ހޮޓެލިއަރ މޯލްޑިވްސް އިން އިންތިޒާމްކޮށްގެން ބާއްވާ ހޮޓެލިއަރ މޯލްޑިވްސް ވެލްނެސް ސަމިޓް 2017 ބަނޑޮސް އައިލެންޑް ރިސޯޓްގައި ކުރިޔަށްދާ ކަމަށް ހޮޓެލިއަރ މޯލްޑްޑިވްސްއިން ބުނެފިއެވެ.
ހޮޓެލިއަރ މޯލްޑިވްސް ވެލްނެސް ސަމިޓަކީ ފަތުރުވެރިކަމުގެ ދާއިރާގައި ފޯރުކޮށްދޭ ޞިއްޙީ ދުޅަހެޔޮކަމާ ގުޅުންހުރި ޚިދުމަތްތަކާ ބެހޭ ގޮތުން ރާއްޖޭގައި ބާއްވާ ފުރަތަމަ ބައްދަލުވުމެވެ.
ހޮޓެލިއަރ މޯލްޑިވްސް އިން ބުނީ، މި ބައްދަލުވުމުގެ މައިގަނޑު މަޤްޞަދަކީ، ދުނިޔޭގައި ހަލުވިކަމާއެކު ކުރިއަރަމުންދާ ޞިއްޙީ އަދި ހަށިގަނޑުގެ ދުޅަހެޔޮކަމާއި ގުޅުންހުރި ފަތުރުވެރިކަމުގެ ޚިދުމަތްތައް ރާއްޖޭގައި އިތުރަށް ފުޅާކުރުން ކަމަށެވެ. މީގެ އިތުރުން މި ދާއިރާއިން ރިސޯޓްތަކަށް އިތުރަށް ނަފާ ލިބޭނެ ގޮތްތަކާއިމެދު މަޝްވަރާކޮށް، ޚިޔާލު ބަދަލުކުރުން ކަމަށްވެސް ހޮޓެލިއަރ މޯލްޑިވްސް ބުންޏެވެ.
ހޮޓެލިއަރ މޯލްޑިވްސް އިން ބުނީ މި ބައްދަލުވުމުގައި، ވެލްނެސްގެ ދާއިރާގައި ހަރަކާތްތެރިވާ ގިނަ ފަރާތްތަކަކުން ބައިވެރިވާ ކަމަށެވެ. އޭގެ ތެރޭގައި ރިސޯޓްތަކުގެ ޖެނެރަލް މެނޭޖަރުންނާއި ހިންގުމުގެ ދާއިރާގައި ހަރަކާތްތެރިވާ އެހެނިހެން ފަރާތްތައް، އަދި ސްޕާ ހިންގާ އަދި މެނޭޖްކުރާ ފަރާތްތަކާއި، ރިސޯޓްތަކުގައި ފޯރުކޮށްދޭ ޞިއްޙީ އަދި ހަށިގަނޑުގެ ދުޅަހެޔޮކަމާއި ގުޅުންހުރި އެހެނިހެން ޚިދުމަތްތައް ފޯރުކޮށްދޭ ފަރާތްތައް ހިމެނެއެވެ. މީގެ އިތުރުން، ޞިއްޙީ އަދި ހަށިގަނޑުގެ ދުޅަހެޔޮކަމާއި ގުޅުންހުރި މުދާ ރާއްޖެއަށް އެތެރެކޮށް، މާކެޓްކުރާ ފަރާތްތައްވެސް ހިމެނޭ ކަމަށް ހޮޓެލިއަރ މޯލްޑިވްސް އިން ބުންޏެވެ.
ެއެމެރިކާގެ ރިސާޗް އިންސްޓިޓިއުޓެއް ކަމަށްވާ އެސްއާރްއައި އިންޓަރނޭޝަނަލްގެ ތަފާސް ހިސާބުތައް ދައްކާގޮތުން، ދުނިޔޭގެ ފަތުރުވެރިކަމުގެ ސިނާޢަތުގެ 6 އިންސައްތަ ހިއްސާ ކުރަނީ ވެލްނެސް ޓޫރިޒަމެވެ. އަދި، މި ދާއިރާގެ އާމްދަނީ މި އަހަރުގެ މިހާތަނަށް 489 ބިލިއަން އެމެރިކާ ޑޮލަރަށް އަރައެވެ. އަދި، މި އަހަރުގެ ނިޔަލަށް މި އަދަދު 697 ބިލިއަން އެމެރިކާ ޑޮލަރަށް އަރާނެކަމަށް އެ ފަރާތުން އަންދާޒާ ކުރެއެވެ.