މިއަދު ހުޅުލޭ ފަޅަށް ޖައްސަނިކޮށް ވެއްޓުނު ސީޕްލޭންގައި ތިބި 12 މީހުނަށް ފަރުވާ ދިނުމަށް ފަހު ދޫކޮށްލާފައިވާ ކަމަށް ހުޅުމާލެ ހޮސްޕިޓަލުން ބުނެފި އެވެ.
ވެލާނާ އިންޓަނޭޝަނަލް އެއާޕޯޓަށް ޖައްސަން އުޅުނު ޓްރާންސް މޯލްޑިވިއަން އެއާވޭސްގެ ސީޕްލޭނެއް ފުރޮޅާލައި، ހިނގި ހާދިސާގައި 12 މީހަކަށް އަނިޔާވެގެން ހުޅުމާލެ ހޮސްޕިޓަލަށް ގެންދިޔަ އިރު، އެ މީހުންގެ ތެރޭގައި ދިވެހިންގެ އިތުރުން ބިދޭސީން ވެސް ހިމެނޭ ކަމަށް ހުޅުމާލެ ހޮސްޕިޓަލުން ބުންޏެވެ.
އެއާޕޯޓަށް ޖައްސަން އުޅެނިކޮށް ފުރޮޅާލި ޓީއެމްއޭ ސީޕްލޭން --- ފޮޓޯ: ޓްވިޓަރ (@Thappe12)
ހުޅުމާލެ ހޮސްޕިޓަލްގެ މީޑިއާ އިންފޮމޭޝަން އޮފިސާ ލިއުޝާދު ވަހީދު ސަން އަށް މިއަދު ވިދާޅުވި ގޮތުގައި އަނިޔާ ލިބިގެން ގެންދިޔަ މީހުންގެ ތެރޭގައި ގިނައީ ދިވެހިންނެވެ. އަދި އެމާޖެންސީ ރޫމްގައި ފަރުވާ ދިނުމަށް ފަހު މިހާރު އެންމެން ވެސް ދޫކޮށްލާފައިވާ ކަމަށް ލިއުޝާދު ވިދާޅުވި އެވެ.
އަދި އެއްވެސް މީހެއްގެ ފުރާނަޔަށް ނުރައްކާވާވަރު އަނިޔާއެއް ލިބި ފައެއް ނެތް ކަމަށް ލިއުޝާދު ވިދާޅުވި އެވެ.
ސޯޝަލް މީޑިއާގައި އާންމުވެފައިވާ ފޮޓޯތައް ދައްކާ ގޮތުގައި، ވެލާނާ އެއާޕޯޓުގެ ވޯޓާޑްރޯމަށް ޖައްސަން އުޅެނިކޮށް ޓީއެމްއޭގެ އެ ސީޕްލޭން އޮތީ ވާތްފަރާތަށް ފުރޮޅާލައި، އޭގެ ބޮޑުބައި ފެނު އަޑީގަ އެވެ.
އެއާޕޯޓަށް ޖައްސަން އުޅެނިކޮށް ފުރޮޅާލި ޓީއެމްއޭ ސީޕްލޭން ހުޅުލޭ ފަޅުތެރެއަށް އަޑިއަށް ގޮސްފައި--- ސަން ފޮޓޯ: ކިޔުންތެރިއެއް
އެމްއޭސީއެލްގެ ތަރުޖަމާނު، ހަސަން އަރީފް ސަން އަށް ވިދާޅުވި ގޮތުގައި، 12 މީހުންނާ އެކު ކޮންރެޑް ރަންގަލި ރިސޯޓުން މާލެ އައި ޓީއެމްއޭގެ ބޯޓެއް މިއަދު ހެނދު 8:35 އެހާކަންހާ އިރު ވަނީ ހުޅުލޭ ފަޅުތެރެއަށް ވެއްޓިފަ އެވެ. އެ ބޯޓުގައި ތިބީ ނުވަ ފަސިންޖަރުންނާއި ތިން ކްރޫއިން ކަމަށާއި އެއިން އެއްވެސް މީހަކަށް ސީރިއަސް ގެއްލުމެއް ލިބިފައި ނުވާ ކަމަށް އޭނާ ވިދާޅުވި އެވެ.
އެމްއެންޑީއެފްގެ ތަރުޖަމާނު ކެޕްޓަން އިބްރާހިމް އާޒިމް "ސަން"އަށް ވިދާޅުވި ގޮތުގައި މިއަދު ހެނދުނު 9:18ގައި އެ ބޯޓުު ފެންމައްޗަށް ނަގައި، އާންމު ހާލަތަށް ގެނެސްފަ އެވެ.