ގޭތެރެއިން އިވެމުން ދަނީ ހީ ސަމާސާ ކުރާ އަޑެވެ. ފެންނަމުން ދަނީ އެކި މީހުން އެކި މަސައްކަތުގައި އަވަދި ނެތި އުޅޭ މަންޒަރެވެ. މި އަދަކީ ބަގީޗާގޭ ފަޒީލް އާއި ހަނީފާ ގެ ހުރި ހަމަ އެކަނި ދަރިފުޅު މިޝާ ގެ އަލަތު ކައިވެނި އެ ރަށު ފިނިފެންމާގޭ ފަރާޝް އާއި އަޒީޒާ ގެ ހަނގު ދަރިފުލު ޝާހީން އާ ކުރެވޭ ދުވަހެވެ. މި އަދު ޝާހީން އާއި މިޝާ ތައްޔާރު ވަމުން އެ ދަނީ އެދެމީހުންގެ ދެ އަހަރުވީ ލޯބީގެ ގުޅުން އިތުރު ގޮށަކުން ބަނދެލައި އެ ގުޅުމަށް އިތުރު ފުރިހަމަ ކަމެއް ގެނައުމަށެވެ.
މިޝާ އަކީ ހަނީފާ އާއި ފަޒީލް ގެ ލޮލުގެ ފިނި ކަމެވެ. ދިރި އުޅުމުގެ އުއްމީދެވެ. މި އަދު އެ ދަރިފުޅު އެ ދަނީ ދިރިއުޅުމުގެ އެންމެ މުހިއްމު ބިންގާ އަޅާށެވެ. ހަނީފާ ގެ ހަނދާނަށް އައީ އޭނާ އާއި ފަޒީލް ގެ ކައިވެނި ކުރެވުނު ދުވަހެވެ. އެންމެ ސޯޅަ އަހަރުގައި ކައިވެނި ކުރަން ޖެހުނީ އޭރު އޭނަ އާއި ފަޒީލް ގެ ހާލަތު ހުރި ގޮތުންނެވެ. އެދެ މީހުން ގެ ދިރިއުޅުމުގައި ކަންތައް ވަމުން އައީ ވެސް ދާދި އެއް ގޮތަށެވެ.ކުޑައިރު މައިންބަފައިން ވަނީ ނިޔާވެފައެވެ. ތަފާތަކަށް ވީ ހަނީފާއަށް ހިމާޔަތެއް ފޯރު ކޮށްދޭން މުސްކުޅި ވެފައިވާ މާމަ އެއް ހުރި ކަމެވެ. ހަނީފާ އަދި ފަޒީލް ގެ ކައިވެންޏަށް ހަފްތާއެއް ނުވަނީސް މާމަ ވެސް މި ފަނާވަނިވި ދުނިޔެ ދޫކޮއްފިއެވެ. ހީވާ ކަހަލައެވެ، މާމަ ދުނިޔޭގައި ހުރީ މާމަ އަށް އިތުބާރު ހިފޭ މީހަކާ ހަނީފާ ހަވާލު ކުރެވޭނެ ދުވަހަކަށެވެ.
ދުވަސްތައް ހަފްތާތަކަށް ބަދަލުވެ ހަނީފާ އާއި ފަޒީލް ގެ ކައިވެންޏަށް މަހެއް ވީ އިރު ހަނީފާ ބަލިވެ އިންކަން އެނގުނެވެ. ހިތްދަތި ދުވަސް ތަކެއް ކަނޑައްތު ކުރަމުން ދިޔަ ދެމަފިރި އަކަށް މާތެﷲ ދެއްވި އަގުހުރި ނިއުމަތެއް ކަމުގައި އެ ޙަބަރު ވިއެވެ. ގިނަ ދުވަސް ތަކެއް ވަންދެން ފެން ނުލިބި ކަރުހިއްކައިގެންފައިވާ ބަޔަކަށް ފެން ކޯރެއް ފެނުނު ފަދައެވެ. އުފަލުން ގޮސް އެ ދެމަފިރިންނަށް ރޮވުނެވެ. މި ދަރިފުޅު ވެގެންދަނީ އެދެމީހުން ގެ އަނދިރި ވެފައިވާ ހަޔާތަށް އަލިކަމެއް ގެނުވާނެ ހުޅުކޮޅަކަށެވެ. ނޭނގި ހުއްޓާ އެ ދެމީހުން ގެ ހިތުގައިވި ފާރު ގަނޑުގައި މަލަން އެޅިއްޖެއެވެ. އިންތިޒާރު ކުރެވެން ފެށުނީ އެ ދެމީހުން ގެ ބަގީޗާގައި ފޮޅެން ތައްޔާރު ވަމުންދާ ނާޒުކީ މަލަށެވެ. އިތުރު ހިއްވަރަކާ އެކު ފަޒީލް އޭނާގެ ދިރިއުޅުން އުޖާލާ ކުރުމުގެ މަސައްކަތް ފެށިއެވެ. ލޯބިވާ ދަރިފުޅާއި ހަނީފާ ގެ ހައްގުގައެވެ. ލޯބިވާ ދަރިފުޅު މިޝާ ދުނިޔެއަށް ލޯ ހުޅުވުނު އިރު ފަޒީލް އާއި ހަނީފާ ވަނީ ފުދުންތެރި ބަޔަކަށް ވެފައޭ ބުނުން ދޮގަކަށް ނުވާނެއެވެ. ފަޒީލް ވަނީ އަމިއްލަ އޮފީހެއް ހުޅުވާފަ އެވެ. މުއައްޒަފުން މަދު ނަމަވެސް މަސައްކަތަށް ކުރިއެރުން ލިބެމުން އައީ ދާދި އަވަހަށެވެ. ހަނީފާ އަށް އޭނާގެ ހިޔާލީ ދުނިޔެއިން ނުކުމެވުނެވެ. އަދި ވަށައިގެން ވާ މާހައުލަށް ނަޒަރު ހިންގާލާ ފުން ނޭވާއެއް ދޫކޮއްލެވުނެވެ. އަދި މިޝާއަށް ވީ ގޮތެއް ބަލާލުމަށްޓަކާ އޭނަގެ ކޮޓަރިއާއި ދިމާލަށް މިސްރާބު ޖެހިއެވެ.
މިޝާގެ ކޮޓަރިއަށް ނުވަދެވެނީސް ކޮޓަރި ތެރޭގެ މާހައުލު ހަނީފާ އަށް އަންދާޒާ ކޮއްލެވުނެވެ. އަދި ތުންފަތަށް ފުޅާ ހިނިތުންވުމެއް ގެނައުމަށްފަހު އެތެރެއަށް ވަނެވެ. އޭރު މިޝާ ގެ ރަހުމަތްތެރިން މިޝާ ވަށާލައިގެން ތިއްބެވެ. ޔަގީނެވެ، މިޝާ އެމީހުން ބޭނުން ވާ ގޮތަށް ކަންތަށް ކުރަން ނުދިނީ އެވެ. މިޝާ ބޭނުން ކޮންމެ އެއްޗެއް ލިބެން ހުއްޓަސް، ޢޭނާ އަބަދުވެސް ލޯބި ކުރަނީ އާދައިގެ ދިރިއުޅުމަކަށެވެ. މި ޙާއްސަ ދުވަހުވެސް މިޝާ ލައިގެން އެ އިނީ ޢާދައިގެ ގޮތަކަށް ޖަރީ ކުރވިފައިވާ ލޭސް ފޮތީގެ ހުދު ހެދުމެކެވެ. ހެދުމުގެ މަތީބައި ވަނީ ހުދު ކުލައި ގެ މުތީ ތަކަކުން ޖަރީ ކުރެވިފައެވެ. މޫނުގައި ވަނީ ލުއި މޭކަޕެއް ކޮއްލަފައެވެ. މިޝާ ގެ ރީތިކަން ފެނި ހަނީފާގެ ލޮލުން އުފާވެރި ކަމުގެ ކަރުނަ ނީރާލިއެވެ. ހަނީފާ ގެ ކަރުނުން ފުރިފައިވާ ދެ ލޯ ފެނި މިޝާ އައިސް ޢޭނާގެ މަންމަ ގެ ގައިގައި ބައްދާލިއެވެ. ޙަނީފާ ދެ ލޯ ފޮހެލައި މިޝާ ގަޔާ ދުރު ކޮއްލީ މިޝާގެ ހެދުން ހަޑިވާނޭ ކަމަށް ބުނެއެވެ. ނަމަވެސް އަނެއްކަ ވެސް މިޝާ ހަނީފާ ގެ ގައިގައި އެއަށް ވުރެ ބާރަށް ބައްދާލިއެވެ. އެ ވަގުތު މިޝާ ގެ މައުސޫމު ކަން ފެނި ހަނީފާ އަށް ހީލެވުނެވެ. އަދި ލަސްނުކޮށް ކައިވެނި ކުރަން ހަމަޖެހިފައިވާ ތަނަށް ދާން ހިނގާށޭ ބުނެލިއެވެ. އެވަގުތަކީ އީޝާ ނަމާދަށް ބަންގިވެސް ގޮވި ވަގުތެވެ. އެހެންކަމުން މިޝާ ވުޟޫ ކޮއްގެން ހުރި ވާހަކަޔާއި، ނަމާދު ކޮއްގެން އަންނާނޭ ކަމަށް ބުނެލިއެވެ. އަދި ޤާޒީން ވެސް އަންނަން ވަގުތު އޮތް ވާހަކަ ބުނެ ފޯނު ނަގާ ޝަހީން އަށް ވެސް ނަމާދު ކޮށްގެން އައުމަށް މަސެޖް ކޮއްލިއެވެ. ހަނީފާ އަށް އޭނާގެ ދަރިފުޅު ފުރިހަމަ ގޮތުގައި ތަރުބިއްޔަތު ކުރެވުނު ކަމުގެ ފޮނި އިހުސާސް އެވަގުތު ކުރެވުނެވެ.
ގަޑިން އަށްގަނޑި ފަނަރަ ވީއިރު ޤާޒީންނާއި،ހެކިވެރިންނާއި، ދެ ފަރާތުގެ އާއިލާ މީހުންނާއި، އެކުވެރިން ގެ ހާޒިރުގައި ކައިވެނި ފެށިގެން ކުރިއަށް ދިޔައެވެ. ޝާހީން ގެ މޫނުމަތިން ނިމުމެއްނުވާ ލުއި ހިނިތުން ވުމެއް ފެންނަން ހުއްޓެވެ. މިރޭ ޝާހީން އާދަޔާ ޙިލާފަށް ރީއްޗެވެ. ލައިގެން އިން އަޅި ކުލައިގެ ކޯޓް ފަޓްލޫނު ޝާހީން ޢާއި ވަރަށް ގުޅެއެވެ. އަދި އޭނާޔަށް އިތުރު ފުރިހަމަ ކަމެއް ގެނެސްދިނީ ކަރުގައި އަޅާފައި އޮތް ކަޅު ޓައީންނެވެ. ކައިވެނީ ގެ ޙުތުބާ ނިމި އެންމެފަހުން ޝާހީން އަނބި ގަބޫލް ކޮށްފީމޭ ބުނެލި އުފާވެރި ވަގުތު ކޮޅަކީ މުޅި ދުނިޔޭގައިވާ ހުރިހާ އުފަލެއް މިޝާގެ ފަސް ބަޔަށް އެޅުނު ވަގުތެވެ. އެވަގުތު އެތަނަށް ޖަމާވެފަ ތިބި އެންމެނެގެ މޫނުން ވެސް އެ އުފާވެރިކަން ފެންނަން ހުއްޓެވެ. ކައިވެންޏަށް ފަހު އޮތް ވަލީމާގައި ބައިވެރި ވުމަށްފަހު އެގާރަ ޖަހަން އުޅުނު އިރު މުޅި ގެއަށް އަމާން ކަން ގެނުވައިފިއެވެ. އެތައް ބައެއްގެ ހެޔޮ ދުޢާ މިރޭ މިޝާ އާއި ޝާހީން އަށް ލިބިގެން ދިޔައެވެ. ޝާހީން ގެ މައިންބަފައިންނަށް ވުރެވެސް މިޝާ ގެ މައިންބަފައިން އުއްމީދު ނުކުރާ ކަހަލަ އުފާވެރި ޙަބަރެއް ޝާހީން މިޝާ ގެ މައިންބަފައިންނަށް ދިނެވެ. އެއީ ކައިވެންޏަށްފަހު މިޝާއާއި އޭނާ ދިރިއުޅޭނީ ހަނީފާމެންގެ ގޭގައި ކަމެވެ. ޝާހީން އަށް ޓަކައި އޭނާގެ ގޭގައި ކިތައްމެ ބޮޑު ފުރިހަމަ ކޮޓަރިއެއް ހުއްޓަސް، މިޝާ އަކީ އޭނާގެ މައިންބަފައިން ގެ ހުރި ހަމައެކަނި ދަރިފުޅުކަމަށް ވާއިރު އެމީހުންނާ މިޝާ ވަކި ކުރާކަށް އޭނާގެ ހިތް ނޭދޭތީއެވެ. ޝާހީން ގެ މި ނިންމުމާ ދޭތެރޭ ހަނީފާ އާއި ފަޒީލް އިންތިހާޔަށް އުފާކުރިއެވެ. މިޝާ ގެ ހޮވުމާއި މެދު ފަހުރުވެރި ވިއެވެ.
ކައިވެނީގެ ރެއަކީ ކޮންމެ ދެމަފިރިއެއްގެ ހަޔާތަށް ވެސް އަންނާނެ އެއްމެ އުފާވެރި އެއްރެއެވެ. މިޝާ އާއި ޝާހީން ވެސް އެރޭ ހޭދަކުރީ އެކަކު އަނެކެއްގެ ފަރާތުން ލައްޒަތާއި އުފާ ހާސިލް ކުރުމުގައެވެ. ނިމުމެއްނުވާ އަހުދު ތަކާއި ވައުދުތައް ކުރަމުންނެވެ. މުސްތަގްބަލަށްޓަކާ ފޮނި ހުވަފެން ތަކެއް ދެކެމުންނެވެ. ނިދީގެ އަރާމު ޢާލަމަކަށް ގެނބިގެން ދިއުމައްފަހު މިޝާ އަށް ހޭލެވުނީ ފަތިސް ނަމާދުގެ ބަންގީގެ އަޑަށެވެ. ނަމާދު ކުރުމަށް އާދަ ވެފައިވަތީ މިޝާއަށް އަބަދުވެސް ބަންގީގެ އަޑަށް ހޭލެވެއެވެ. ފާޙާނައަށް ވަދެ ފެންވަރާ ވުޟޫ ކުރުމައްފަހު މިޝާ ޝާހީން އަށް ގޮވަން ފެށިއެވެ. މާ ގިނަ އިރުތަކެއް ނުވަނީސް ޝާހީން ތެދުވެ ފެންވަރަން ވަނެވެ. މިޝާ ނަމާދުކޮށް ގުރުއާން ކިޔަވަން އިންދާ ޝާހީން ވެސް މިސްކިތައް ދާން ގޮއްސިއެވެ. އޭގެ އިރުކޮޅެއް ފަހުން މިޝާ ވެސް ބަދިގެއަށް ދިއައީ ހެނދުނުގެ ސައި ތައްޔާރު ކުރުމަށެވެ. އޭރު ހަނީފާ ވެސް ބަދިގޭގައި އުޅެއެވެ. އެއީ އަބަދުވެސް ހަނީފާގެ އާދައެވެ. މިޝާ އޭނާގެ މަންމަ ގައިގައި ބައްދާލުމައްފަހު، އަތްގާތް ކޮއްދިނުމަށް އުޅުނެވެ. ފަހަތުން މީހެއްގެ ހިލަން ވާ ހެން ހީވެގެން ސިހިފައި މިޝާ ފަހަތް ބަލަލިއިރު ހެވިލައިފައ ޝާހީން ހުއްޓެވެ. ޝާޙީން ގެ ފުޅާ ހިނިތުންވުން ފެނި މިޝާގެ މުޅި ދުވަސް އުޖާލާ ވެގެން ދިޔައެވެ. ހަނީފާ ދަރިފުޅަށް ކޮފީ ތައްޓެއް ގިރާލަން އުޅުމުން ނިދަން ބޭނުންވާ ކަމަށް ބުނެ ޝާހީން މިޝާ ގެ ކޮލުގައި ހިފާލުމަށްފަހު ދިއައީ ކޮޓަރިއަށެވެ. ސައި ތައްޔާރު ކުރުމަށްފަހު މިޝާ ވެސް މިސްރާބު ޖެހީ ކޮޓަރިއާ ދިމާލަށެވެ.
ކޮޓަރިއަށް ވަން އިރު ޝާހީން އޮތީ ނިދިފައެވެ. ސައި ދޭން ގޮވަން އުޅެފައި ވެސް މިޝާ ހިޔާލު ބަދަލުކޮށްލީ މި ދުވަސްކޮޅު ކައިވެނީގެ ކަންތަކާ މާ ބުރަކޮށް އުޅުނީމަ ޝާހީން ވެސް ވަރުބަލިވެ ނިދި ބޭނުންވާނެ ވަރު ވިސްނިފައެވެ. އެހެން ކަމުން ރޭގަ ރަހުމަތް ތެރިންނާއި އާއިލާ އެއްމެން ގެ ފަރާތުން ލިބުނު ހަދިޔާތަށް އެކި ތަންތަނަށްލާ ކޮޓަރި ހަމަޔަކަށް އެޅުވުނު އިރު ދިހައެއް ވެސް ޖަހަނީއެވެ. މިޝާ ޝާހީން އަށް ގޮވަން ފެށިއެވެ. ތިން ހަތަރު ފަހަރަށް ގޮވުނު އިރުވެސް ޝާހީން ހޭލާކަށް ނޫޅުނެވެ. މިޝާ އައިސް ޝާހީން ގެ ނެފަތުގައި ހިފާލިއެވެ، ދެތިން ފަހަރު ކޮލުގައި ވެސް ހިފާލިއެވެ. އެވަރުން ވެސް ޝާހީން ހޭލާކަށް ނޫޅުނެވެ. ނޭނގޭ ބިރުވެރި ކަމަކުން މިޝާގެ ސިކުނޑި ވަށާލައިފިއެވެ. ބާރަކަށް ޝަހީން ގެ ގައިގައި ހިފައި ތަޅުވައިގަތެވެ. މިޝާ އަށް ބާރަކަށް ރޮއިގަނެވިއްޖެއެވެ. މަންމާ އޭ ކިޔާ ވޭނީ އަޑަކުން ހަޅޭލަވައިގަނެވިއްޖެއެވެ. ހަނީފާ އޭރު ހުރީ ފަޒީލް އަށް ސައި ދޭން ވެގެން ސައި ތަށި ގިރާށެވެ. އޭރު ފަޒީލް ވެސް މޭޒު ކައިރީގައި އިނެވެ. މިޝާގެ ވޭނީ ހަޅޭކާއެކު ހަނީފާގެ އަތުގައި ހުރި ސައި ތަށި އަތުން ދޫވެ ތަޅައިގެން ދިޔައެވެ. ބޮޑެ ކަމެއް ވެއްޖެ ކަމުގެ އިހްސާސް ކުރެވި އެ ދެމަފިރިން ދުއްވައިގަތީ މިޝާގެ ކޮޓަރިއާ ދިމަލށެވެ. އޭރު މިޝާ އޮތީ ޝާހީންގެ ގައިގައި އޮލުލައިގެން ރޯށެވެ. ވޭނުން ފުރިގެންވީ އަޑެކެވެ. ހިއްތައް ތޮރުފާލަހާ އެވެ. ހަނީފާ މަގޭ ދަރިފުޅަށް ކިހިނެތްވީ ހޭ ކިޔާ ޝަހީން އަށް ގޮވަން ފެށިއެވެ. ޝާހީން އެކޭ އަޑު ނީވޭ މީހެކޭ އެއްފަދައެވެ. ފަޒީލް ގުޅީ އެމްބިއުލާންސް އަށެވެ، އެއަށް ފަހު ޝާހީން ގެ މައިންބަފައިންނަށެވެ. އޭރުވެސް މިޝާ ޝާހީން ގެ ގަޔަކުން ދޫކޮށް ނުލައެވެ. މިޝާ އަށް ޝާހީން ގެ ހިތުގެ ތެޅުން ހުއްޓިފަވާކަން ޢިހުސާސް ވިއެވެ. ނަމަވެސް ދުލުން ބަޔާން ކުރަން ނުކުޅެދުނެވެ. ހުރިހާ އިހުސާސެއް ބޭރުވަމުން ދިއައީ ކަރުނަޔާ އެކުވެގެންނެވެ.
ޝާހީން ހޮސްޕިޓލަށް ގެނެވި އަވަސް ފަރުވާދޭ ބަޔަށް ވެއްދުނެވެ. ނަމަވެސް ވެއްދިތާ އިރުކޮޅެއް ނުވަނީސް ޑޮކްޓަރުން ނުކުމެ ދިން ހަބަރަކީ މިޝާ ގަބޫލު ކުރަން ބޭނުން ނުވި ހިއްދަތި ހަގީގަތެވެ. ހޮސްޕިޓަލަށް ގެނައި އިރުވެސް ޝާހީން ވަނީ ނިޔަވެފައެވެ. ހިނދުކޮޅަކަށް ނަމަވެސް ދުނިޔެ ދައުރުވުން ހުއްޓުނު ކަހަލައެވެ. މުޅި މާހައުލު ގުގުމާލީ ވޭނީ ކަރުނައިންނެވެ. ޝާހީން ގެ މަންމަ ވީ ހަބަރު ހުސްވެގެން ވެއްޓިފައެވެ. ހަނީފާ ކޮޅަށް ހުރި ހައްގު އެކަންޏެވެ. މުޅި މީހާއަށް ވަނީ އިންގިލާބެއް ގެނުވާފައެވެ. ނަމަވެސް މިޝާ ގެ ރުއިން ވަނީ ހުއްޓިފައެވެ. ލޮލުން ކަރުނަ ހުސްވީކަމެއް، ރޯން ނެގެނި ކަމެއް ނުނީ ރޯން ބޭނުން ނުވަނީ ކަމެއް ނޭނގެއެވެ. ކައިވެންނަށް ސައުވީސް ގަޑިއިރު ނުވަނީސް މިޝާ ގެ ހުރިހާ އުފާތަކެއް ފޭރިގެނެވިއްޖެއެވެ. ބިނާކުރި ގަނޑުވަރު އިންޒާރެއް ނެތި ބިމާ ހަމަވެއްޖެއެވެ. ދެކެވުނު ހުވަފެނުތަކުގައި ކުލަ ނުޖެހެނީސް ބިލަހަކަށް ވެ ނިމއްޖެއެވެ. ޝާހީން އަބަދަށްޓަކާ އޭނާ ދޫކޮށް ހިނގައްޖެއެވެ. އަނބުރައި އައުމެއް ނެތް ދުނިޔެއެކެވެ. ކިތައްމެ ބެނުންވިއަސް ދެން އޭނަގެ ޝާހީނެއް އަނބުރާ ނާންނާނެއެވެ. ދެން އެ ލޯތްބެއް އޭނާޔަކަށް ނުލިބޭނެއެވެ. ނަމަވެސް މިޝާ އަމިއްލަ ނަފްސަށް ވައުދު ވިއެވެ. މި ދުނިޔެއިން ޝާހީން އާއި އެކުގައި އުޅުމުގެ ނަސީބު ނުލިބުނަސް، ދެން ދާން އޮތް ދުނިޔެއިން އޭނާ ޝާހީން އާ ބައްދަލުވުމަށް ގަދަ އަޅައި މަސައްކަތް ކުރާނެއެވު .މަރަކީ އޭގެ އަޖަލު އައިސް ޖެހުމުން ބައްދަލު ކުރަނެ އެއްޗެއްކަން މިޝާ ދަނެއެވެ. މުސްކުޅި އެއް، ޒުވާނެއް، ކުޑައެއް ބޮޑެއް ނޯވެއެވެ. ބަލި އެނދުގައި އޮންނަ މީހާ އަށް ވުރެ ސިއްހަތު ސަލާމަތުން ހުންނަ މީހާ ގެ އަޖަލު ހަމަވާލެއް މާ އަވަހެވެ. އޭނަގެ ޝާހީން ވެސް މީގެ ގަޑިއިރު ތަކެއް ކުރިން ހުރީ ކިހާ އުފަލުގަ ހެއްޔެވެ.
މިޝާ ހުރި ނާޒުކު ހަލަތު ފެނި ފަޒީލް ހިތް ވަނީ ކުދި ކުދި ވެފައެވެ. އެ ހުރިހާ އިރު ނުރޮއި ހުރި މިޝާ އަށް ރޮއިގަނެވުނީ ޝާހީން ގެ މޫނު އެޅުމުގެ ކުރިން ފަހު ފަހަރަށް މޫނު ދައްކާލުމަށް އޭނާ ވެއްދުމުންނެވެ. ޝާހީންގެ މޫނު އެޅއްޖެއެވެ. ސަންދޯކަށް ލެވިއްޖެއެވެ. އަބަދައްޓަކާ ލޯބިވާ ފިރިމީހާ ލޯމަތިން ގެއްލިއްޖެއެވެ. ޝާހީން ގެ ކަޝްނަމާދު އަސްރު ނަމާދަށް ފަހު ކުރެވުނެވެ. ޢާއިލީ މީހުންނާއި، އެކުވެރިންނައި،ހެޔޮ އެދޭ އަދި ނުދަންނަ އެތައް ބައެއްގެ ޝާމިލްގައެވެ.
ދުވަސްތައް ހަފްތަތަކަށް ބަދަލުވަމުން ގޮސް ޝާހީން ގެ މަރަށް މި ވަނީ އެއް މަހާއި ހަތް ދުވަސް ވެފައެވެ. މި ދުވަސް ތަކުގައި މިޝާ ގެ ފަރާތުން ފެނިގެން ދިއައީ ހިއްވަރު ގަދަ ކަމާއި ކެތްތެރި ކަމެވެ. ގިނަ ވަގުތު ހޭދަ ކުރަމުން ދިއައީ އަޅުކަމުގަ އާއި ފިރިމީހާއަށް ސުވަރުގެ މިންވަރު ކުރެއްވުމަށް އެދި ދުޢާ ކުރުމުގަ އެވެ. ފަހަކަށް އައިސް މިޝާ އާދަޔާ ހިލާފަށް ވަރުބަލިވެ އުޅޭކަން ހަނީފާ އަށް ފާހަގަވެ މިޝާ ގޮވައިން ހޮސްޕިޓަލަށް ޑޮކޮޓަރަށް ދައްކާލުމައްޓަކާ ގެންދިޔައެވެ. ޑޮކްޓަރު ޓެސްޓު ތަކެއް ހެދުމައްފަހު ދިނީ މިޝާ އުއްމީދު ކުރި ކަހަލަ ހަބަރެއް ނޫނެވެ.ހެއްދެވި ފަރާތަށް ޝުކުރު ކުރެވުނު އަދަދެއް ވެސް ނޭނގެއެވެ. އޭނަގެ ޝާހީން އެ ދިޔަޢީ އޭނަ އެކަނިވެރި ކޮށްފައެއް ނޫނެވެ. އެކަނިވެރިކަން ފިލުވަދޭނެ އަގުހުރި ނިއުމަތެއް ދީފައެވެ. މިޝާ ގެ ބަނޑަށް އެއް މަހެވެ. ޝާހީން އާއި މިޝާގެ ލޯބީގެ ނިޝާނެވެ.
ނުވަ މަސް ފުރި މިޝާ ވިހާ ދުވަސް ކައިރި ވެފައި ވަނިކޮށް ބަނޑުގައި ރިއްސާތީ މިޝާ ހޮސްޕިޓަލަށް ގެންދެވުނެވެ. އަދި ވިއްސާ ކޮޓަރިއށް ވެއްދިތާ ގިނައިރު ތަކެއް ނުވެ ވިހައިފއެވެ. އެއްމާބނޑު ދެ ކުދިންނެވެ. ސްކޭން ތަކުން ވެސް ދެއްކަމުން އައީ އެއްމެ ކުއްޖެކެވެ.އެހެން ކަމުން މިޝާ އޮތި ގަބޫލު ކުރަން ދަތިވެފައެވެ. ފުރަތަމަ ދަރިފުޅުގެ ރޯލުމާ އެކުވެސް މިޝާގެ ހިތުގައި މައިވަންތަ ކަމުގެ ލޯބި އުތުރި އަރައި ގަތެވެ، ދެވަނަ ދަރިފުޅުގެ ރޯލުމާ އެކު މިޝާ ގެ ހުރިހާ ވޭނާއި ތަކުލީފެއް ނެތިގެން ހިނގައްޖެއެވެ. މިއަދު ޝާހީން ގެ ފަޅުކަން ހިތް ތޮރުފާ ވަރަށް އުނދަގޫ ކުރަމުން ދިޔައެވެ. މިޝާ ދަނެއެވެ، ބޮޑުވަމުން އަންނަ ވަރަކަށް އެކުދިން ބައްޕަ ހޯދާނެއެވެ. އެތަކެއް ސުވަލުތަކަކާ އޭނާ ކުރިމަތި ކުރުވާނެއެވެ. ނަމަވެސް ހީން އާއި މާއިޝް އަކީ ހިއްވަރުގަދަ ކެތްތެރި ކުދިން ކަމުގައި އޭނަ ހަދާނެއެވެ. އެ ދެކުދިންނަށް ރައްކާތެރި ކުރަނެއެވެ. ނޭވާ ހިނގާ ހިނދަކުއެވެ.