ކޮންފެޑްރޭޝަން ކަޕްގައި ރޭ އޮސްޓްރޭލިއާ އާ ދެކޮޅަށް ކުޅުނު މެޗުން ހަނި ގޮތަކަށް ޖަރުމަން މޮޅުވެއްޖެއެވެ.
އޭޝިއާގެ ޗެމްޕިއަން އޮސްޓްރޭލިއާ އަތުން ދުނިޔޭގެ ޗެމްޕިއަން ޖަރުމަނު ރޭ މޮޅުވީ 3-2 ގެ ނަތީޖާއަކުންނެވެ.
ރޭގެ މެޗުގައި ފުރަތަމަ ލަނޑެއްޖަހައި ޖަރުމަނުން ލީޑު ނެގި އިރު، މެޗުގެ 5 ވަނަ މިނިޓްގައި އެ ލަނޑު ކާމިޔާބުކޮށްދިނީ ލާސް ސްޓިންޑްއެވެ. އޭނާގެ ގޯލަށް ފަހު މޮޅަށް ކުޅެމުންދިޔަ ޖަރުމަނަށް ހާސް ކަމެއް ގެނެސްދިނީ މެޗުގެ 41 ވަނަ މިނިޓްގައި އޮސްޓްރޭލިއާއިން ނަތީޖާ ހަމަހަމަ ކުރުމުންނެވެ. އެ ލަނޑު އެ ޓީމަށް ކާމިޔާބުކޮށްދިނީ ޓޮމް އޮޖިކްއެވެ.
ޖަރުމަނުން ވަނީ ފުރަތަމަ ހާފް ނިމުމުގެ ކުރީން ދެވަނަ ފަހަރަށް މެޗުގެ ލީޑު ނަގައިފައެވެ. އެ ޓީމަށް ލިބުނު ޕެނަލްޓީއަކުން މެޗުގެ 44 ވަނަ މިނިޓްގައި އެޓީމަށް ލަނޑު ކާމިޔާބުކޮށް ދިނީ ޖޫލިއަން ޑްރެސްލާއެވެ.
ދެވަނަ ހާފްގެ ކުޅުން ފެށިގެން މާކަ ގިނަ އިރުތަކެއް ނުވެ ޖަރުމަނުން ވަނީ ލީޑޫ އިތުރަށް ފުޅާކޮށްފައެވެ. ތިން ވަނަ ލަނޑު 48 ވަނަ މިނިޓްގައި އެޓީމަށް ކާމިޔާބުކޮށްދިނީ ލިއޯން ގޯރެޒްކާ އެވެ.
އޮސްޓްރޭލިއާއިން ކާމިޔާބުކުރި ދެވަނަ ލަނޑު އެޓީމަށް ކާމިޔާބުކޮށްދިނީ މެޗުގެ 56 ވަނަ މިނިޓްގައި ޓޮމީ ޖޫރިކްއެވެ.
މި މުބާރާތުގައި އޮސްޓްރޭލިއާ ދެން ވާދަކުރާން ޖެހޭނީ، ކެމަރޫނާ ދެކޮޅަށެވެ. ޖަރުމަނު ދެން ވާދަކުރާން ޖެހޭނީ ޗިލީއާ ދެކޮޅަށެވެ.