ދުނިޔޭގެ އެކި ކަންކޮޅުތަކުގައި ފިތުރު ޢީދުގެ މުނާސަބާ ވަރަށް ކުލަގަދަ ގޮތެއްގައި ފާހަގަ ކުރަމުން އެބަ ގެންދެއެވެ.
ދުނިޔޭގައި މުސްލިމުންގެ އާބާދީ އެންމެ ބޮޑު ގައުމުކަމަށްވާ އިންޑޮނީޝިއާގައި މުސްލިމުންވަނީ ޢީދުގެ އުފާވެރި މުނާސަބާ ވަރަށް ކުލަގަދަ ގޮތެއްގައި ފާހަގަކޮށްފައެވެ. އިންޑޮނީޝިއާގެ ރައްޔިތުން އުންމީދުކުރަނީ އެގައުމުގައި މިހާރަކަށް އައިސް ގިނަވަމުންދާ ހަމަލާތަކާއި ހަމަނުޖެހުންތަކާއި ހެދި ޢީދުގެ މުނާސަބަތު ފާހަގަކުރުމަށް އެއްވެސް ކަހަލަ ދަތިތަކަކާ ކުރިމަތި ނުވާނެކަމަށެވެ.
އެގައުމުގެ މުސްލިމުން ވަނީ އިއްޔެ ހެނދުނު ޢީދު ނަމާދުކުރުމަށް މިސްކިތްތަކާއި މަގުތަކަށް ޖަމާވެފައެވެ.
މީގެ އިތުރުން މުސްލިމުންގެ އާބާދީތައް ބޮޑެތި ގައުމުތަކުގެ ތެރެއިން އިތިއޯޕިއާ، މިސްރު އަދި މިފަދަ އެތައްކެއް ގައުމުތަކެއްގައި އެތައްހާސް މުސްލިމުންނެއް ވަނީ ބޮޑެތި މައިދާންތަކަށް ޢީދު ނަމާދުކުރުމުށް އިއްޔެ ހެނދުނު ޖަމާވެފައެވެ.
ގުދުސްގައި ހުންނަ އަލް މަސްޖިދުލް ޢަގްޞާއަށްވެސް ވަނީ ޢީދު ނަމާދުކުރުމަށް 90،000 އަށް ވުރެ ގިނަ މުސްލިމުން އިއްޔެ ޖަމާވެފައެވެ.
ރަމަޟާން މަހުގެ އަޅުކަމުން ވީއްލުމަށްފަހު މުސްލިމު އުއްމަތަށް އަންނަ ފިތުރު ޢީދަކީ އިސްލާމުންނަށް އަންނަ އުފަލާ އެކުވެރިކަން ބަދަހިކޮށް ހެދުމުގެ މުނާސަބަތެއްގެ އިތުރުން މިއީ ނާއިންސާފާ އިސްލާމްދީނުގެ އަދުއްވުންގެ ފަރާތުން ކެނޑިނޭޅި ލިބެމުންދާ ވޭނަށް ކޮށްމެސް ވަރެއްގެ ލުޔެއް ލިއްބައިދޭ ދުވަސްވަރެކެވެ.
ކުޑަ ދުވަސް ކޮޅަކަށް ނަމަވެސް މިފަދަ ކަންކަން ތަހައްމަލު ކުރަން ޖެހިފައިވާ މުސްލިމުންނަށް ދުނިޔޭގައި ހިނގަމުންދާ ނާއިންސާފާއި ހިތްދަތިކަމާ ދުރަށް ޖެހިލުމަށް ލިބޭ ފުރުސަތެކެވެ.
ރާއްޖެ ހިމެނޭގޮތަށް އިސްލާމީ ގިނަ ގައުމުތަކާއި އަދި އިސްލާމީ ނޫން ބައެއް ގައުމުތަކުގައި ދިރިއުޅޭ މުސްލިމް ރައްޔިތުންނަށް އިއްޔެއަކީ މިފަހަރުގެ ފިތުރު އީދުގެ ފުރަތަމަ ދުވަސްކަމުގައި ވެގެން ދިޔައިރު އެނޫން ގައުމުތަކުގައި އީދު ފާހަގަކުރާން ފަށާފައި ވަނީ މިއަދުއެވެ.
ގަލްފާއި މެދުއިރުމަތީގެ ބައެއް ގައުމުތަކުން އިއްޔެއަކީ ޝައްވާލުމަހުގެ ފުރަތަމަ ދުވަހުގެ ގޮތުގައި ބަލާފައިވީ ނަމަވެސް، އީރާން އަދި އޮމާނަށް އީދުގެ ފުރަތަމަ ދުވަހަކީ މިއަދެވެ. އަދި މި ސަރަހައްދުގެ ބައެއް ގައުމުތައް ކަމަށްވާ ބަނގުލަދޭޝް، ޕާކިސްތާން، އަދި ސްރީލަންކާއަށް ވެސް މިއަދަކީ އީދުގެ ފުރަތަމަ ދުވަހެވެ.