ކްރިމިނަލް ކޯޓުގެ އިސް ގާޒީ އަބްދުލް ބާރީ ޔޫސުފް ޖުވެނައިލް ކޯޓަށް ބަދަލުކޮށްފި އެވެ.
ޖުޑީޝަލް ސާވިސް ކޮމިޝަނުން މިރޭ ނެރުނު ނޫސް ބަޔާނެއްގައި ބުނެފައި ވަނީ ގާޒީ ބާރީ ޖުވެނައިލް ކޯޓަށް ބަދަލުކުރަން ނިންމީ މިރޭ އެ ކޮމިޝަންގެ ޖަލްސާއަށް ހާޒިރުވެ، ވޯޓުގައި ބައިވެރިވެވަޑައިގެންނެވި މެމްބަރުންގެ އިއްތިފާގުން ކަމަށެވެ.
ގާޒީ ބާރީ ޖުވެނައިލް ކޯޓަށް ބަދަލުކޮށްފައިވާ އިރު، ކްރިމިނަލް ކޯޓުގެ ގާޒީ އަހުމަދު ޝަކީލް ވަނީ ފެމެލީ ކޯޓަށް ބަދަލުކޮށްފަ އެވެ.
ޖޭއެސްސީން ބުނީ ގާޒީ ބާރީ ޖުވެނައިލް ކޯޓަށް، އަދި ގާޒީ ޝަކީލް ފެމެލީ ކޯޓަށް ބަދަލުކޮށްދިނުމަށް އެ ކޮމިޝަންގައި އެދުނީ ސުޕްރީމް ކޯޓުން ކަމަށެވެ.
ގާޒީ ބާރީ އަކީ ގިނަ އަހަރުތަކެއް ވަންދެން ކްރިމިނަލް ކޯޓުގައި މަސައްކަތް ކުރައްވާފައިވާ ގާޒީއެކެވެ. އަދި ގާޒީ ޝަކީލަކީ މީގެކުރިން ޖުވެނައިލް ކޯޓުގައި މަސައްކަތް ކުރެއްވި ގާޒީއެކެވެ.