ރާއްޖޭގެ ޓްރެވަލް އިންޑަސްޓްރީގައި ހަރަކާތްތެރިވާ ވިޔަފާރިތަކުގެ އެސޯސިއޭޝަން، މޯލްޑިވްސް ޓްރެވަލް އެޖެންޓްސް އެންޑް ޓުއާ އޮޕަރޭޓާސް (މަޓާޓޯ) އިންވެސް ހައިރައިޒުން އިންތިޒާމުކުރާ ވެކޭޝަންސް އެކްސްޕޯ އެންޑޯޒްކޮށްފިއެވެ.
މަޓާޓޯއިން އެ މައުރަޒު އެންޑޯޒްކުރި އިރު މީގެ ހަފްތާއެއްހާ ދުވަސް ކުރިން ރާއްޖެ ޕްރޮމޯޓުކުރާ ސަރުކާރުގެ ކުންފުނި، މޯލްޑިވްސް މާކެޓިން އެންޑް ޕީއާރު ކޯޕަރޭޝަންސް (އެމްއެމްޕީއާރުސީ)ންވެސް ވަނީ އެ މައުރަޒު އެންޑޯޒްކޮށްފައެވެ.
މަޓާޓޯގެ ސެކްރެޓަރީ ޖެނެރަލް އިބްރާހިމް މުނާޒް ސޮއި ކުރައްވައި ހައިރައިޒަށް ފޮނުވި ސިޓީގައި ބުނެފައިވަނީ އެ ދެ ފަރާތާ މެދު ކުރެވުނު މަޝްވަރާތަކަށްފަހު މަޓާޓޯއިން ހައިރައިޒްގެ ވެކޭޝަންސް އެކްސްޕޯ 2017 އެންޑޯޒް ކުރަން ނިންމާފައިވާ ކަމަށެވެ.
އެ ސިޓީގައި ބުނެފައިވަނީ މިދިޔަ އަހަރު ބޭއްވި އެ މައުރަޒުގެ ފުރަތަމަ އެޑިޝަނުގައިވެސް ހައިރައިޒަށް ފުރިހަމަ އެއްބާރުލުން ދީފައިވާނެ ކަމަށާއި މިއަހަރުގެ މައުރަޒުގައިވެސް އެކުންފުންޏަށް ބޭނުންވާ ހުރިހާ އެއްބާރުލުމެއް ދޭން މަޓާޓޯ ތައްޔާރު ކަމަށެވެ. އަދި ހައިރައިޒަކީ މަޓާޓޯގެ ވަރަށް ގާތް އެކުވެރިއެއް ކަމަށާއި އެއީ ވިޔަފާރީގެ ގޮތުން އެ އެސޯސިއޭޝަނުގެ ޕާޓްނަރެއް ކަންވެސް އެ ސިޓީގައި މުނާޒް ވިދާޅުވެފައިވެއެވެ.
ހައިރައިޒަކީ ރާއްޖޭގެ ފެންވަރުގައި ބަލައިލާއިރު ވެސް އެންމެ ކުރީގައި އުޅޭ އިވެންޓް މެނޭޖްމެންޓް ކުންފުންޏެކެވެ. އެކުންފުނީގެ އަމިއްލަ ހަ ބްރޭންޑެއް ތައާރަފްކޮށްފައިވާ އިރު އެ އެހުރިހާ ބްރޭންޑަކީ ވެސް ކާމިޔާބު، އާންމުންގެ ތަރުހީބު ބޮޑު ހަ ބްރޭންޑެވެ. ހައިރައިޒްގެ އިވެންޓުތަކުގެ ތެރޭގައި ސަރަހައްދީ ފެންވަރުގެ އެވޯޑު ހަފްލާއެއް ވެސް ހިމެނެ އެވެ.
ހައިރައިޒްގެ އިވެންޓުތައް:
- ލިވިންގް އެކްސްޕޯ
- ސައުންޑްސް އޮފް މޯލްޑިވްސް
- ފުޑް އެންޑް ބެވަރޭޖެސް ޝޯ
- ވެކޭޝަންސް އެކްސްޕޯ
- ސައުތް އޭޝިއަން ޓްރެވަލް އެވޯޑްސް
- ޕްރިންޓް އެންޑް އެޑްވަޓައިޒިން ސާވިސް ޝޯ
ހައިރައިޒުން އަންނަ މަހު ބާއްވާ ވެކޭޝަންސް އެކްސްޕޯގައި ރާއްޖެއާއި ރާއްޖެއިން ބޭރުގައި ޗުއްޓީ ހޭދަ ކޮށްލުމަށް ހުރި ފުރުސަތުތަކާ ގުޅޭ މައުލޫމާތު ދިނުމަށް ސަރަހައްދީ ބްރޭންޑުތަކާއި ރާއްޖޭގެ ބްރޭންޑުތައް އަންނާނެ އެވެ.
އެ މައުރަޒަކީ ރާއްޖޭގައި ބާއްވާ އެފަދަ ހަމަ އެކަނި މައުރަޒެވެ.