ބަންގާޅުގައި މިދިޔަ މަހުގެ ފަހުކޮޅު މަރުވި ދިވެހި ދަރިވަރު ރައުދާ އާތިފް، 20.ގެ މަރާ ގުޅޭ ގޮތުން ވާހަކަތައް ނުފެތުރުމަށް އޭނާގެ މަންމަ އާމިނަތު މުހައްރިމަތު އެދިއްޖެ އެވެ.
ރައުދާގެ މަންމަ މިއަދު ނެރުނު ބަޔާނެއްގައި ބުނީ ރައުދާގެ މަރަކީ ބަންގާޅުގެ އިތުރުން ދިވެހީން ވެސް ވަރަށް ޝައުގުވެރިކަން ހުއްޓިފައިވާ ހާދިސާއެއްކަން އެނގޭ ކަމަށާއި ނަމަވެސް ރައުދާއާ ގުޅޭ ގޮތުން ކޮންމެ ވާހަކައެއް ވެސް އަޑުއަހަނީ ނުހަނު ހިތާމަޔާއި ވޭނުން ފުރިގެންވާ ހާލުގައި ކަމަށެވެ.
"ރައުދާއާ ބެހޭ ގޮތުން، ސާބިތު ނުހިފޭ ވާހަކަތައް އަޑުއިވުމަކީ އަޅުގަނޑުމެންގެ އާއިލާ ކޮންމެ ދުވަހަކު ކަރުނައަޅާ ރޯ ކަމެކެވެ. އެކަންތައްތަކާ މެދު ރައުދާގެ ދެ ކޮއްކޮ އެތަކެއް ސުވާލެއް އުފައްދާ ކަމެކެވެ. ރައުދާގެ މަރުގެ ހާދިސާ އަލުން ލޯމަތީގައި ހާމަވެގެންދާ ކަމެކެވެ،" ރައުދާގެ މަންގެގެ ބަޔާނުގައި ބުނެފައިވެ އެވެ.
ރައުދާއަކީ ހިތް ހެޔޮ، އެހެން މީހުނަށް އޯގާތެރި އަޅާލާ ދަރިއެއް ކަމަށް ފާހަގަކޮށް ރައުދާގެ މަންމަ ބުނީ ރައުދާގެ މުސްތަގްބަލަށް އޭނާ ފޮނި އުންމީދުތަކެއް ކުރި ކަމަށާއި އެގޮތުން މަތީތައުލީމް ހާސިލް ކުރުމަށް ބޭނުންވާ ފައިސާ ލޯނެއްގެ ގޮތުގައި ހޯދައި ރާއްޖެ އިން ބޭރަށް ވެސް ފޮނުވީ ކަމަށެވެ.
"ނަމަވެސް ﷲގެ ނިޔާފުޅު ވަނީ އެހެން ގޮތަކަށް ނިންމަވާފައި، އަދި އެ ނިންމެވުމަކީ އަޅުގަނޑަށް ތަހައްމަލުކުރަން ކިތަންމެ ދަތި ކަމަކަށްވީ ނަމަވެސް، އަޅުގަނޑުވާނީ ﷲ ނިޔާފުޅަށް ކެތްކުރާ މީހުންގެ ތެރެއިން،" ރައުދާގެ މަންމަ ބުންޏެވެ.
ރައުދާގެ މަންމަ ބުނީ ރައުދާގެ މަރުގެ ހަގީގަތް އޭނާއަށް ގަބޫލުކުރެވޭނީ އެ ދަރިފުޅުގެ އަނގައިން ބުނުމުން ކަމަށާއި މަރުގެ ހަގީގަތް މަހުޝަރު ބިމުގައި ހާމަވެގެން ދާނެ ކަމަށެވެ. ރައުދާގެ ހަށިގަނޑު ނަގަން ބޭނުން ނުވާކަން ހާމަކޮށް ރައުދާގެ މަންމަ ބުނީ އޭނާ ބޭނުންވަނީ ރައުދާގެ ހަށިގަނޑު ކައްވަޅުގައި ހަމަހިމޭނުން ބޭއްވުމަށް ކަމަށާއި އޭނާއަށް އިތުރަށް އުދަގޫވާނެ ގޮތަށް އެއްވެސް ފަރާތަކުން ކަންތައް ނުކުރުމަށް އެދޭ ކަމަށެވެ.
ނަމަވެސް ރައުދާގެ ބައްޕަ ޑރ. މުހައްމަދު އާތިފް، ވަނީ ރައުދާ މަރާލީ ކަމަށް ބުނެ އެ މައްސަލަ ރަނގަޅަށް ތަހުގީގުކޮށްދީ އޭނާގެ މަރުގެ ހަގީގަތް ހޯދުމުގެ ގޮތުން ރާޖްޝާހީ މެޖިސްޓްރޭޓު ކޯޓަށް އޭޕްރިލް 10 ވަނަ ދުވަހު މައްސަލައެއް ވައްދައިފަ އެވެ.
އަދި ރައުދާ އާތިފްގެ ހަށިގަނޑު ކަށްވަޅުން ނަގައި، އަލުން އޮޓޮޕްސީއެއް ހެދުމަށް ބަންގްލަދޭޝްގެ ރާޖްޝަހީ މެޓްރޮޕޮލިޓަން މެޖިސްޓްރޭޓު ކޯޓުން ވަނީ އަމުރުކޮށްފަ އެވެ.