އެމްއެމްއޭގެ ކުރީގެ ގަވަރުނަރު ޑރ. ފަޒީލް ނަޖީބަށް ފޮރިން މިނިސްޓްރީގެ ސްޓޭޓް މިނިސްޓަރުކަން ދެއްވައިފި އެވެ.
ރައީސް އޮފީހުން ބުނީ އެ މަގާމަށް ފަޒީލް އައްޔަން ކުރައްވާފައިވަނީ މިދިޔަ ބުދަ ދުވަހު ކަމަށެވެ.
ފަޒީލަކީ އިނގިރޭސިވިލާތުން އިންޓަނޭޝަނަލް ބިޒްނަސް ލޯ އިން މާސްޓާސް ޑިގްރީ ހާސިލް ކުރައްވާފައިވާ ބޭފުޅެވެކެވެ.
ފަޒީލް ވަނީ 2008 ވަނަ އަހަރުގެ އޮކްޓޯބަރު މަހުގެ 22 ވަނަ ދުވަހުން ފެށިގެން ފަސް އަހަރު ދުވަސްވަންދެން މަރުކަޒީ ބޭންކް، އެމްއެމްއޭގެ ގަވަރުނަރުކަމުގެ މަގާމު އަދާ ކުރައްވާފަ އެވެ. އޭނާ އިސްތިއުފާދެއްވީ، މިހާރުގެ ރައީސް އަބްދުﷲ ޔާމީން އަބްދުލް ގައްޔޫމްގެ ވެރިކަމުގައި، 2013 ވަނަ އަހަރުގެ ޑިސެމްބަރު މަހުގެ ތެރޭގަ އެވެ.
އިސްތިއުފާ ދެއްވުމަށްފަހު ފަޒީލް ވިދާޅުވެފައިވަނީ، އެ މަގާމުން އިސްތިއުފާދެއްވީ އަމިއްލަ ސަބަބުތަކަކަށްޓަކައި ކަަމަށެވެ. އަދި ދައުލަތުގެ މުސާރަލިބޭ މަގާމެއް ފުރުއްވަން ބޭނުންފުޅުވެ ވަޑައިނުގަންނަވާ ކަމަށްވެސް ފަޒީލް އޭރު ވަނީ ވިދާޅުވެފަ އެވެ.
އެމްއެމްއޭގެ ގަވަރުނަރުކަމުގެ މަގާމުގެ އިތުރުން ފަޒީލް އަކީ 1987 ވަނަ އަހަރުން ފެށިގެން 2004 ވަނަ އަހަރާ ހަމައަށް ޓްރޭޑް މިނިސްޓްރީގެ މަގާމުތައް ފުރުއްވި ބޭފުޅެކެވެ. އެގޮތުން އެ މިނިސްޓްރީގެ އެސިސްޓެންޓް ޑިރެކްޓަރު ކަމުގެ މަގާމާއި، ޑެޕިއުޓީ ޑިރެކްޓަރުކަމުގެ މަގާމާއި، އިންޓަނޭޝަނަލް ކޯޕަރޭޝަންގެ މަގާމުގެ އިތުރުން އިންޓަނޭޝަނަލް ކޯޕަރޭޝަންގެ ޑިރެކްޓަރު ކަމުގެ މަގާމުވެސް އޭނާ ވަނީ އަދާކުރައްވާފަ އެވެ.