ޓެނިސް އެސޯސިއޭޝަން އޮފް މޯލްޑިވްސްއިން އިންތިޒާމްކޮށްގެން ކުރިއަށްގެންދާ މެރީ ބްރައުން ޓެނިސް ޗެމްޕިއަންޝިޕްގެ ފައިނަލް މެޗުތައް މިއަދު ހަވީރު ކުޅެވޭނެ އެވެ.
މިމަހުގެ 18 ވަނަ ދުވަހު ފެށި މި މުބާރާތުގެ ސީނިއަރ އޭޖް ގްރޫޕުގެ ފައިނަލް ދެ މެޗު މިއަދު ހަވީރު 5:00 ގައި ފަށާނެއެވެ. މީގެ އިތުރުން މެންސް އޯޕަން ސިންގަލްގައި ބައްދަލު ކުރާނީ އިގްނާޒް މަންސޫރު އާއި އަހުމަދު ސާއި ވަހީދެވެ. އަދި ވުމަންސް އޯޕަން ސިންގަލް ފައިނަލުގައި ބައްދަލު ކުރާނީ މަރްޔަމް ހަޝްމާ ހާނިމް އާއި އައިޝަތު ޔަލާ ހުސައިނެވެ.
މުބާރާތުގެ ވަނަ ވަނަ އަށް އަންނަ ފަރާތްތަކަށް ތައްޓާއި އިނާމާއި ހަނދާނީ ލިޔުން ދިނުމަށް ހަމަޖެހިފައި ވަނީ މިރޭ 7:45ގައި ބާއްވާ ނިންމުމުގެ ރަސްމިއްޔާތުގައެވެ. އެ ރަސްމިއްޔާތު ޝަރަފުވެރި ކޮށްދެއްވާނީ މޯލްޑިވްސް އޮލިމްޕިކްސް ކޮމެޓީގެ ރައީސް މުހައްމަދު ޝަވީދެވެ.
މެރީ ބްރުއުންގެ އެހީތެރިކަމާއެކު ކޮންމެ އަހަރު ވެސް ކުރިއަށްގެންދާ އެ މުބާރާތުގައި މިއަހަރު އެކި އުމުރުފުރާތަކުން ޖުމްލަ 84 ކުޅުންތެރިން ވާދަކުރާނެއެވެ. އެއީ 47 ފިރިހެން ކުޅުންތެރިންނާއި 37 އަންހެން ކުޅުންތެރިންނެވެ.