ރަޝިއާގައި މިހާރު ކުރިއަށްދާ ފީފާ ކޮންފެޑްރޭޝަންސް ކަޕްގައި ރޭ ކުޅުނު މެޗުން، ފަހަތުން އަރައި ނިއުޒީލެންޑްގެ މައްޗަށް މެކްސިކޯއިން ކުރި ހޯދައިފިއެވެ.
މެކްސިކޯއިން ނިއުޒީލޭންޑް ބަލި ކުރީ 2-1 ނަތީޖާއަކުންނެވެ.
ރޭގެ މެޗުގައި ފުރަތަމަ ލަނޑެއް ޖަހައި ލީޑު ނެގީ ނިއުޒީލޭންޑުންނެވެ. އެ ލަނޑު މެޗުގެ ފުރަތަމަ ހާފު ނިމެންދަނިކޮށް ކާމިޔާބުކޮށްދިނީ އެޓީމުގެ ކްރިސް ވުޑްއެވެ. ކްރިސް 42 ވަނަ މިނިޓްގައި ކާމިޔާބުކުރި ލަނޑާއެކު 1-0 ނިއުޒީލެންޑް ކުރީގައި އޮވެގެން ފުރަތަމަ ހާފު ވަނީ ނިމިފައެވެ.
ނިއުޒީލެންޑަށް ލީޑު ދެމެހެއްޓުނީ ދެވަނަ ހާފު ފަށައިގެން ކުޑަ އިރުކޮޅެއް ވަންދެންނެވެ. މެޗުގެ 54 ވަނަ މިނިޓްގައި މެކްސިކޯއިން ވަނީ ލަނޑެއް ޖަހައި އުންމީދު އާކޮށްފައެވެ. އެ ލަނޑު ކާމިޔަބިކުރީ ރައުލް ޖިމްނޭޒެވެ.
މެކްސިކޯ މޮޅުވި ލަނޑު އެޓީމަށް ކާމިޔާބުކޮށްދިނީ އޮރިބޭ ޕެރަލްޓާއެވެ. އޭނާ އެލަނޑު ކާމިޔާބުކުރީ މެޗުގެ 73 ވަނަ މިނިޓްގައެވެ.
އެ ނަތީޖާއާއެކު މެކްސިކޯއަށް ވަނީ ހަތަރު ޕޮއިންޓް ލިބިފައެވެ. ނިއުޒީލޭންޑަަކަށް ޕޮއިންޓެއް ނުލިބެއެވެ.
ރޭ އިރާކޮޅު "އޭ" ގުރޫޕްގެ އިތުރު މެޗެއް ކުޅެފައިވާއިރު އެ މެޗުގައި ބައްދަކުރީ ޕޯޗުގަލް އާއި ރަޝިޔާއެވެ. މެޗުން ކުރިހޯދައި ޕޯޗުގަލަށްވެސް ވަނީ މެކްސިކޯއާ އެއް ވަރަށް ޕޮއިންޓް ލިބިފައެވެ. އެ ގްރޫޕްގައި ހިމެނޭ ރަޝިޔާއަށް ލިބިފައިވަނީ ނިއުޒީލެންޑް ބަލިކޮށްގެން ލިބުނު ތިން ޕޮއިންޓެވެ.