މި އަހަރުގެ ހައްޖުގައި ބައިވެރިވި ގަތަރު މީހުންގެ އަދަދު، މިދިޔަ އަހަރަށް ވުރެ އިތުރު ކަމަށް މައްކާގެ ގަވަރުނަރު، އަމީރު ޚާލިދު އަލް ފައިސަލް ވިދާޅުވެއްޖެ އެވެ.
ސައުދީން އެކުލަވާލައިފައިވާ ހައްޖު ކޮމެޓީގެ ޗެއާމަންކަންވެސް ކުރައްވާ، އަމީރު ޚާލިދު ވިދާޅުވީ، މިއަހަރުގެ ހައްޖުގައި ބައިވެރިވުމަށް ސައުދީން ބޭރުން މައްކާއަށް ޒިޔާރާތްކުރި މީހުންގެ އަދަދު 1,752,014 އަރާ ކަމަށާއި އެއީ މިދިޔަ އަހަރާ އަޅާ ބަލާ އިރު 426,263 އިތުރު އަދަދެއް ކަމަށެވެ.
އަމީރު ޚާލިދު ވިދާޅުވީ، މި އަހަރު ހައްޖަށް ދިއުމަށް ގަތަރުން ރަޖިސްޓްރީވި މީހުންގެ އަދަދަކީ 1,564 ކަމަށާއި މިދިޔަ އަހަރު ރަޖިސްޓްރީވީ މީހުންގެ އަދަދަކީ 1,210 ކަމަށެވެ.
ހައްޖުގެ އަޅުކަން އަދާކުރަން މިނާއަށް ޒިޔާރަތްކުރާ ފަރާތްތަކަށް ޚިދުމަތް ފޯރުކޮށްދެއްވުމަށް އަމީރު ޚާލިދު ފައިސަލް މިނާއަށް ވަޑައިގެން ދެއްވި ޕްރެސްކޮންފަރެންސްގައި އޭނާ ވަނީ، މިފަހަރުގެ ހައްޖުގެ ކަންކަން ހަމަޖެހިފައިވާ ގޮތަށް މެދު ވަރަށް ބޮޑަށް ހިތްހަމަޖެހުން ފާޅުކުރައްވައިފަ އެވެ.
ގަތަރާ ސައޫދީ އާ ދެމެދު ޖެހިފައިވާ ސިޔާސީ މައްސަލައިގެ ސަބަބުން ކުރިން އޮތީ ގަތަރުގެ ހައްޖުވެރިންނަށް އެއްގަމުމަގުން ސައޫދީ އަށް ނުދެވޭގޮތަށެވެ. އަދި ވައިގެ މަގުން ވެސް ގަތަރުގެ ހައްޖުވެރިންނަށް ގަތަރުން ސައޫދީއަށް ސީދާ ގޮތެއްގައި ނުދެވޭ ގޮތަށެވެ. ނަމަވެސް ސައޫދީ ސަރުކާރުން ފަހުން ވަނީ މިކަން ބަދަލުކޮށް ގަތަރުގެ ރައްޔިތުންނަށް ހައްޖަށް ދިޔުމުގެ ފުރުސަތު ފަސޭހަކުރުމަށް ޓަކައި އެއްގަމު ބޯޑަރު ހުޅުވާލައި އަދި ސައޫދީ އެއާލައިން މެދުވެރިކޮށް ސީދާގޮތެއްގައި ވައިގެ މަގުން ވެސް ހައްޖަށް ދިޔުމުގެ ފުރުސަތު ހުޅުވާލައިފަ އެވެ.
ސައޫދީގެ މިނިންމުމަކީ ސިޔާސީ ނިންމުމެއްކަމަށް ގަތަރުން ބުނި ނަމަވެސް ސައޫދީން ދިން މިފުރްސަތުގެ ބޭނުންކޮށްގެން އެއްގަމުންނާއި ވައިގެ މަގުން ގަތަރުގެ ހައްޖުވެރިން ސައޫދީއަށް ދާނެކަމަށް ގަތަރުގެ ޚާރިޖީ ވަޒީރު ޝައިޚް މުހައްމަދު ބިން އަބްދުއްރަޙްމާން އާލްޘާނީ ވިދާޅުވެފައިވެ އެވެ.