މިދިޔަ އަހަރު އޮލިމްޕަހުގައި އެޅުވި ކާމިޔާބު ބިރުވެރި ފިލްމު، 4426 އަށް ފަހު ފާތިމަތު ނަހުލާ އުފައްދާ ލޯބީގެ ފިލްމު "ބޮސް"ގެ ޝޫޓިން ރޯދަ މަހުގެ ތެރޭގައި ފަށާނެ ކަމަށް ފިލްމުގެ ޑައިރެކްޓަރު އައިޝަތު ރިޝްމީ ބުނެފި އެވެ.
ފިލްމުގެ ޑައިރެކްޝަނާ ހަވާލުވުމަށް ފަހު ފުރަތަމަ ފަހަރަށް "ބޮސް" އާ ގުޅޭ ގޮތުން ވާހަކަ ދައްކަމުން ރިޝްމީ ބުނީ، ފިލްމުގެ މާލޭގައި ނަގަން ޖެހޭ ބައިތަކުގެ ޝޫޓިން އަންނަ ރޯދަމަހުގެ ފަހުކޮޅުގައި ފަށަން ހަމަޖެހިފައިވާ ކަމަށެވެ.
"ބޮސް"ގެ ޑައިރެކްޓަރަކަށް ވެދިނުމަށް ނަހުލާ، ރިޝްމީ އަށް ހުށަހަޅާފައި ވަނީ "ވިޝްކާ" ޕްރިމިއާ ކުރުމަށް ބޭއްވި ރަސްމިއްޔާތުގެ ތެރެއިންނެވެ. މީގެ ތިން ހަފްތާ ކުރިން ރިޝްމީ ވަނީ އެ ފިލްމުގެ ޑައިރެކްޝަނާ ހަވާލުވެފަ އެވެ.
ރިޝްމީ ބުނީ، ފިލްމުގެ މަންޒަރުތައް ނަގާނެ ލޮކޭޝަންތައް ނަހުލާ ރާއްޖެ އައުމުން ވާހަކަދައްކައިގެން ހަމަޖައްސާނެ ކަމަށެވެ. ނަހުލާ މިވަގުތު ހުރީ ޗުއްޓީގައި ރާއްޖެ އިން ބޭރުގަ އެވެ.
ރިޝްމީ ބުނީ، މިހާރު ފިލްމުގެ ލަވަތައް ފިކްސް ކުރަމުން އަންނަ ކަމަށާއި، ގިނަ ލަވަތަކުގެ މަސައްކަތް ކުޅަދާނަ ލަވަކިޔުންތެރިޔާ މުހައްމަދު އަބްދުލް ޣަނީ (ތޭރަވާ) އަށް ހަވާލުކޮށްފައިވާނެ ކަމަށެވެ.
އޭގެ އިތުރުން، ފިލްމުގައި ހިމެނޭ ކާސްޓުންގެ ކޮސްޓިއުމްތައް ހަމަޖައްސަމުން އަންނަ ކަމަށް ވެސް ރިޝްމީ ބުންޏެވެ.
"ބޮސް"ގެ ލީޑުރޯލު ކުޅެން ހަމަޖެހިފައި ވަނީ މިހާރު ދިވެހި ފިލްމު އިންޑަސްޓްރީގައި އެންމެ ބާރަށް ފިޔަޖަހަމުން އަންނަ ތަރި މަރިޔަމް އައްޒަ އެވެ. ފިލްމުގެ ހުރިހާ މަސައްކަތެއް ނިމި ސްކްރީނާ ހަމައަށް އަންނާނީ އަހަރުގެ ފަހުކޮޅުގަ އެވެ.