ނ. މާޅެންދޫގައި އުމުރުން 11 އަހަރުގެ ފިރިހެން ކުއްޖަކު ދަންޖެހިފައި ހުއްޓާ ފެނިއްޖެ އެވެ.
ޖެންޑާ މިނިސްޓްރީން ނެރުނު ނޫސްބަޔާނެއްގައި މިއަދު ބުނީ އެ ކުއްޖާ މަރުވެފައިވާ ކަމަށް އެ މިނިސްޓްރީއަށް ރިޕޯޓު ކޮށްފައި ވަނީ މިއަދު މެންދުރުފަހު 2:15ގައި ކަމަށެވެ.
އެ މިނިސްޓްރީން ބުނީ އެ ކުއްޖާގެ މައްސަލައެއް މީގެ ކުރިން ނ. އަތޮޅުގެ ފެމިލީ އެންޑް ޗިލްޑްރެންސް ސާވިސް ސެންޓަރަށް އަދި އެ މިނިސްޓްރީއަށް ވެސް ހުށަހަޅާފައި ނުވާ ކަމަށެވެ. އަދި އެ ކުއްޖާ ދަންޖެހުނު މައްސަލަ ރިޕޯޓު ކުރުމާ ގުޅިގެން އެ މިނިސްޓްރީގެ ސޯޝަލް ސާވިސް ވޯކަރުން ފުލުހުންގެ ފެމިލީ އެންޑް ޕްރޮޓެކްޝަން ޑިޕާޓްމަންޓާއެކު މާޅެންދޫއަށް އަށް ވަނީ ދަތުރު ކުރަމުންދާ ކަމަށް އެ މިނިސްޓްރީން ބުނެ އެވެ.
ޖެންޑާ އިން ވަނީ އެ ކުއްޖާގެ އާއިލާގެ ހާލަތު ދެނެގަތުމަށާއި، އެ މައްސަލައިގެ ކަންހިނގާފައިވާ ގޮތް ސާފުކުރުމަށް ފުރިހަމަ އެއްބާރުލުން ފުލުހުންނަށް ދޭނެ ކަމުގެ ޔަގީންކަން ރައްޔިތުންނަށް ދީފަ އެވެ.
އެ މިނިސްޓްރީން ވަނީ އެފަދަ ހާދިސާތައް ތަކުރާރުވިޔަ ނުދިނުމަށް ހާއްސަ ރައްކާތެރިކަމާއި އެހީތެރިކަން ބޭނުންވާ ކުއްޖެއްގެ މައްސަލައެއް އެނގޭނަމަ ލަސްނުކޮށް ކަމާ ބެހޭ ފަރާތްތަކަށް އެންގުމަށް އިލްތިމާސްކޮށްފަ އެވެ.