ދުނިޔޭގެ ކަނޑުތަކާ ބެހޭ ދުވަހާ ގުޅިގެން ހޭލުންތެރިކަން އުފެއްދުމަށް ޓަކައި އެޑިޑާސް، ޕާލީ ފޯ ދަ އޯޝަންސް އަދި ރަންޓޭސްޓިކް އެޕްލިކޭޝަން ގުޅިގެން އެމެރިކާގެ ނިއު ޔޯކްގައި ކުރިޔަށް ގެންދިޔަ ދުވުމެއްގައި ރާއްޖޭގެ ފިޝަރީޒް މިނިސްޓަރު ޑރ. މުހައްމަދު ޝައިނީ އާއި، ނިއުޔޯކްގައި ހުންނަ ދިވެހި މިޝަންގެ ޑިޕްލޮމެޓުން ބައިވެރިވެވަޑައިގެންފި އެވެ.
މިދިޔަ ހުކުރު ދުވަހު ނިއު ޔޯކްގައި ކުރިޔަށް ގެންދިޔަ ދުވުމުގައި 500 އަށް ވުރެ ގިނަ މީހުން ބައިވެރިވި އެވެ. އަދި ނިއު ޔޯކަށް ދަތުރުކޮށްގެން ގިނަ ބަޔަކަށް ދުވުމުގައި ބައިވެރި ނުވެވޭނެތީ، "ރަންޓޭސްޓިކް" އެޕް ބޭނުންކޮށްގެން ޖޫން ފަހަކުން 11 އާ ހަމައަށް ދުނިޔޭގެ އެކި ކަންކޮޅުތަކުގައި ތިބި ދުވުންތެރިން މި ދުވުމުގައި ޑިޖިޓަލްކޮށް ބައިވެރިވި އެވެ. "ރަން ފޯ ދަ އޯޝަންސް"ގެ ނަމުގައި ކުރިޔަށް ގެންދިޔަ މި ދުވުމުގައި 59,135 ދުވުންތެރިން ބައިވެރިވި އިރު، ޖުމްލަ 578,003 އަށް ބައިވެރިން ދުވެފައިވެ އެވެ.
އެޑިޑާސް އަދި ޕާލީއިން ކުރިޔަށް ގެންދިޔަ ދުވުމުގައި ފިޝަރީސް މިނިސްޓަރު ޝައިނީ އަދި ދިވެހި މިޝަންގެ ޑިޕްލޮމެޓުން --- ފޮޓޯ/ ނިއުޔޯކް ދިވެހި މިޝަން
ދުނިޔޭގެ ކަނޑުތަކާ ބެހޭ ދުވަހާ ގުޅިގެން ނިއު ޔޯކްގައި ހުންނަ އދ.ގެ މަރުކަޒުގައި ބޭއްވި ވޯލްޑް އޯޝަންސް ކޮންފަރަންސްގައި ބައިވެރިވެވަޑައިގަތުމަށް ފިޝަރީޒް މިނިސްޓަރު ޑރ. މުހައްމަދު ޝައިނީ ހުންނެވީ ނިއު ޔޯކްގައެވެ. އެހެންކަމުން ޝައިނީއާއި، އެމެރިކާގައި ހުންނަ ދިވެހި އެމްބެސެޑަރު އަހްމަދު ސަރީރާއި، ނިއު ޔޯކްގެ ދިވެހި މިޝަންގެ ޑިޕްލޮމެޓިކް ސްޓާފުންވެސް "ރަން ފޯ ދަ އޯޝަންސް" ދުވުމުގައި ބައިވެރިވި އެވެ.
ނިއުޔޯކްގައި ހުންނަ ދިވެހި އެމްބެސެޑަރ އަހްމަދު ސަރީރު، ދިވެހި ބަހުން ޝުއޫރު ލިޔުއްވަނީ --- ފޮޓޯ/ ނިއުޔޯކް ދިވެހި މިޝަން
ފަސް ކިލޯމީޓަރަށް ކުރިޔަށް ގެންދިޔަ މި ދުވުމަކީ މިއަހަރު ފުރަތަމަ ފަހަރަށް ބޭއްވި ހަރަކާތެކެވެ. އެޑިޑާސްއާއި ޕާލީ ފޯ ދަ އޯޝަންސްއިން ނިންމާފައި ވަނީ މިއަހަރުން ފެށިގެން ކޮންމެ އަހަރަކު ވެސް މި ދުވުން ބޭއްވުމަށެވެ.
ދުނިޔޭގެ މަޝްހޫރު ސްޕޯޓްސް އެޕޭރަލް ބްރޭންޑް އެޑިޑާސްއާއި، ޕާލީ ފޯ ދަ އޯޝަންސްއިން ދަނީ ތިމާވެށި ހިމާޔަތް ކުރުމުގެ ދާއިރާއިން ފާހަގަކުރެވޭ މަސައްކަތްތަކެއް ކުރަމުންނެވެ. އެގޮތުން، ރާއްޖޭގެ ކަނޑުގެ ސަރަހައްދުން ނެގި ޕްލާސްޓިކް ކުނި ބޭނުންކޮށްގެން އެޑިޑާސްއާއި ޕާލީއިން ގުޅިގެން ވަނީ ބޫޓެއް ވެސް ތައާރަފު ކޮށްފަ އެވެ.