ހައިރައިޒްއިން އިންތިޒާމުކޮށްގެން ކޮންމެ އަހަރަކު ވެސް ބާއްވަމުން އަންނަ ފުޑް އެންޑް ބެވަރޭޖެސް ޝޯ ވެގެންދަނީ ވިޔަފާރިތަކަށް، އެ ވިޔަފާރިތަކުގެ އުފެއްދުންތައް ޝޯކޭސްކޮށް ޕްރޮމޯޓު ކުރަން ލިބޭ ފަހި ފުރުސަތަކަށެވެ.
އެގޮތުން މިއަހަރުގެ އެފްއެންބީ ޝޯ މިދިޔަ ބުރާސްފަތި ދުވަހު ފެށި އިރު ޝޯގެ ޕާޓްނަރުންނާ އެކު ސޮއި ކުރި ދުވަހު ގެނުވި އެންމެ ބޮޑު އަޖައިބަކީ އެ ޝޯގެ ބެވަރޭޖެސް ޕާޓްނަރަކަށް ސްޓެލްކޯ ހަމަޖެއްސުމެވެ. އޭރު ވެސް އެއީ ކިހިނެއްވި ކަމެއް ކަމެއް ނޭނގެ އެވެ. ސްޓެލްކޯ އިން ވެސް އޭރު ބުނީ ފަހުން އޭގެ މައުލޫމާތު ހިއްސާ ކުރާނެ ކަމަށެވެ.
ރާއްޖޭގައި ފުޅީގައި ބަންދުކޮށްގެން ވިއްކާ ފެނުގެ މާކެޓަށް ސްޓެލްކޯ އިން އާ ބްރޭންޑެއް ނެރުނީ އެފްއެންބީ ޝޯގެ ބެވަރޭޖެސް ޕާޓްނަރުކަން ވެސް ނެގި ފަހުންނެވެ.
މާލޭގައި ފެނުގެ ދަތިކަން ކުރިމަތިވެފައި އޮތް ދަނޑިވަޅެއްގައި "ސްޓެލްކޯ" ފެން ތައާރަފް ކުރުމުން ކުޑަ މުއްދަތެއްގެ ތެރޭގައި އެ ބާވަތުގެ ފެން ވަނީ ވައިގައި ހިފައިފަ އެވެ. ހަމަ އެކަނި އެސަބަބަށްޓަކައި ނޫނެވެ. އެ ފެނުގެ ރަހަވެސް ތަފާތެވެ. ބައެއް މީހުން ބުނާ ގޮތުގައި މިހާރު ބާޒާރުގައި ލިބެން ހުރި އެހެން ހުރިހާ ބާވަތެއްގެ ފެނަށް ވުރެ ސްޓެލްކޯ ފެން މާ މީރެވެ.
ސްޓެލްކޯގެ "ސްޓެލްކޯ ފެން" ފުޅިތަކެއް --- ސަން ފޮޓޯ
އެފްއެންބީ ޝޯގައި ވެސް ސްޓެލްކޯ ފެނުގެ ސްޓޯލެއް އެބަހުއްޓެވެ. އާޓް ގެލަރީގައި ބަހައްޓާފައި ހުރި ހުރިހާ ސްޓޯލަކަށް ފެން ސަޕްލައިކޮށްދެނީ ވެސް އެ ކުންފުނިންނެވެ. ކޮންމެ މީހަކު ވެސް އެތަނަށް ވަދެ ނުކުމެގެންދާ އިރު ކިހިލި ދަށަށް ފެންފުޅިއެއް ބާރުކޮށްލާފައި ހުންނަ ތަން ފެނެ އެވެ.
"ވަރަށް މީހުން އާދޭ މި ފެނުގެ މައުލޫމާތު ހޯދަން. އަޅުގަނޑުމެންގެ ސްޓޯލުން ފެނުގެ ރަހަ ބަލައިލުމުގެ ފުރުސަތު ވެސް އޮވޭ،" ސްޓެލްކޯ ފެނުގެ ސްޓޯލުން ބުންޏެވެ.
އެ ސްޓޯލުގައި އެވަގުތު ހުރި އޮފިޝަލް ބުނި ގޮތުގައި މިދުވަސްވަރު އެކުންފުނީގެ ފެނުގެ ސްޓޮކް ހުރީ ވަރަށް މަދުވެފަ އެވެ. އެހެން ކަމުން މިދުވަސްކޮޅު ފެނުގެ އޯޑަރުތައް ނުނަގާ ކަމަށާއި ނަމަވެސް އަންނަ މަހުން ފެށިގެން ކުރިއެކޭ އެއް ވަރަށް އޯޑަރު ނަގަން ފަށާނެ ކަމަށް އޮފިޝަލް ވިދާޅުވި އެވެ.
އެ ފެނަކީ އިންޖީނު ފިނިކުރުމަށް ބޭނުންކުރާ ފެނުން ބާކީ ހުންނަ ބައި ބޮޓަލް ކޮށްގެން ވިއްކާ ފެނެކެވެ.
ސްޓެލްކޯއިން މާކެޓަށް ނެރުނު "ސްޓެލްކޯ"ފެން ވިއްކަނީ ފަސް ސައިޒަކަށެވެ.
ފެން ވިއްކަން ހަމަޖެހިފައިވާ އަގުތައް:
- 330 އެމްއެލް ކޭހެއް 50.40 ރުފިޔާ
- 500 އެމްއެލް ކޭހެއް 52.80 ރުފިޔާ
- 1 ލީޓަރު ކޭހެއް 38.40 ރުފިޔާ
- 1.5 ލީޓަރު ކޭހެއް 52.80 ރުފިޔާ
- 5 ލީޓަރު ކޭހެއް 48.00 ރުފިޔާ
"ސްޓެލްކޯ ފެން އުފައްދަނީ ތަފާތު ގޮތަކަށް. އިންޖީނު ފިނި ކުރަން ބޭނުން ކުރާ ފެން ސާފު ކޮށްގެން މި ބަންދު ކުރަނީ. މިއީ އަސްލު ރިސައިކަލް ކުރަން ވަރަށް ރަނގަޅު ގޮތެއް. ފެނުގެ ރަހަވެސް މީރު. އަޅުގަނޑަށް ވަރަށް ކަމުދޭ މި ފެން،" އެފްއެންބީ ޝޯގެ ތެރެއިން ވާހަކަ ދައްކާލި މީހަކު "ސަން" އަށް ކިޔައިދިނެވެ.
ސްޓެލްކޯ ފެނަށް މި ދޭތެރެއިން ޑިމާންޑު ބޮޑެވެގެން ދިޔަ އެވެ. އެއީ މާލޭގައި އެންމެ ގަދަޔަށް ހިނގާ ތާޒާ އާއި ލައިފް ބްރޭންޑުގެ ފެނުގެ 500 އެމްއެލްގެ ފެންފުޅި އާއި 1.5 ލީޓަރުގެ ފެންފުޅިއަށް ޑިމާންޑު ބޮޑުވެ އެ ސައިޒުގެ ފެންފުޅި ވިއްކުން ލިމިޓު ކުރުމާ ގުޅިގެންނެވެ. އޭރު ބައެއް ފިހާރަތަކުން ބުނީ ފެނުގެ ޑީމާންޑު ބޮޑުވެފައި ވަނީ ހޫނު ގަދަވުމާ ގުޅިގެން ކަމަށެވެ.
ސްޓެލްކޯ ފެނުގެ ސްޓޯލް ހިންގާ މުވައްޒަފުން ---ސަން ފޮޓޯ/ މުހައްމަދު އަފްރާހް
އަލަށް ތައާރަފްކުރި ފެނަކާ އަޅާ ބަލާ އިރު ސްޓެލްކޯ ފެނަށް ލިބެމުންދާ ތަރުހީބު ވަރަށް ވެސް ރަނގަޅެވެ. އަދި ޚާއްސަކޮށް އެފްއެންބީ ޝޯއިން އެ ފެނަށް ވަރަށް ބޮޑު އެކްސްޕޯޝާއެއް ލިބިގެން ގޮސްފި އެވެ.
އެ ޝޯއަކީ އެފަދަ އާ ޕްރޮޑަކްޓްތައް މީހުންނާ ހަމައަށް ގެނެސްދީ ތަޖުރިބާ ކޮށްލުމުގެ ފުރުސަތު ފަހިކޮށްދޭ ޝޯ އެކެވެ.
އެފްއެންބީ ޝޯގެ މިއަދަކީ އެންމެ ފަހު ދުވަހެވެ. މިއަދުގެ ސެޝަން ފަށާނީ މެންދުރު 14:00 ގަ އެވެ. މަޣްރިބް ނަމާދަށް 06:00ގައި ބައްދު ކުރުމަށް ފަހު ދެން ހުޅުވާނީ މިރޭ 08:00ގަ އެވެ.