މި އަހަރުގެ މާޗު މަހު ބަނގުލަދޭޝްގައި މަރުވި ދިވެހި ދަރިވަރު ރައުދާ އާތިފްގެ މަރުގެ ހަގީގަތް ހޯދަން އެގައުމަށް ދިޔަ އޭނާގެ ބައްޕަ ޑރ. މުހައްމަދު އާތިފް ރާޖްޝާހީގައި ކައިވެންޏެއް ކޮށްފި އެވެ.
ބަންގާޅު ނޫހެއްކަމަށްވާ ދާކާ ޓްރައިބިއުންއިން ރިޕޯޓުކޮށްފައިވާގޮތުން، ޑރ. އާތިފް ކައިވެނިކުރީ ރާޖްޝާހީ ސިޓީއަށް ނިސްބަތްވާ، ކަނަކްލަތާ ނަމަކަށްކިޔާ 30 އަހަރުގެ އަންހެނަކާ އެވެ.
ބުރާސްފަތި ދުވަހު ރާޖްޝާހީގެ ކޯޓެއްގައި ކުރެވުނު މި ކައިވެންޏާ ގުޅޭ ގޮތުން، ޑރ. އާތިފްގެ ފަރާތުން ވެސް އަދި އޭނާ ކައިވެނިކުރި އަންހެންމީހާގެ ފަރާތުން ވެސް އެއްވެސް މައުލޫމާތެއް ހާމަކޮށްފައި ނުވާކަމަށް ދާކާ ޓްރައިބިއުންއިން ބުނެ އެވެ.
ޑރ. އާތިފާއި ކަނަކްލަތާ ސޮއިކޮށްފައިވާ ކައިވެނީގެ ސެޓްފިކެޓްގެ ކޮޕީއާ އެކު، ދާކާ ޓްރައިބިއުންގައި ޝާއިއުކޮށްފައިވާ ލިޔުމުގައި ބުނެފައި ވަނީ، މި ކައިވެންޏާ ގުޅޭ ގޮތުން މީޑިއާއަށް މައުލޫމާތު ހިއްސާކުރުމަށް ކަނަކްލަތާގެ އާއިލާއިން އިންކާރުކުރިކަމަށެވެ.
ރައުދާގެ ބައްޕަ ޑރ. އާތިފް ވަނީ ރާޖްޝާހީގެ އަންހެނެއް ކަމަށްވާ އުމުރުން 30 އަހަރުގެ ކަނަކް ލަތާއާ ކައިވެނިކޮށްފައި ކަމަށް ދާކާ ޓްރައިބިއުން އިން ބުނޭ -- ފޮޓޯ: ދާކާ ޓްރައިބިއުން
ނޫރުއްނަހާރު ލަވްލީ ކިޔާ އެޑްވޮކޭޓަކާ ހަވާލީދީ އެ ނޫހުން ބުނީ، ރާޖްޝާހީ ކޯޓުގައި ކުރެވުނު މި ކައިވެންޏަކީ ކަނަލްލަތާގެ ދެވަނަ ކައިވެނި ކަމަށާއި އޭނާގެ ފުރަތަމަ ފިރިމީހާ މީގެ ދެ އަހަރުކުރިން ނިޔާވެފައިވާ ކަމަށެވެ.
އެ ކައިވެންޏާ ބެހޭ ގޮތުން އާތިފަށް ގުޅި އިރު ފޯނަށް ޖަވާބެއް ނުދެއްވަ އެވެ. އަދި މެސެޖަށް ވެސް ޖަވާބު ނުދެެއްވާތީ އޭނާގެ ކޮމެންޓެއް ވަނީ ލިބޭ ގޮތް ނުވެފަ އެވެ.
ޑރ. އާތިފް ފުރަތަމަ ޒަވާޖީގޮތުން ގުޅުނީީ، ރައުދާގެ މަންމަ އާމިނަތު މުޙައްރިމަތާ އެވެ. އެ ކައިވެންޏަށް ރައުދާގެ އިތުރުން ދެ ދަރިން ލިބިފައިވެ އެވެ. އެހެން ނަމަވެސް މުހައްރިމާއާ އެކު ކުރި ކައިވެނި ރޫޅި، އޭގެ ފަހުން ޑރ. އާތިފް ވަނީ އިންޑިއާ އިން މީހަކާ ކައިވެނިކޮށްފަ އެވެ.
ރާޖްޝާހީ މެޓްރޯޕޮލީޓަން ޕޮލިހުގެ ސީނިއާ އެސިސްޓެންޓް ކޮމިޝަނަރު އިފްތީ ޚަޔާރު އާލަމްއާ ހަވާލާދީ ދާކާ ޓްރައިބިއުން އިން ބުނީ، ކަނަކަލަތާއާ ކައިވެނި ކުރުމުގެ ކުރީން، ޑރ. އާތިފް އަނގަބަހުން އެކަން ފުލުހުންނަށް އަންގާފައިވާ ކަމަށެވެ.
ޑރ. އާތިފްގެ އަންހެން ދަރިފުޅު ރައުދާ އާތިފް ބަންގާޅަށް ދިޔައީ، ރާޖްޝާހީގައި ހުންނަ އިސްލާމިކް ބޭންކު މެޑިކަލް ކޮލެޖުގައި މެޑިސިންގެ ދާއިރާން ތައުލީމު ހާސިލްކުރުމަށެވެ. އޭނާ މަރުވެފައި އޮއްވާ ފެނިފައި ވަނީ، އޭނާ ދިރިއުޅޭ ކޮޓަރީގެ ތެރޭން މާރޗް 29 ވަނަ ދުވަހު އެވެ.
ރައުދާގެ މަރުގެ ހަގީގަތް ހޯދުމަށް ހެދި ފުރަތަމަ އޮޓޮޕްސީ ރިޕޯޓުގައި ބުނެފައި ވަނީ އޭނާ މަރުވިކަމަށް ބެލެވެނީ ދަންޖެހިގެން އަމިއްލައަށް ކަމަށެވެ. އެހެން ނަމަވެސް ޑރ. އާތިފް އެ ތުހުމަތުތައް ގަބޫލުކުރަން އިންކާރުކޮށް، އިތުރު އޮޓޮޕްސީއެއް ހެދުމަށް ރާޖްޝާހީ ކޯޓަށް މައްސަލް ހުށަހެޅުމުން އެ ކޯޓުން ވަނީ މަރުގެ މައްސަލައެއްގެ ގޮތުގައި އެކަން ބަލައިގަނެ އެ މައްސަލަ ތަހުގީގުކުރުމަށް ސީއައިޑީއާ ހަވާލުކޮށްފައެވެ.
ރައުދާ އަމިއްލައަށް މަރުވީކަމަށް ކަނޑައަޅައިދިނުމަށް، ފުލުހުންނާއި ޑިޓެކްޓިވް ބްރާންޗުން ދެފަހަރެއްގެ މަތީން ކޯޓަށް ހުށަހެޅި ނަމަވެސް ކޯޓުން ވަނީ އެ މައްސަލަ ބަލައި ނުގެންފަ އެވެ. އެހެން ނަމަވެސް ރައުދާ ވަނީ މަރާލާފައިކަމަށް ބުނެ އެކަމުގެ ހަގީގަތް ހޯދައިދިނުމަށް ޑރ. އާތިފު ހުށަހެޅި މައްސަލަ ރާޖްޝާހީ ކޯޓުން ވަނީ ބަލައިގެންފަ އެވެ.
ރައުދާގެ ގަބުރު ކޮނެގެން ހަށިގަނޑު ނެގުމަށްފަހު އޭޕްރީލް 24 ވަނަ ދުވަހު ދެވަނަ އޮޓޮޕްސީއެއް ހަދާފައި ވީ ނަމަވެސް އެ އޮޓޮޕްސީގެ ނަތީޖާ އަދި މިހާތަނަށް ހާމަކޮށްފައެއް ނުވެއެވެ.