ޑިންގީއެއް ބަންޑުން ޖަހާލި ހާދިސާއެއްގައި ގެއްލިގެން ހޯދަމުންދާ ފުލުހުންގެ ކޯޕްރަލް ސ. ހިތަދޫ، އާބިން، މުހައްމަދު ސުމައިދު، 27 ގެ ފޯނު ފެނިފައިވާ ކަމަށް ފުލުހުން ބުނެފި އެވެ.
ސުމައިދު ގެއްލިގެން އޭނާ ހޯދުމުގެ މަސައްކަތް ފުލުހުންނާއި އެމްއެންޑީއެފުން ފަށާފައި ވަނީ ރޭ 8:30 އެހާކަންހާއިރު އެވެ.
ފުލުހުން މިއަދު ކުރި ޓުވީޓެއްގައި ބުނެފައި ވަނީ ސުމައިދުގެ ފޯނު ފެނިފައި ވަނީ ޝަންގްރިއްލާ ރިސޯޓް ކައިރީގައި އޮންނަ ފަޅު ރަށް ކައިރިން ކަމަށެވެ.
— Maldives Police (@PoliceMv)
ފުލުހުން ބުނީ ސުމައިދުގެ ފޯނު ފެނިފައި ވަނީ އޭނާ ހޯދުމުގެ މަސައްކަތުގައި ހަރަކާތްތެރިވި ފުލުހުންނަށް ކަމަށެވެ. އެ ފޯނު ފެނުނީ ޑިންގީ ބަންޑުން ޖަހާލި ކަމަށް ބުނާ ސަރަހައްދުން ކަމަށް ވެސް ފުލުހުން ބުންޏެވެ. އެކަމަކު އެމްއެންޑީއެފުން ބުނީ ސުމައިދުގެ ފޯނު ފެނުނީ އެމްއެންޑީއެފުގެ ކޯސްޓްގާޑުގެ ޑައިވިން ޓީމަށް ކަމަށެވެ.
ސުމައިދު ދަތުރު ކުރި ޑިންގީގައި ތިން މީހަކު ދަތުރު ކުރި އެވެ. އޭގެ ތެރެއިން ދެ މީހަކު ވަނީ ސަލާމަތްވެފަ އެވެ.
މަސްވެރި ކަމަށް ނުކުމެ އުޅެނިކޮށް ޑިންގީ ބަންޑުން ޖަހާލުމުން ޑިންގީގައި ސުމައިދާއެކު ދެން ތިބި މީހުން ވަނީ ފަތާފައި ޝަންގްރިއްލާ ރިސޯޓަށް އަރާފަ އެވެ.
ގެއްލުނު އިރު ސުމައިދު ލައިގެން ހުރީ ކަޅުކުލައިގެ އަތްދިގު ޖާޒީއަކާއި ކަޅު ކުލައިގެ ޓްރެކްސޫޓެއް ކަމަށް އެމްއެންޑީއެފުން ބުންޏެވެ.