ޔާރާ ޕްރޮޑަކްޝަންގެ ފަރާތުން އައިޝަތު ރިޝްމީ ޕްރޮޑިއުސްކޮށް މިދިޔަ މަހުގެ އަށް ވަނަ ދުވަހު ރިލީޒް ކުރި ފިލްމު، "ވިޝްކާ" އަންނަ ހަފްތާ ބަނދުގައި މ. އަތޮޅުގައި އަޅުވަން ތައްޔާރުވެފައިވާ ކަމަށް ފިލްމުގެ ޓީމުން ބުނެފި އެވެ.
"ސަން" އާ ވާހަކަ ފިލްމުގެ ޕްރޮޑިއުސަރު އަދި ލީޑު ރޯލުން ފެނިގެން ގޮސްފައިވާ ރިޝްމީ ބުނީ، އެ ފިލްމަށް އަތޮޅު ތެރެއިން ވެސް ބޮޑު ތަރުހީބެއް ލިބެމުން އަންނަ ކަމަށާއި އަންނަ ހަޕްތާ ބަނދުގައި މ. އަތޮޅުގައި ފިލްމު އަޅުވަން ދިޔުމަށް ފުރަން ތައްޔާރު ވަމުންދާ ކަމަށެވެ.
"ވިޝްކާ" ގެ މަންޒަރެއްގައި ރިޝްމީ---
މާދަމާ ރޭ "ވިޝްކާ" އަޅުވަން ހަމަޖެހިފައިވާ ކަމަށާއި އަދި އަންނަ ހުކުރު ދުވަހުގެ ރޭ އެ އަތޮޅު މުލަކުގައި ވެސް ފިލްމު އަޅުވަން ހަމަޖެހިފައިވާ ކަމަށް ރިޝްމީ ބުންޏެވެ. އަދި ފިލްމްގެ ޓިކެޓް އެ ދެ ރަށުން ވެސް ލިބޭނެ ކަމަށް ރިޝްމީ ބުންޏެވެ.
"ވިޝްކާ"ގެ ކާމިޔާބު ޝޯތަކެއް މާލޭގައި ވެސް ވަނީ ދައްކައިފަ އެވެ. އޭގެ އިތުރުން ހދ. އަތޮޅު ކުޅުދުއްފުށީގެ އިތުރުން އެ އަތޮޅު ނޮޅިވަރަމްގައި ވެސް ފިލްމު އެޅުވި އެވެ. އަދި ލ. އަތޮޅު ގަމާއި އެ އަތޮޅު ދަނބިދޫގެ އިތުރުން އއ. މަތިވެރީގައި ވެސް ފިލްމު ވަނީ އަޅުވައިފަ އެވެ.
"ވިޝްކާ" ގެ ޓްރެއިލާ އެއް---
ރިޝްމީ ބުނީ، މާލޭގައި ދެއްކި ޝޯތަކަށް ބޮޑު ތަރުހީބެއް ލިބުން ކަމަށާއި އަދިވެސް އެހެން އަތޮޅުތަކުން ފިލްމު އަޅުވަން ބޭނުންވެގެން ގުޅަމުން ދާ ކަމަށެވެ.
"މާލޭގެ ޝޯތައް ވަރަށް ކާމިޔާބު. މިހާރުވެސް އެބަ ގުޅާ ވަރަށް ގިނަ ރަށްރަށުން ފިލްމު އަޅުވަން ވެގެން،" ރިޝްމީ ބުންޏެވެ.
"ވިޝްކާ" ގެ މަންޒަރެއް---
ރިޝްމީ ބުނީ، ފިލްމު އަޅުވަން ބޭނުންވާ ފަރާތްތަކުން ގުޅުމުން ނުވަތަ "ވިޝްކާ"ގެ ފޭސްބުކް ޕޭޖަށް މެސެޖް ކުރުމުން ރަށް ރަށަށް ގޮސް ފިލްމު އަޅުވަން ތައްޔާރުކަމަށެވެ.
ރަވީ ފާރޫގް އެކްޓް ކޮށް ޑައިރެކްޓް ވެސް ކޮށްފައިވާ "ވީޝްކާ" އަކީ ކްރައިމް ތްރިލާއެއްގެ މައްޗަށް ހަދާފައިވާ ފިލްމެކެވެ.