރުގެ އަނިޔާވެރިކަންވެސް އަޅުގަނޑަށް އެނގޭ،" އަދުރޭ ވިދާޅުވި އެވެ.
އެ ޖަލްސާގައި ގދ. މަޑަވެލި ދާއިރާގެ މަޖިލިސް މެމްބަރު މުއާޒު މުހައްމަދު ރަޝީދު ވިދާޅުވީ، މަޖިލީހުގެ ތެރެއިން ސަރުކާރަށް އެއްބާރުލުން ދޭން ޖެހޭ ކަމަށެވެ. އަދި އެކަމަކީ ރައްޔިތުން އެދޭ ކަންކަން ހާސިލް ކުރުމަށް ކޮންމެހެން މުހިއްމު ކަމެއް ކަމުގައި ވިދާޅުވި އެވެ.