ސައްބީސް އަހަރު ފަހުން އަމީތާބް ބައްޗަން އާއި ރިޝީ ކަޕޫރު އެކުގައި ފެނިގެންދާ ފުރަތަމަ ފިލްމުގައި ދެމީހުން އަދާކުރާނީ ބައްޕަ އަދި ދަރިފުޅުގެ ރޯލު ކަމަށް ޚަބަރުތައް ބުނެފި އެވެ.
ޑީއެންއޭ ޚަބަރުތައް ބުނާގޮތުން އަމީތާބް އަދި ރިޝީ އެކުގައި ފެނިގެން ދާނީ އުމޭޝް ޝުކްލާގެ '102 ނޮޓް އައުޓް' ކިޔާ ފިލްމަކުންނެވެ.
އެ ފިލްމުގައި އަމީތާބް އަދާކުރާނީ އުމުރުން 102 އަހަރުގެ މީހެއްގެ ރޯލެވެ. އަދި ރިޝީ ފެނިގެންދާނީ އަމީތާބްގެ ދަރިފުޅުގެ ރޯލުންނެވެ.
އަމީތާބް އުމުރުން ރިޝީއަށް ވުރެ 10 އަހަރު ދޮށީ ނަމަވެސް، ދެމީހުން މީގެ ކުރިން ފިލްމުތަކުގައި ފެނިގެން ގޮސްފައި ވަނީ ދެބެންގެ ރޯލުތަކުންނެވެ. އެހެންކަމުން މިއީ ވަރަށް ތަފާތު ފިލްމަކަށް ވާނެ ކަމަށް ބެލެވެ އެވެ.
ގިނަ އަހަރުތަކެއް ފަހުން އަމީތާބް އާއެކު ފިލްމެއް ކުޅެލަން ލިބުމުން އެކަމާ އުފަލުން ހުރި ކަމަށް ރިޝީ ވަނީ ބުނެފައެވެ. ރިޝީ ކުރި ޓުވީޓެއްގައި ބުނެފައި ވަނީ އަމީތާބް އާއެކު މަސައްކަތް ކުރުމަކީ އަބަދުވެސް ވަރަށް ބޮޑު ފަޚުރަކާއި އުފަލެއް ލިބޭ ކަމެއް ކަމަށެވެ.
އަމީތާބް އާއި ރިޝީ ވަނީ 'ނަސީބް'، 'ކަބީ ކަބީ' އަދި 'އަމަރް އަކްބަރް އެންތަނީ' ފަދަ ފިލްމުތަކުގައި މަސައްކަތް ކޮށްފައެވެ. ދެ މީހުން އެކުގައި އެންމެ ފަހުން ފެނިގެން ގޮސްފައި ވަނީ 1991 ވަނަ އަހަރު ރިލީޒް ކުރި ފިލްމު 'އަޖޫބާ' އިންނެވެ.