ލެސްޓާ ސިޓީގެ ކުރީގެ ކޯޗު އިޓަލީގެ ކްލައުޑިއޯ ރަނިއޭރީ، ފްރާންސްގެ އެފްސީ ނަންޓްސްގެ ހެޑްކޯޗަކަށް ހަމަޖައްސައިފިކަމަށް އެ ކްލަބުން ބުނެފިއެވެ.
ނަންޓްސް އިން ބުރާސްފަތި ދުވަހު ބުނީ، ރަނިއޭރީއާއެކު އެ ކްލަބުން ވަނީ ދެ އަހަރު ދުވަހުގެ އެއްބަސްވުމެއްގައި ސޮއިކޮށްފައި ކަމަށެވެ.
"އެފްސީ ނަންޓްސްއިން އުފަލާއެކު އިއުލާނުކުރަން ކްލައުޑިއޯ ރަނިއޭރީ މި ކްލަބާ ގުޅިއްޖެކަން،" ލެސްޓާ ސިޓީއަށް ޕްރިމިއަރ ލީގު ކާމިޔާބުކޮށްދިން ކޯޗާ ގުޅޭގޮތުން ނަންޓްސްއިން ބުންޏެވެ.
ނަންޓްސް އިން ހާމަކޮށްފައިވާގޮތުގައި، ފްރާންސް ލީގުގައި ކޯޗުކަން ކުރެވޭ އެންމެ ދޮށީ އުމުރު ކަމަށްވާ، 65 އަހަރު މިދިޔަ އަހަރުތެރޭގައި ރަނިއޭރީއަށް ފުރިފައިވީ ނަމަވެސް، ފްރާންސް ލީގުން ވަނީ އޭނާ ގެނައުމަށް ހާއްސަ ލުޔެއްދީފައެވެ.
"މަޝްވަރާތައްދިޔައީ ވަރަށް ކުއްލިގޮތަކަށް،" ނަންޓްސްގެ ޕްރެޒިޑެންޓް ވަލްޑޭމާ ކީޓާ ވިދާޅުވިއެވެ.
މުޅި ފުޓްބޯޅައިގެ ދުނިޔެ ހައިރާންކޮށްލުވައި، ލެސްޓާ ސިޓީއަށް އިނގިރޭސި ލީގު ކާމިޔާބުކޮށްދިން ކޯޗު، ނަންޓްސްއާ ގުޅިފައި މިވަނީ އޭނާ ލެސްޓާގެ މަގާމުން ދުތުރުކުރިތާ ހަތަރުވަރަކަށް މަސްފަހުންނެވެ.
ޕްރިމިއަރ ލީގުގައި 2016 ވަނަ އަހަރު އާދަޔާ ހިލާފު ކުޅުމެއްދައިކައި ލެސްޓާއަށް އެ ސީޒަންގެ ލީގު ކާމިޔާބުކުރުމަށް މަގުދެއްކި ކޯޗަށް، ޖެހިގެން އައި ސީޒަންގައި ކުރިމަތިލާން ޖެހުނީ މުޅިން ތަފާތު ހާލަތަކާއެވެ. ޗެމްޕިއަންސް ލީގުގެ ގަދަ 16އާ ހަމައަށް ދަތުރުކުރި ކްލަބު ވަނީ، މިދިޔަ ސީޒަންގައި ޕްރިމިއަރލީގު ރެލިގޭޝަން ޒޯނަށްވެސް ވެއްޓިފައެވެ.
ރަނިއޭރީ ވަނީ މީގެ ކުރީންވެސް ފްރާންސްގައި ކޯޗެއްގެ ގޮތުން މަސައްކަތްކޮށްފައެވެ. އެގޮތުން އޭނާ ވަނީ 2013 ވަނަ އަހަރު މޮނާކޯ އަނބުރާ ފްރާންސް ލީގަށް ޕްރޮމޯޓްކޮށްދީ، ޖެހިގެން އައި ސީޒަންގައި ޕީއެސްޖީ ފަހަތުން ލީގުގެ ދެވަނަ ހޯދައިފައެވެ.
މިދިޔަ ސީޒަން ނިމުނުއިރު ނަންޓްސް އޮތީ، ފްރާންސް ލީގުގެ ހަތްވަނައިގައެވެ. އަދި އެޓީމުގެ ޕޯޗްގަލް ކޯޗް ސާޖިއޯ ކޮންސިކާއޯ ޕޯޓޯއާ ހަވާލުވާން އެދުމުން އޭނާ ދޫކޮށްލުމަށްފަހު، ހެޑްކޯޗަކަށް ރަނިއޭރީ ހަމަޖެއްސީއެވެ.