މޯލްޑިވްސް ސްޕޯޓްސް ކޯޕަރޭޝަނުން އިންތިޒާމްކޮށްގެން ބާއްވާ މައިލޯ 5 ކޭ ޓީމް ރަން، މިއަދު ހަވީރު ހުޅުމާލޭގައި ފަށާނެ އެވެ.
ފައިވް ކޭ ރަން ހުޅުމާލޭގައި ފެށުމަށް ހަމަޖެހިފައި ވަނީ މިއަދު ހަވީރު 4:30 ގަ އެވެ. އަދި ނިމޭނީ ހަވީރު 5:30ގަ އެވެ.
ޓީމް އުސޫލުން ވާދަކުރެވޭ އެ ދުވުމުގައި ރަޖިސްޓާ ކުރުމުގެ ސުންގަޑި މިދިޔަ ބުރާސްފަތި ދުވަހު ހަމަވެފައިވާ އިރު ސީނިއާ ޓީމްތަކުގައި ކޮންމެ ޓީމެއްގައި މަދުވެގެން ދެ އަންހެން ބައިވެރިން ހިމަނަން ޖެހެ އެވެ. ފަސް ކިލޯ މީޓަރު ރޭސް 45 މިނިޓް ތެރޭގައި ނިންނަމަން ޖެހޭ އިރު ރޭސް ނިންމި ގަޑިކަމަށް ބެލެވޭނީ ޓީމްގެ ފަސް ބައިވެރިންގެ ތެރެއިން ހަތަރު ވަނަ ދުވުންތެރިއާ ނިމޭ ގަޑި އެވެ.
އަގު ބޮޑު އިނާމްތަކާ އެކު ކުރިއަށްދާ ރޭހުގައި 14 އަހަރުން ދަށުގެ ކުދިންނަށް "ޖޫނިއާ ކެޓަގަރީ"ގެ ދުވުން ކުރިއަށްގެންދާ އިރު އެ ރޭހުގައި ބައިވެރިވުމުގެ ފުރުޞަތު ވެސް ހިލޭވަނީ ހުޅުވާލާފައިވެ އެވެ.
ސްޕޯޓްސް ކޯޕަރޭޝަނުންބުނީ "މައިލޯ 5K ޓީމް ރަން" ބޭއްވުމުގެ މަގްސަދަކީ އާންމުންގެ މެދުގައި ދުޅަހެޔޮ ސިއްހަތަކަށް މަގުފަހިކޮށްދިނުމުގެ ގޮތުން، ދިރިއުޅުމުގެ އާދަކާދަތަކާ ގުޅިގެން ދިމާވާ ބަލިތަކުން ރައްކާތެރިވުމަށް ޓަކައި ހޭލުންތެރި ކުރުމުގެ އިތުރުން އެކުވެރި މާހައުލެއް ގާއިމްކުރުމެވެ.
މި ރޭހުގެ މީޑިއާ ޕާޓްނަރަކީ ސަން މީޑިއާ ގްރޫޕެވެ.